ဖေ‌ဖော်ဝါရီ 2026

အာရက္ခတိုင်းမ်စ် (၁၁ ဖေဖော်ဝါရီ ၂၀၂၆) စစ်ကော်မရှင်က ကျင်းပပြုလုပ်တဲ့ ရွေးကောက်ပွဲကို ဝင်ရောက်ယှဉ်ပြိုင်တဲ့ ရက္ခိုင်ပါတီတွေဟာ ခိုင်လုံမဲ ၁ ရာခိုင်နှုန်းအောက်သာ ရရှိခဲ့တယ်လို့ သိရပါတယ်။ ဒေါက်တာအေးမောင် ဦးဆောင်တဲ့ ရခိုင့်ဦးဆောင်ပါတီ (AFP ) က မဲဆန္ဒနယ် ၁၃ နေရာမှာ ကိုယ်စားလှယ်လောင်း ၃၂ ဦး နဲ့ ဝင်ရောက်ယှဉ်ပြိုင်ခဲ့တာ ဖြစ်ပါတယ်။ ခိုင်လုံမဲ ရရှိမှု စုစုပေါင်း ၂၂၅၆၇ ၊ ခိုင်လုံမဲ ရရှိမှု ရာခိုင်နှုန်း ၀ ဒသမ ၁၇ %  နဲ့ အနိုင်ရကိုယ်စားလှယ် ၈ ဦး ရှိခဲ့ပါတယ်။ ဒါ့အပြင် ဦးဘရှိန် ဦးဆောင်တဲ့ ရခိုင်တိုင်းရင်းသားများပါတီ (RNP) က မဲဆန္ဒနယ် ၁၄ နေရာမှာ ကိုယ်စားလှယ်လောင်း ၂၅  ဦး နဲ့ ဝင်ရောက်ယှဉ်ပြိုင်ခဲ့တာ ဖြစ်ပါတယ်။ ခိုင်လုံမဲ ရရှိမှု စုစုပေါင်း ၁၈၉၀၁၊  ခိုင်လုံမဲ ရရှိမှု ရာခိုင်နှုန်း ၀ ဒသမ ၁၄ %  နဲ့ အနိုင်ရကိုယ်စားလှယ် ၆ ဦး ရှိခဲ့ပါတယ်။ ရခိုင်ပြည်နယ်အမျိုးသားအင်အားစုပါတီကတော့ မဲဆန္ဒနယ် ၁ နေရာမှာ ကိုယ်စားလှယ်လောင်း ၁  ဦး နဲ့ ဝင်ရောက်ယှဉ်ပြိုင်ခဲ့တာ ဖြစ်ပါတယ်။ ခိုင်လုံမဲ ရရှိမှု စုစုပေါင်း ၁၂၆၈၊  ခိုင်လုံမဲရရှိမှုရာခိုင်နှုန်း ၀ ဒသမ ၀၁ %  သာ ရရှိခဲ့ပြီး အနိုင်ရ ကိုယ်စားလှယ် မရှိခဲ့ဘူးလို့ UEC က ထုတ်ပြန်ထားပါတယ်။ နိုင်ငံရေးပါတီအလိုက် ခိုင်လုံမဲရရှိမှု ရာခိုင်နှုန်းများ‌ကို ပြည်ထောင်စုရွေးကောက်ပွဲကော်မရှင် (UEC) က ဖေဖော်ဝါရီလ ၉ ရက် ရက်စွဲနဲ့ ထုတ်ပြန်ခဲ့တာလည်း ဖြစ်ပါတယ်။

အာရက္ခတိုင်းမ်စ် (၁၀ ဖေဖော်ဝါရီ ၂၀၂၆) အာရက္ခတပ်တော်နဲ့ ပူးပေါင်းမဟာမိတ်တပ်တို့ ပဲခူးတိုင်း ပန်းတောင်းမြို့နယ်ရှိ ကပစ ၁၆ နဲ့ ၃ မိုင်ခန့်အကွာထိ ထိုးစစ်ရောက်ရှိနေတယ်လို့ သိရပါတယ်။ “ ပွိုင့်-၅၀၆ စခန်းကုန်းအထိ AA ရောက်လာတဲ့အတွက် မသုန်ရွာကြားမှာ ပွိုင့်-၃၅၃ စခန်းနဲ့ ပွိုင့်-၂၈၈ စခန်းနှစ်ခုသာ ကျန်ရှိတော့မှာ ဖြစ်ပါတယ်”  လို့ CDM ဗိုလ်ကြီးဇင်ယော်က  ပြောပါတယ်။ ကာကွယ်ရေးပစ္စည်းစက်ရုံ (ကပစ ၁၆) ဟာ ပဲခူးတိုင်း ပန်းတောင်းမြို့နယ် မသုန်ရွာမှာ တည်ရှိတာလည်း ဖြစ်ပါတယ်။ စစ်ကော်မရှင်အနေနဲ့လည်း ကပစ ၁၆ မကျဆုံးစေရေးအတွက် လေယာဉ်နဲ့ ဒရုန်းတွေကို အသုံးပြုပြီး လေကြောင်းပစ်ကူမှုတွေ ဆက်တိုက်လုပ်ဆောင်နေတယ်လို့ သိရပါတယ်။ ၂၀၂၆ ခုနှစ် ဇန်နဝါရီလ ၂၈ ရက်တွင် အာရက္ခတပ်တော် ပြန်လည်သိမ်းပိုက်ထားတဲ့ ပဲခူးတိုင်း ပန်းတောင်းမြို့နယ်က စစ်ကော်မရှင်ရဲ့ ကာကင်းစခန်းတခုဖြစ်တဲ့ ၆၆၆ စခန်းကုန်းကိုလည်း စစ်ကော်မရှင်အနေနဲ့ ပြန်လည်ထိုးစစ်ဆင်ရန် အင်အားဖြည့်တင်းနေတယ်လို့ သိရပါတယ်။

အာရက္ခတိုင်းမ်စ် (၁၀ ဖေဖော်ဝါရီ ၂၀၂၆) ရက္ခိုင်ပြည်၊ သံတွဲမြို့နယ်ရှိ စစ်ဘေးရှောင် ၅ ရာကျော်အတွက် ဆန်အိတ်တွေ လှူဒါန်းပေးခဲ့တယ်လို့ ငပလီကမ်းခြေစုပေါင်းပရဟိတအဖွဲ့က ပြောပါတယ်။ သံတွဲမြို့နယ်ရှိ ကျေးရွာ ၁၇ ရွာမှာ ယာယီခိုလှုံနေတဲ့  အိမ်ထောင်စု ၁၇၇ စု၊ မိသားစုဝင် စုစုပေါင်း ၅၄၈ ယောက်စာအတွက် ဆန်အိတ်တွေ လှူဒါန်းခဲ့တာဖြစ်ပြီး စုရပ်နေရာ ၃ နေရာမှာ လှူဒါန်းခဲ့တာ ဖြစ်တယ်လို့ သိရပါတယ်။ အဆိုပါ လှူဒါန်းမှုကိုတော့  Mrs. Kyu Kyu မိသားစုကတဆင့် ဆက်သွယ်ပြီး  WAO – WORLD ARAKANESE ORGANIZATION (USA) အဖွဲ့အစည်းက ငပလီကမ်းခြေစုပေါင်းပရဟိတအဖွဲ့ကို ချိတ်ဆက်လှူဒါန်းစေခဲ့တာလည်း ဖြစ်ပါတယ်။ “ အလှူရှင်တွေလည်းနည်းပါးလာနေတော့ အခက်အခဲ ရှိပါတယ်။ ပြည်တွင်းမှာ အရမ်းပဲ အခက်အခဲများနေလို့ ခုလို ဝိုင်းဝန်း ကူညီပေးစေချင်တယ်”  လို့ ငပလီကမ်းခြေစုပေါင်းပရဟိတအဖွဲ့ရဲ့ တာဝန်ရှိသူတဦးက အာရက္ခတိုင်းမ်စ်ကို ပြောပါတယ်။ ဒါ့အပြင် ငပလီကမ်းခြေစုပေါင်းပရဟိတအဖွဲ့အနေနဲ့ ပြီးခဲ့တဲ့ ဇန်နဝါရီလအတွင်းမှာလည်း ရက္ခိုင်ပြည်၊ သံတွဲမြို့ရှိ စစ်ရှောင် ၂၆၈ ဦး အတွက် ပြည်တွင်းပြည်ပ အလှူရှင်တွေကိုယ်စား အိမ်ထောင်စု ၇၂ စု၊ လူဦးရေ ၂၆၈ ဦး အတွက် ဆန်အိတ် ၁၅ အိတ်ကို သွားရောက် လှူဒါန်းပေးခဲ့တယ်လို့ သိရပါတယ်။

အာရက္ခတိုင်းမ်စ် (၉ ဖေဖော်ဝါရီ ၂၀၂၆) ဧရာဝတီတိုင်း သာပေါင်းမြို့နယ်တွင် အာရက္ခတပ်တော်၊ ပူးပေါင်းမဟာမိတ်တပ်တွေနဲ့ စစ်ကော်မရှင်တို့ တိုက်ပွဲတွေ ပြင်းထန်နေပြီး အဆိုပါ တိုက်ပွဲအတွင်း စစ်ကော်မရှင်ရဲ့ ကာကင်းစခန်းတွေ လက်လွှတ်လိုက်ရလို့ စစ်ကော်မရှင်တပ် အရာရှိတချို့ စစ်ဆေးခံနေရတယ်လို့ သိရပါတယ်။ ၂၀၂၆ ခုနှစ် ဇန်နဝါရီလ ၃၀ ရက်နဲ့ ၃၁ ရက်အတွင်း ဧရာဝတီတိုင်းက သာပေါင်းမြို့နယ် တိုက်ပွဲတွင် စစ်ကော်မရှင်ဘက်က ကာကင်းစခန်း ၃ ခုထပ်မနည်း လက်လွှတ်ဆုံးရှုံးလိုက်ရတယ်လို့ သိရပါတယ်။ အဆိုပါ ကာကင်းစခန်း ၃ ခုထပ်မနည်း လက်လွှတ်လိုက်ရလို့ ခလရ ၃၀၈ သာပေါင်းတပ်ရင်းက စစ်ဆင်ရေးကွပ်ကဲနေတဲ့ ဗိုလ်မှူး ၁ ယောက်နဲ့ တပ်ရင်းမှူး ၁ ယောက်ကို ပုသိမ်အနောက်တောင်တိုင်းစစ်ဌာနချုပ်မှာ စစ်ကော်မရှင်က ဖမ်းဆီးစစ်ဆေးနေတယ်လို့ သိရပါတယ်။ အာရက္ခတပ်တော်၊ မဟာမိတ်ပူးပေါင်းအဖွဲ့နဲ့ စစ်ကော်မရှင်တို့ တိုက်ပွဲဖြစ်ပွားရာ နေရာတွေကတော့ သာပေါင်းမြို့နယ်က သာ‌ပေါင်းလေး၊ ကျားခေါင်း၊ ကင်မွန်းခြုံ၊ သစ်ဝမ်းပူ စတဲ့နေရာပဲ ဖြစ်ပါတယ်။ အဆိုပါ တိုက်ပွဲဖြစ်ပွားရာနေရာများကို စစ်ကော်မရှင်ရဲ့ ခမရ-၃၀၈ ကနေပြီး လက်နက်ကြီးများနဲ့ ပစ်ကူပေးနေပြီး သဲဖြူ၊ မရမ်းကျင်း၊ ဖိုချောင်း‌ကျေးရွာတွေကနေ ခမရ-၃၀၈ အထိ  ကင်းပုန်းများ ချထားတယ်လို့လည်း သိရပါတယ်။

အာရက္ခတိုင်းမ်စ် (၉ ဖေဖော်ဝါရီ ၂၀၂၆) ရက္ခိုင်ပြည် မြောက်ဦးမြို့နယ်တွင် ရှေးဟောင်းရတနာများနဲ့ ငွေဒင်္ဂါးပြားများ တွေရှိခဲ့တဲ့ လူငယ်တွေကို အာရက္ခပြည်သူ့တော်လှန်ရေးအစိုးရက ဂုဏ်ပြုလွှာနဲ့ ဆုချီးမြှုင့်ခဲ့တယ်လို့ သိရပါတယ်။ ၂၀၂၆ ခုနှစ် ဇန်နဝါရီလ ၂၄ ရက်က မြောက်ဦးမြို့ မြို့သစ်ရပ်ကွက်ရှိ ဘောလုံးကွင်းတွင် ဘောလုံးကစားကြရင်း ရှေးဟောင်းရတနာပစ္စည်များနဲ့ ငွေဒင်္ဂါးပြား ၁၃၂ ပြားကို တွေ့ရှိခဲ့တာလည်း ဖြစ်ပါတယ်။ အဆိုပါ ရှေး‌ဟောင်းရတနာများနဲ့ ငွေဒင်္ဂါးပြားများ တွေ့ရှိခဲ့တဲ့ လူငယ် ၄ ဦးကို ဂုဏ်ပြုမှတ်တမ်းလွှာနဲ့ ဆုချီးမြှင့်ပေးအပ်ပွဲအခမ်းအနားကို ဖေဖော်ဝါရီလ ၈ ရက်က ရက္ခိုင်ပြည် လွတ်မြောက်နယ်မြေတနေရာတွင် ပြုလုပ်ပေးခဲ့တာလည်း ဖြစ်ပါတယ်။ “ တယောက်ချင်းဆီကို ဂုဏ်ပြုဆု ငွေသား ၇,၅၀၀၀၀၀ (ခုနှစ်ဆယ့်ငါး) သိန်းကျပ်ကို အာရက္ခပြည်သူ့တော်လှန်ရေးအစိုးရ အာရက္ခအမျိုးသားအမွေအနှစ်ကော်မရှင်က ချီးမြှင့်ခဲ့တာ”  လို့ မြောက်ဦးမြို့ဒေသခံတဦးက ဆိုပါတယ်။ ရှေးဟောင်းရတနာများနဲ့ ငွေဒင်္ဂါးပြားများကို တွေ့ရှိခဲ့သူများမှာ မြောက်ဦးမြို့နေ ဦးနိုင်ဝင်းထွန်းနဲ့ ဒေါ်စိုးစိုးတို့ရဲ့သားဖြစ်သူ မောင်စိုးအောင်မင်း၊ ဦးညီဘုနဲ့ ဒေါ်နုနုယဉ်တို့ရဲ့သားဖြစ်သူ မောင်သုခအောင်၊ ဦးမောင်ကျော်သိန်းရဲ့သားဖြစ်သူ မောင်ဖြိုးမြတ်ဦးနဲ့ ဦးခိုင်ကျော်လင်းရဲ့သားဖြစ်သူ မောင်ကျော်စိုးလင်းတို့ပဲ ဖြစ်ပါတယ်။ အဆိုပါ ငွေဒင်္ဂါးပြားများမှာ ရက္ခိုင်သက္ကရာဇ် (၁၀၀၀) (ဆင်ဖြူသခင်၊ နရပတိကြီးလက်ထက်တွင် အသုံးပြုခဲ့တဲ့ ငွေဒင်္ဂါးပြား ၁၃ ပြား)၊ (ဆင်ဖြူသခင်၊ ဆင်နီသခင် နရပတိကြီးလက်ထက်တွင် အသုံးပြုခဲ့တဲ့ ငွေဒင်္ဂါးပြား ၁၀ ပြား)၊ ရက္ခိုင်သက္ကရာဇ် (၁၀၁၄) (ရွှေနန်းသခင်၊ စန္ဒသုဓမ္မရာဇာ လက်ထက်တွင် အသုံးပြုခဲ့တဲ့ ငွေဒင်္ဂါးပြား ၄၁ပြား)၊ ရက္ခိုင်သက္ကရာဇ် (၁၀၀၇) (ဆင်နီသခင်၊ ဆင်ဖြူသခင် သတိုးမင်းတရား လက်ထက်တွင် အသုံးပြုခဲ့တဲ့ ငွေဒင်္ဂါးပြား ၆၆ပြား)၊ ရက္ခိုင်သက္ကရာဇ် (၁၀၄၇) (ရွှေနန်းသခင်ဝရဓမ္မရာဇာ လက်ထက်တွင် အသုံးပြုခဲ့တဲ့ ငွေဒင်္ဂါးပြား ၁ ပြား)၊ (ဖတ်မရဘဲ လုံးဝ ပျက်စီးနေတဲ့ ငွေဒင်္ဂါးပြား ၁ ပြား) တို့ ဖြစ်တယ်လို့ သိရပါတယ်။ Ref & Photo – APM & ONN