အာရက္ခတိုင်းမ်စ် (၁၈ ဇန်နဝါရီ ၂၀၂၆)
ရက္ခိုင်ပြည်၊ ကျောက်ဖြူမြို့ရှိ ကျောက်ကလေရွာကို စစ်ကော်မရှင်က လေကြောင်းတိုက်ခိုက်ခဲ့တာကြောင့် လူထိခိုက်သေဆုံးကာ နေအိမ်များ ပျက်စီးခဲ့တယ်လို့ ဇင်ချောင်းလူငယ်ပရဟိတအသင်းက ဆိုပါတယ်။
အဆိုပါ တိုက်ခိုက်မှုဟာ ဇန်နဝါရီ ၁၇ ရက်၊ ည ၁၂ နာရီ ၅မိနစ်ခန့်မှာ ဖြစ်ပွားခဲ့တာဖြစ်ပြီး စစ်ရှောင်တွေ နေထိုင်တဲ့နေရာကို စကော်မရှင်က ဂျက်ဖိုင်ဒါနဲ့ နှစ်ကြိမ်၊ အသေခံဒရုန်းနဲ့ နှစ်ကြိမ် အပြင် စကော်မရှင် ရေတပ်ကပါ ဆယ်ကြိမ်ကျော် တိုက်ခိုက်ခဲ့တာ ဖြစ်တယ်လို့ သိရပါတယ်။
ဗုံးကြဲတိုက်ခိုက်မှုကြောင့် အသက် ၃၀ အရွယ်ရှိ ပျားတဲရွာဒေသခံ ဒေါ်မစံရွှေ နဲ့ အသက် ၄၀ အရွယ်ရှိ မင်းတက်တောင်ရွာဒေသခံ ဒေါ်ခင်စန်းဦးတို့ သေဆုံးခဲ့သလို အမျိုးသားတဦးနဲ့ အမျိုးသမီးတဦးလည်း ထိခိုက်ဒဏ်ရာရရှိခဲ့ပြီး အသက် ၉၀ကျော်အရွယ် အဖွားတဦးကတော့ စိုးရိမ်ရတဲ့ အခြေနေမှာ ရှိတယ်လို့ ဇင်ချောင်းလူငယ်ပရဟိတအသင်းရဲ့ တာဝန်ရှိသူတဦးက ဆိုပါတယ်။
အဆိုပါတာဝန်ရှိသူတဦးက “ ဟုတ်ကဲ့ ပထမဆုံးအကြိမ်ပါ။ အရင်တုန်းကတော့ နေဗီက မကြာမကြာ အပစ်ခံရပါတယ်။ ကျနော်တို့ကတော့ ခုလက်ရှိ စစ်ရှောင်အရေးနဲ့ ပတ်သက်ပြီးတော့ တောက်လျောက် ကူညီပေးနေပါတယ်။ ပြည်သူတွေကို ရည်ရွယ်ပြီး လက်နက်မျိူးစုံနဲ့ ပစ်နေတာကိုတော့ ကျနော်တို့အနေနဲ့ ကန့်ကွက် ရှုချပါတယ်။ စစ်ရှောင်တွေဆိုတာ အိုးအိမ်စွန့်ခွာပြီး လာရတာပါ။ ခုက အသက်တွေပါ ပေးနေရတော့ ကျနော်တို့ ကူညီနေသူတွေအနေနဲ့ စိတ်မကောင်းများစွာ ဖြစ်ရပါတယ်” လို့ အာရက္ခတိုင်းမ်စ်ကို ပြောပါတယ်။
စကော်မရှင်ကြောင့် လူထိခိုက်သေဆုံးခဲ့တဲ့အပြင် စစ်ရှောင်နေအိမ် ၁၀ အိမ်ကျော်လည်း ပျက်စီးခဲ့ပြီး နွား ၉ ကောင်လည်း သေဆုံးခဲ့ရပါတယ်။