မာန်အောင်တွင် ဖမ်းဆီးရမိတဲ့ ပစ္စည်းတွေကို စကမ အရာရှိနဲ့ အောက်ခြေတပ်ဖွဲ့များ ခွဲဝေယူနေတဲ့အတွက် ဖမ်းဆီးမှု ပိုတိုးလာ

အာရက္ခတိုင်းမ်စ် (၁၇ အောက်တိုဘာ ၂၀၂၅)

စစ်မကော်ရှင်တပ် ထိန်းချုပ်ထားဆဲဖြစ်တဲ့ ရက္ခိုင်ပြည် မာန်အောင်မြို့မှ ခရီးသွားပြည်သူတွေဟာ အခုလပိုင်းအတွင်း ပိုမိုဖမ်းဆီးခံလာရတဲ့လို့ သတင်းရရှိပါတယ်။

မာန်အောင်ဒေသခံအချို့ဟာ ငါးဖမ်းခွင့်နဲ့ ကုန်ပစ္စည်းများ သယ်ယူခွင့်ကို အနည်းအကျဉ်း ရရှိခဲ့ကြသော်လည်း အခုလပိုင်းအတွင်းမှာ စစ်ကော်မရှင်တပ်က ဖမ်းဆီးမှုကို ပိုမိုလုပ်ဆောင်လာနေတယ်လို့ ဒေသခံတွေက ပြောပါတယ်။

ယခင်က ဖမ်းဆီးရမိတဲ့ စက်လှေတွေကို စစ်ကော်မရှင် အရာရှိတွေကသာ လက်ဝါးကြီးအုပ် ယူခဲ့ကြပြီး ယခုလပိုင်းတွင် ဖမ်းဆီးသူနဲ့ အမိန့်ပေးစေခိုင်းသူတို့က အညီအမျှ ခွဲဝေ ယူနေကြတဲ့အတွက် ဖမ်းဆီးဖို့အတွက်ကို ပိုမိုစိတ်ဝင်စားလာကြတယ်လို့ မာန်အောင်ဒေသခံ တစ်ဦးက ဆိုပါတယ်။

“ အရင်ကထက် ဖမ်းဆီးမှု ပိုများလာတယ်ဆိုတာက အရင်က ဆိုရင် ဖမ်းဆီးရမိတဲ့ ဘုတ်တွေမှာ ပါလာတဲ့ ပစ္စည်းတွေကို အရာရှိတွေကပဲ ယူတယ်။ အခုက အဲ့လိုမဟုတ်တော့ဘူး ဥပမာ ပြောရရင် ရုံးမှာနေတဲ့သူက နေဗီက တပ်ဖွဲ့ဝင်တွေကို ဖမ်းဖို့ခိုင်းတယ်။ ဖမ်းလို့ ရလာတဲ့ ပစ္စည်းတွေက ရုံးကလူတွေနဲ့ ဖမ်းဆီးတဲ့သူတွေက အညီအမျှခွဲဝေကြတယ်။ အဲ့လိုမျိုး လုပ်နေတဲ့အတွက် ဖမ်းဆီးသူတွေလည်း သူတို့စားရတော့ ပိုမိုစိတ်ဝင်စားလာတာပေါ့” လို့ အာရက္ခတိုင်းမ်စ်ကို ဆိုပါတယ်။

မာန်အောင်ဒေသခံတချို့ဟာ ရမ်းဗြဲဖက်နဲ့ မာန်အောင်ကျွန်းကို ကုန်သွယ်မှုပြုလုပ်နေကြပြီး စစ်ကော်မရှင်တပ်ရဲ့ ဖမ်းဆီးခြင်းကို မကြာခဏ ခံနေရတယ်လို့ ဆိုပါတယ်။

အဲ့လိုမျိုး ဖမ်းဆီးနေတဲ့အပြင် မာန်အောင်ကျွန်းတစ်ခုလုံးကို စစ်ကော်ရှင်တပ်က ဝန်းရံပိတ်ဆို့ခြင်းကိုလည်း ခံနေရပါတယ်။

ဒါ့အပြင် စစ်တွေမြို့အနီး ပင်လယ်ပြင်မှာရှိတဲ့ စစ်ကော်မရှင်တပ်ရဲ့ ရေယာဉ်တွေကလည်း ဒေသခံ ငါးဖမ်းစက်လှေတွေကို ဖမ်းဆီးမှု ပြုလုပ်နေပါတယ်။

စစ်တွေမြို့ရဲ့ အရှေ့ဖက်မှာရှိတဲ့ ပေါက်တောမြို့နယ် ဖရုံကာကျွန်းမှ ပြည်သူတွေဟာ ရေလုပ်ငန်းကိုပဲ အဓိက အားထား လုပ်ကိုင်ခဲ့ကြတာပါ။

ဒါပေမဲ့ ယခုနှစ် မိုးရာသီအတွင်း ဘင်္ဂလားပင်လယ်ပြင်နှင့် ကုလာတန်းမြစ်အတွင်း ငါးဖမ်းနေကြတဲ့ အလယ်ဖရုံကာကျွန်းနဲ့ အနောက်ဖရုံကာကျွန်းမှ ဒေသခံ ၂၀ နီးပါးကို စစ်ကော်မရှင်တပ်က ဖမ်းဆီးထောင်ချခဲ့တယ်လို့ မွတ်ဆလင်တစ်ဦးက ဆိုပါတယ်။

“ ဒီမြစ်မှာ ငါးဖမ်းတဲ့ သူတွေကိုမြင်ရင် သူတို့ နေဗီက လာဖမ်းသွားတယ်။ ပြီးတော့ ငါးခိုးဖမ်းတဲ့ အမှုအပြင် ကျနော်တို့ မွတ်ဆလင်တွေကိုဆိုရင် လဝက အမှုနဲ့ပါ ဖမ်းဆီးစွဲဆိုပြီးတော့ ထောင် ၃ နှစ်ချတယ်။ အခုဆိုရင် ကျနော်တို့ဟာ ပင်လယ်ပြင်ကိုတောင် မထွက်ရဲ့တော့ဘူး” လို့ အာရက္ခတိုင်းမ်စ်ကို ဆိုပါတယ်။

ဒီလိုမျိုး ဖမ်းဆီးမှုတွေကို ပြုလုပ်နေကြတဲ့အတွက် ဒေသခံပြည်သူများမှာ လုပ်ကိုင်စားသောက်ရန် အဆင်မပြေဘဲ အလုပ်လက်မဲ့များ ပိုတိုးလာနေတယ်လို့ ဆိုပါတယ်။