အာရက္ခတိုင်းမ်စ် (၁ ဧပြီ ၂၀၂၆)
ရက္ခိုင်ပြည် ကျောက်ဖြူမြို့နယ် ပြားကျွိန်ချောင်း အနီးတွင် အာရက္ခတပ်တော်နဲ့ စစ်ကော်မရှင်တို့ တိုက်ပွဲတွေပြင်းထန်နေပြီး စစ်ကော်မရှင်တပ် အထိနာနေတယ်လို့ စစ်ကူ ထပ်မံပို့ဆောင်နေတယ်လို့ သိရပါတယ်။
“ စစ်တပ်က တပ်တော်ရှိတဲ့ဘက်ကို အင်အား ၁၀၀ လောက်နဲ့ စစ်ကြောင်းထိုးနေတာ။ ပြားကျွိန်ချောင်းနားရောက်တော့ တပ်တော်က ဖြတ်တိုက်တာ သေဆုံးဆုံး၊ ထိခိုက်မှုတွေ များတယ်။ အဲတော့ သိုင်းချောင်းဖက်က စစ်ကူတွေ ထပ်ပို့နေတယ်” လို့ ကျောက်ဖြူမြို့နယ် ဒေသခံတဦးက အာရက္ခတိုင်းမ်စ်ကို ပြောပါတယ်။
ရက္ခိုင်ပြည် ကျောက်ဖြူမြို့နယ်မှာ မတ်လ နောက်ဆုံးအပတ်က တိုက်ပွဲတွေ ငြိမ်သက်နေပြီး မတ်လ ၃၁ ရက်က ပြန်လည် တိုက်ပွဲတွေ ပြင်းထန်လာနေတယ်လို့ သိရပါတယ်။
“ သေတာတော့ ၁၀ ယောက်လောက် ရှိတယ်။ ဒဏ်ရာ ရတဲ့သူတွေကိုတော့ စစ်ကူပို့ခံလိုက်ရတဲ့ တပ်သားတွေက ထမ်းပြီးတော့ နောက်တန်းစခန်းကို ပြန်ပို့ပေးနေတယ်။ ဒီနေ့လည်း တိုက်ပွဲက ဆက်ဖြတ်နေတုန်းပဲ” လို့ သူက အာရက္ခတိုင်းမ်စ်ကို ဆက်ပြောပါတယ်။
စစ်ကော်မရှင်ဟာ မင်းပြင်ကနေ ဝါးနက်ချွိန်ဖက်ကို ထိုးစစ်ဆင်နေသလို သိုင်းချောင်းကနေ ပြားကျွိန်ချောင်းဖက်ကိုလည်း ထိုးစစ်ဆင်နေတယ်လို့ ဒေသခံတွေ ဆိုပါတယ်။
စစ်ရေးအရ အထိနာနေတဲ့ စစ်ကော်မရှင်ဟာ င/အုပ်ရွာနဲ့ ဝမျှောင်ရွာအနီးရှိ တိုက်ခိုက်ရေးနေဗီ (၁) စီးကနေ ကျောက်ဖြူမြို့နယ်အတွင်းရှိ ကျေးရွာတွေကို လက်နက်ကြီးနဲ့ ရည်ရွယ်ချက်ရှိရှိ ပစ်ခတ် တိုက်ခိုက်နေတယ်လို့လည်း သိရပါတယ်။