မြောက်ဦးမြို့ ရှမ်းတောင်(မူဆလင်) ရွာတွင် လူသတ်မှုဖြစ်ပွား၊ လူသတ်တရားခံ ၂ ဦးကို ဒီလပ်ဖမ်းဆီး

အာရက္ခတိုင်းမ်စ် (၁ မေ ၂၀၂၆)

ရက္ခိုင်ပြည် မြောက်ဦးမြို့နယ် ရှမ်းတောင် (မူဆလင်) ကျေးရွာတွင် လူသတ်မှုတခုဖြစ်ပွားခဲ့ပြီး လူသတ်တရားခံ ၂ ဦးကို DLEPS တပ်ဖွဲ့က ဖမ်းဆီးထားတယ်လို့ အာရက္ခမှုခင်းနဲ့ ဆက်စပ်သတင်းများ ထုတ်ပြန်ရေးအဖွဲ့က ‌ဧပြီလ ၃၀ ရက်တွင် ထုတ်ပြန်ခဲ့ပါတယ်။

အသတ်ခံရသူမှာ ရှမ်းတောင် (မူဆလင်) ကျေးရွာနေ အသက် ၆၂ နှစ်အရွယ် ဦးတော်ယူဖာခါပလာတူး ဆိုသူဖြစ်ပြီး လူသတ်တရားခံ ၂ ဦးကတော့ ရှမ်းတောင် (မူဆလင်) ကျေးရွာနေ အသက် ၂၁ နှစ်အရွယ် ချောရီဟူဆောင်း နဲ့ အသက် ၁၉နှစ် အရွယ် အာဒူဟာဘီ တို့ဖြစ်တယ်လို့ သိရပါတယ်။

ဖြစ်စဉ်မှာ ၂၀၂၆ ခုနှစ် ဧပြီလ ၂၀ ရက် ညနေ ၆ နာရီခန့်တွင် လူသတ်တရားခံ ၂ ဦးဟာ မြောက်ဦးမြို့နယ်၊ ဥက္ကာကျော်ကျေးရွာအုပ်စု ဘောက် (ရက္ခိုင်) ကျေးရွာရှိ ဦးအောင်ကျော်မြ(ခ)ပြားချေရဲ့ အရက်ဆိုင်တွင် သောက်စားနေရာမှာ အချင်းချင်း စကားများကြတာကို အဆိုပါဆိုင်တွင် အရက်သောက်‌နေတဲ့ ဦးတော်ယူဖာခါပလာတူးက ဝင်ရောက်ဟန့်တားရာ အသတ်ခံခဲ့ရတဲ့ ဦးတော်ယူဖာခါပလာတူးနဲ့ ထပ်မံ စကားများကြတယ်လို့ သိရပါတယ်။

စကားများပြီးနောက်မှာတော့ ဦးတော်ယူဖာခါပလာတူးဟာ ဆိုင်ကနေ အိမ်ပြန်ရာတွင် လူသတ်တရားခံ ၂ ဦးဖြစ်တဲ့ ချောရီဟူဆောင်းနဲ့ အာဒူဟာဘီတို့လည်း နောက်မှ လိုက်ပါလားပြီး အရက်ဆိုင်တွင် စကားများခဲ့တာကို မကြေနပ်လို့ ဘောက် (ရက္ခိုင်) ရွာ အပြင်ဘက် လယ်ကွင်းအရောက်တွင် ဝိုင်းထိုးကန်ကျောက်ခဲ့ရာ ဦးတော်ယူဖာခါပလာတူးမှာ အဆိုပါနေရာတွင် ထိုးကြိတ်ဒဏ်ရာများနဲ့ သတိမေ့မျော သေဆုံးခဲ့တယ်လို့ သိရပါတယ်။

အဆိုပါ လူသတ်မှုကို ဥပဒေအရ အရေးယူ ဆောင်ရွက်‌ပေးရန် ဦးတော်ယူဖာခါပလာရဲ့ သားဖြစ်သူ မိုဟာမတ်တာဟတ်က ဧပြီလ ၂၁ ရက် နံနက်ပိုင်းတွင် နီးစပ်ရာ DLEPS စခန်းကို တိုင်ကြားလာလို့ ရာဇသတ်ကြီးပုဒ်မ – ၃၀၂ နဲ့ အမှုဖွင့် ဆောင်ရွက်ခဲ့တယ်လို့ သိရပါတယ်။

လူသတ်တရားခံများကို DLEPS တပ်ဖွဲ့က လိုက်လံရှာဖွေ ဖမ်းဆီးရာ တရားခံများဖြစ်တဲ့ ချောရီဟူဆောင်းကို နေ့လည် ၂ နာရီခွဲ အချိန်တွင်လည်းကောင်း၊ အာဒူဟာဘီကို ည ၁၀ နာရီခွဲ အချိန်တွင် အသီးသီး ဖမ်းဆီးရခဲ့ပြီး တရားခံများကို DLEPS ဌာနရဲ့ လုပ်ထုံးလုပ်နည်းများ၊ ဥပဒေ အကြံပြုချက်များနဲ့အညီ ဆောင်ရွက်နေတယ်လို့ သိရပါတယ်။