အာရက္ခတိုင်းမ်စ် (၂၁ ဒီဇင်ဘာ ၂၀၂၅)
စစ်ကော်မရှင်ခေါင်းဆောင် ကျင်းပပြုလုပ်မယ့် ရွေးကောက်ပွဲမှာ စစ်ဗိုလ်၊ အရာရှိဟောင်းတွေ၊ လက်ရှိ တာဝန်ယူနေတဲ့သူတွေ ပါဝင်တဲ့ ကြံ့ဖွံ့ပါတီသာ အမတ်တွေ ဖြစ်ခဲ့မယ်ဆိုရင် လူထုကို ဖိနှိပ်ဖို့ပဲ ရှိမှာလို့ တရုတ်-မြန်မာအရေးလေ့လာသုံးသပ်သူ ဒေါက်တာလှကျော်ဇောက အာရက္ခတိုင်းမ်စ်ကို ပြောပါတယ်။
“ကျမ ကြည့်နေတာ အဲဒီ ရွေးကောက်ပွဲဝင်မယ့် ကြံ့ခိုင်ဖွံ့ဖြိုးရေးက လူတွေ ဘာတွေ ဆိုတာ နာမည်ပျက်တွေနဲ့။ တော်တော် ဆိုးဆိုးဝါးဝါးတွေ လုပ်ထားဖူးတဲ့ ဟာတွေ။ အဲဒီတော့ ဒီလူတွေက အမတ်တွေဖြစ်လည်း ပြည်သူလူထုကို ဖိနှိပ်ဖို့ပဲ ရှိမှာ။ ပြည်သူလူထု ကောင်းကျိုး လုပ်စရာ အကြောင်းမရှိဘူး။ ပြည်သူလူထုကို တော်လှန်ရေးလမ်းပေါ်တောင် ပိုပြီး မောင်းတင်ပေးသလို ဖြစ်မှာ” လို့ သူက ပြောပါတယ်။
ကြံ့ဖွံ့ပါတီ ဥက္ကဋ္ဌ ဦးခင်ရီဟာ နိုဝင်ဘာလတုန်းက မဲဆွယ်စည်းရုံးစဉ် အကြမ်းဖက်သောင်းကျန်းသူတွေ ပိုများလာတာကြောင့် အစိုးရသစ်ဟာ တပ်နဲ့ ကျောချင်း ရင်ချင်းကပ် မဆောင်ရွက်နိုင်ရင် နောက်နေ့မှာ အဲဒီ အစိုးသစ်က ပြုတ်ကျမှာ ဖြစ်တယ်ဆိုပြီး ပြောခဲ့တာပါ။
အဲဒီလို အရည်အချင်းတွေ အားလုံးနဲ့ ကိုက်ညီတာဟာလည်း သူတို့ ကြံ့ဖွံ့ပါတီသာ ရှိကြောင်းနဲ့ သူတို့ကိုပဲ မဲပေးဖို့ဆိုပြီး ပြောခဲ့တာ ဖြစ်ပါတယ်။
သူရဲ့ ပြောဆိုမှုဟာ ဒီမိုကရေစီနဲ့ ဆန့်ကျင်နေပြီး ခြိမ်းခြောက်တဲ့ သဘောမျိုး ဖြစ်နေတယ်လို့လည်း နိုင်ငံရေးလေ့လာသုံးသပ်သူတွေက ထောက်ပြကြပါတယ်။
လက်ရှိမှာတော့ စစ်ကော်မရှင်က ကျင်းပမယ့် ရွေးကောက်ပွဲ အပိုင်း (၁) ဟာ ဒီဇင်ဘာ ၂၈ ရက်နေ့မှာ ပြုလုပ်မှာ ဖြစ်ပေမယ့် ကြံ့ဖွံ့ပါတီကလွဲပြီး တခြားပါတီတွေက မဲဆွယ်စည်းရုံးရေးတွေမှာ အခက်အခဲတွေ ရှိနေတာပါ။
ဒါ့အပြင် ရွေးကောက်ပွဲ အပိုင်း (၁) က မဲဆန္ဒနယ် ၂၇ ခုမှာ ကြံ့ဖွံ့ပါတီကလွဲပြီး တခြားပါတီတွေက ပြိုင်သူမဲ့ ဖြစ်နေတဲ့အတွက် မပြိုင်ခင်ကတည်းကလည်း ကိုယ်စားလှယ်လောင်း ၂၈ ဦးက အနိုင်ရနေတဲ့ အခြေအနေပဲ ဖြစ်ပါတယ်။
ကြံ့ဖွံ့ပါတီဟာ နိုင်ငံတစ်ဝန်း မဲဆန္ဒနယ်တွေမှာ ကိုယ်စားလှယ်လောင်း ထောင်ကျော်နဲ့ အများဆုံး ဝင်ရောက်ယှဉ်ပြိုင်တဲ့ ပါတီလည်း ဖြစ်ပါတယ်။