လူဦးရေ အလွန်လျော့နည်းလာတာကို သက်လူမျိုးတွေအနေနဲ့ သတိပြုရမယ်လို့ ရက္ခိုင်ပြည်ကျောင်းသားသမဂ္ဂဆို

အာရက္ခတိုင်းမ်စ် (၁ မေ ၂၀၂၆)

ရက္ခိုင်ပြည်ရဲ့ မျိုးနွယ်စုဝင်များထဲတွင် ဒီကနေ့အချိန်မှာ သက်အမျိုးသားများဟာ လူဦးရေအရ အလွန်လျော့နည်းလာခြင်းဟာ ရက္ခိုင်ပြည် မျိုးနွယ်စုများအပြင် သက်လူမျိုးများ သတိပြုရမယ့်အချက်ဖြစ်တယ်လို့ ရက္ခိုင်ပြည်ကျောင်းသားသမဂ္ဂက ဆိုပါတယ်။

“ရက္ခိုင်ပြည်တွင် သက်အမျိုးသားများဟာ ရှေးယခင်ကတည်းက အစောဆုံးနေထိုင်ခဲ့ကြတဲ့ မျိုးနွယ်စုဝင်ဖြစ်တဲ့အပြင် ရက္ခိုင်ပြည်ရဲ့ အခြားသော ညီနောင်မျိုးနွယ်စုများနဲ့အတူ တိုင်းပြည်တိုးတက်ရေးကို အတူတကွ လုပ်ဆောင်လာခဲ့ကြတဲ့ လူမျိုးများ ဖြစ်ပါတယ်” လို့ ရက္ခိုင်ပြည်ကျောင်းသားသမဂ္ဂက မေလ ၁ ရက်မှာ ကျရောက်တဲ့ သက်အမျိုးသားနေ့ သဝဏ်လွှာမှာ ဆိုပါတယ်။

အလားတူ ရက္ခိုင်ပြည်တွင် နေထိုင်လာခဲ့ကြတဲ့ မျိုးနွယ်စုဝင်ဘိုးဘေးများဟာလည်း မိမိတို့ရဲ့ စာပေ၊ ယဉ်ကျေးမှု၊ ဓလေ့ထုံးတမ်းများနဲ့ စိန်ခေါ်မှုအခက်အခဲများကို ညီနောင်မျိုးနွယ်စုများ အားလုံးအတူတကွ လက်တွဲကျော်လွှားပြီး နောင်လာမယ့် မျိုးဆက်သစ်များတိုင်အောင် ကောင်းမွေများ လက်ဆင့်ကမ်းပေးခဲ့နိုင်ရန်မှာ ညီနောင်သက်လူမျိုးများအပါအဝင် ရက္ခိုင်ပြည်သူတရပ်လုံးရဲ့ တာဝန်ပင်ဖြစ်တယ်လို့ မိမိတို့ ရက္ခိုင်ပြည်ကျောင်းသားသမဂ္ဂက ခံယူထားတယ်လို့လည်း ဆိုပါတယ်။

မေလ ၁ ရက် တွင်ကျရောက်တဲ့ ၄ ကြိမ်မြောက် သက်အမျိုးသားနေ့ကို မိမိတို့ ရက္ခိုင်ပြည်ကျောင်းသားသမဂ္ဂမှ ရက္ခိုင်ပြည်သူတရပ်လုံးနဲ့ထပ်တူ ဝမ်းမြောက်ဂုဏ်ယူစွာနဲ့ ဂါရဝပြုတန်ဖိုးထား ဂုဏ်ပြုကြိုဆိုပါတယ်လို့လည်း ဆိုပါတယ်။

ရက္ခိုင်မျိုးနွယ်စုများဖြစ်ကြတဲ့ ရက္ခိင်၊ မြို၊ ခမီ၊ သက်၊ မရမာကြီး၊ သက္ကမ (ခ) ဒိုင်းနက်နဲ့ ကမန်စတဲ့ မျိုးနွယ်စု ၇ စု ရှိပြီး အဲဒီထဲမှာ သက်လူမျိုးဟာ လူဦးရေအနည်းဆုံး ကျန်ရှိနေတဲ့ ရက္ခိုင်မျိုးနွယ်စု တခု လည်းဖြစ်ပါတယ်။