စစ်ကောင်စီ ထိန်းချုပ်နယ်မြေတွေမှာ တက်တူးစီမံကိန်းနဲ့ ဖမ်းဆီးနေ

အာရက္ခတိုင်းမ်စ် (၂၁ ဇန်နဝါရီ ၂၀၂၅)

ရက္ခိုင်ပြည် စစ်ကောင်စီထိန်းချုပ်ထားတဲ့ နယ်မြေတွေမှာ တက်တူးစီမံကိန်း အနေနဲ့ ရက္ခိုင်သူ ရက္ခိုင်သားတွေကို ဖမ်းဆီးမှုတွေ လုပ်နေတယ်လို့ ဒေသခံတွေက အာရက္ခတိုင်းမ်စ်ကို ပြောပါတယ်။

အဲဒီစီမံကိန်းကို အခုရက်ပိုင်းအတွင်း စတင်လုပ်ဆောင်နေတာဖြစ်ပြီး အမျိုးသား၊ အမျိုးသမီး မခွဲခြားဘဲ အကုန်လုံးကို စစ်ဆေးနေတာဖြစ်ပြီး ကြယ်ပွင့်နဲ့ အာရကန်အမှတ်အသား တက်တူးထိုးထားတဲ့ သူတွေဆိုရင် ဖမ်းခေါ်သွားတယ်လို့ စစ်တွေဒေသခံတစ်ဦးက ပြောပါတယ်။

“ပြီးတော့ အိမ်ထောင်စုမှာရှိတဲ့ ယောကျာ်း၊ မိန်းမ အကုန်လုံးကို အင်္ကျီတွေ၊ အနွေးထည်တွေ ချွတ်ခိုင်းတယ်။ လက်မောင်းတို့၊ ကျောကုန်းတို့၊ ပေါင်တို့၊ ဘောင်းဘီအရှည်တွေ ဝတ်ထားရင်လည်း လှန်ပြရတယ်။ ယောကျာ်းဆို ချွတ်ပြရတယ်။ မှင်ထိုးထားလား၊ အာရကန်လို့ ထိုးထားတာ ၃ ယောက်လောက် အဖမ်းခံရတယ်။ ရွာကြီးမြောက်ဘက်မှာ။ ရိုးရိုးထိုးထားရင် ဘာမှမဖြစ်ဘူး။ အာရကန်ဆိုတာနဲ့ ကြယ်ပွင့်တွေ ထိုးထား တယ်ဆိုရင် အဲဒီသူတွေကို ခေါ်သွားတယ်” လို့ စစ်တွေမြို့ဒေသခံတစ်ဦးက အာရက္ခိုင်းမ်စ်ကို ပြောပါတယ်။

အလားတူ ရန်ကုန်ရောက် ရက္ခိုင်လူငယ်တွေကိုလည်း ဧည့်စာရင်းစစ်အကြောင်းပြကာ တက်တူးထိုးထားခြင်း ရှိ မရှိနဲ့ ရက္ခိုင်အမျိုးသားရေး အမှတ်တံဆိပ်တို့ ထိုးထားပါက ငွေညှစ်ခြင်း ဖမ်းဆီးခြင်းများလည်း ပြုလုပ်နေတယ်လို့ ရန်ကုန်ရောက် ရက္ခိုင်စစ်ဘေးရှောင်ပြည်သူတွေက ဆိုပါတယ်။

ရက္ခိုင်ပြည် စစ်တွေမြို့တွင် ဇန်နဝါရီ ၁၈ ရက်နေ့လောက်စပြီး ဧည့်စာရင်းတွေ ပြန်စစ်လာတာဖြစ်ပြီး သွားလာတဲ့ ဒေသခံလူထုတွေကိုပါ စစ်ဆေးမှုတွေ ပြုလုပ်ကြောင်း သိရပါတယ်။

ညမထွက်ရအမိန့်ဟာ ၉ နာရီလို့ ထုတ်ပြန်ထားပေမယ့် ဧည့်စာရင်းစစ်တာကို ည ၇ နာရီလောက်ကတည်းက လာစစ်တာဖြစ်တယ်လို့ စစ်ဆေးခံလိုက်ရတဲ့ စစ်တွေမြို့ဒေသခံတွေက အာရက္ခတိုင်းမ်စ်ကို ပြောပါတယ်။

“ကြိုကြား ကြိုကြားနေရာတွေ စစ်တယ်။ စစ်တဲ့အချိန်မှာ အိမ်က အိမ်ထောင်စုစာရင်းတွေ စစ်တယ်။ ဧည့်စာရင်းစစ်တဲ့ အချိန်ကလည်း ၉ နာရီ ညမထွက်ရ အမိန့်ထုတ်ထားပေမယ့် ၇ နာရီမှာ လာစစ်တယ်။ ၇ နာရီ စွန်းစွန်းလေးပဲ ရှိသေးတယ်။ သွားလာတဲ့လူတွေကိုလည်း စစ်တယ်။ ဆိုင်ကယ်နဲ့သွားရင်လည်း စစ်တယ်။ စက်ဘီးနဲ့ သွားလည်း စစ်တယ်။ အဲဒီအချိန်မှာ ညနေလုပ်ကိုင်စားသောက်နေတဲ့သူတွေက ဆိုင်သိမ်းပြီး ပြန်လာတဲ့ သူတွေ ရှိတယ်လေ။ အဲဒါတွေကို စစ်တယ်” လို့ သူက ပြောပါတယ်။

လက်ရှိတွင် စစ်တွေမြို့မှာ တိုက်ပွဲဖြစ်ပွားနိုင်တဲ့ စစ်ရေးအရိပ်အယောင်တွေကို မြင်တွေ့နေရပြီး စစ်တွေမြို့ရဲ့ ဖွဲစည်းပုံ အနေအထားအရ အာရက္ခတပ်တော်နဲ့ စစ်ကောင်စီတပ်တို တိုက်ပွဲဖြစ်မယ်ဆိုရင် တိုက်ပွဲရှောင်ဖို့အတွက် မလွယ်နိုင်ဘူးလို့ ဒေသခံတွေက သုံးသပ်ထားကြပါတယ်။

စစ်တွေဟာ ရေပတ်လည် ဝိုင်းထားတဲ့အတွက်ကြောင့် တိုက်ပွဲရှောင်ဖို့ မလွယ်သလို ပုဏ္ဏားကျွန်းမြို့နယ်ဘက်ကို သွားတဲ့ လမ်းမှာရှိတဲ့ တံတားကလည်း ချိုးဖျက်ခံထားရပြီး အဝေးပြေးလမ်းကလည်း စစ်ကောင်စီတပ်ရဲ့ နယ်မြေတွေကို ဖြတ်ရမှာဖြစ်လို့ အခက်အခဲတွေ ရှိနေပါတယ်လို့ စစ်တွေမြို့ဒေသခံတွေက ပြောပါတယ်။