အာရက္ခတိုင်းမ်စ် (၆ ဇန်နဝါရီ ၂၀၂၆)
ရက္ခိုင်ပြည်၊ ငပလီမြို့၊ လင်းသာရပ်ကွက် ဗုံးကြဲမှုဖြစ်စဉ်မှ အသက် ၅၀ ကျော် အမျိုးသားတဦး ထပ်မံသေဆုံးသွားခဲ့တယ်လို့ ဒေသခံတွေက ဆိုပါတယ်။
အဆိုပါ သေဆုံးသူဟာ အသက် ၅၄ နှစ်အရွယ်ရှိ ဦးဝင်းနိုင်ဆိုသူဖြစ်ပြီး မနေ့က ဇန်နဝါရီလ ၅ ရက်၊ ည ၇နာရီခန့်မှာ သေဆုံးခဲ့တာ ဖြစ်တယ်လို့ သိရပါတယ်။
ငပလီမြို့ရှိ လင်းသာရပ်ကွက်၊ ကျင်းကန်ကြီးကို ဒီဇင်ဘာ ၂၉ ရက်၊ ည ၈ နာရီမှာ စစ်ကော်မရှင်က လေကြောင်းက နှစ်ကြိမ်တိုင်တိုင် ပေါင် (၅၀၀) ဗုံး လေးလုံးကို ကြဲချခဲ့တာ ဖြစ်ပါတယ်။
လက်ရှိအချိန်အထိ အဆိုပါ ဖြစ်စဉ်အတွင်း အသက် ၄ နှစ် မှ အသက် ၅၄ နှစ်အရွယ်ရှိ ကျား ခြောက်ဦး နဲ့ မ လေးဦး စုစုပေါင်း ဆယ်ဦး သေဆုံးခဲ့ပါတယ်။ သေဆုံးသူတွေအနက် မိသားစု ငါးဦးစလုံး သေဆုံးခဲ့ကြရသူတွေလည်း ပါဝင်တယ်လို့ သိရပါတယ်။
အသက် ၃နစ်အရွယ်ရှိ အေးသန္တာခိုင်ကိုတော့ ဗုံးကြဲခံရမှုဖြစ်စဉ်ပြီး ၁၂ နာရီအကြာမှာ ကယ်ထုတ်နိုင်ခဲ့ပြီး ကလေးငယ်ရဲ့မိခင်ဖြစ်သူဟာ ဗုံးကြဲမှုဖြစ်စဉ်မှာ သေဆုံးခဲ့သလို ဖခင်ဖြစ်သူကတော့ ပြင်းထန်ဒဏ်ရာရရှိခဲ့တယ်လို့ ငပလီကမ်းခြေ စုပေါင်းပရဟိတအဖွဲ့က ထုတ်ပြန်ထားပါတယ်။