ပုဏ္ဏားကျွန်း ဗုံးကြဲခံရတာတွင် သေဆုံးသူ ၅ ဦးထိ ရှိလာ

အာရက္ခတိုင်းမ်စ် (၂၇ မတ် ၂၀၂၅)

ရက္ခိုင်ပြည် ပုဏ္ဏားကျွန်းမြို့နယ် အောင်ဖြူပြင်ရွာကို စစ်ကောင်စီက မတ်လ ၂၅ ရက် ညနေ ရ နာရီခန့်က လေယာဉ်နဲ့ ပေါင် ၅၀၀ ဗုံးတစ်လုံး ကြဲချမှုကြောင့် ဒေသခံပြည်သူ သေဆုံးသူ ၅ ဦး အထိ ရှိလာနေတယ်လို့ ဒေသခံတွေက အာရက္ခတိုင်းမ်စ်ကို ပြောပါတယ်။

“ ကြဲကြဲခြင်းနေ့မှာ ပွဲချင်းပြီး ၃ ယောက် သေတယ်။ နောက်နေ့မှာ တစ်ယောက် ထပ်သေတယ်။ နောက်နေ့မှာလည်း တစ်ယောက်ထပ်သေတယ်။ စုစုပေါင်း ၅ ယောက် ရှိသွားပြီ” လို့ ပုဏ္ဏားကျွန်းမြို့ဒေသခံတစ်ဦးက ပြောပါတယ်။

ပွဲချင်းပြီး သေဆုံးသူများပါ အဆိုပါ ဗုံးကြဲခံခဲ့ရတဲ့ အောင်ဖြူပြင်ရွာကို စစ်ဘေးရှောင်ဖို့ ရောက်နေတဲ့ ပုဏ္ဏားကျွန်းမြို့ လိပ်ကုန်းပြင်ရပ်ကွက်က ဦးသန်းမောင်၊ ဒေါ်မရီ နဲ့ ကိုမောင်သက်နိုင်တို့ ဖြစ်တယ်လို့ သိရပါတယ်။

အဆိုပါ ဗုံးကြဲခံခဲ့ရလို့ ပြည်သူ ၁၄ ဦီးဟာ ဒဏ်ရာရရှိခဲ့ရပြီး ထိုအထဲက ၂ ဦးဟာလည်း ဒဏ်ရာပြင်းထန်လို့ ထပ်မံသေဆုံးခဲ့ရပါတယ်။

“ နောက်ထပ် ဆုံးပါးသွားတာက ကိုရဲလင်းစိုး နဲ့ မအေးမြတ်ဝေ တို့ပဲ ဖြစ်တယ်။ စိုးရိမ်ရတဲ့ ဒဏ်ရာရသူတွေလည်း ရှိနေသေးတယ်။ အသက် အန္တရာယ် စိုးရိမ်နေရတယ်” လို့ ကူညီလုပ်ဆောင်ပေးနေသူတစ်ဦးက အာရက္ခတိုင်းမ်စ်ကို ပြောပါတယ်။

ထပ်မံ သေဆုံးသွားတဲ့ ကိုရဲလင်းစိုးဟာ အသက် ၂၅ နှစ်အရွယ်ရှိပြီး ပုဏ္ဏားကျွန်းမြို့ ယိုးတရုတ်ချောင်ဝရွာကနေ စစ်ဘေးရှောင်နေတဲ့သူတစ်ဦးလည်း ဖြစ်ပါတယ်။ နောက်ထပ် သေဆုံးသွားတဲ့ အရွယ်မရောက်သေးတဲ့ အသက် ၁၅ နှစ်အရွယ် မိန်းကလေးတစ်ဦးပဲ ဖြစ်ပါတယ်။

စစ်ကောင်စီဟာ စစ်ဘေးရှောင်ပြည်သူတွေနေတဲ့ အောင်ဖြူပြင်ရွာက ဘုန်းကြီးကျောင်းကို ရည်ရွယ်ချက်ရှိရှိ ပေါင် ၅၀၀ ဗုံးနဲ့ ကြဲချတာဖြစ်တယ်လို့ ဒေသခံတွေက ဆိုပါတယ်။