အာရက္ခတိုင်းမ်စ် (၄ အောက်တိုဘာ ၂၀၂၆)
ရက္ခိုင်ပြည်၊ မြောက်ဦးမြို့နယ်မှာ ပမာဏ ၅ အဆင့်ရှိ အင်အား အသင့်အတင့်ရှိတဲ့ မြေငလျင်တစ်ခု လှုပ်ခတ်ခဲ့တယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနက ထုတ်ပြန်ထားပါတယ်။
အဆိုပါ ငလျင်လှုပ်ခတ်မှုဟာ ဒီကနေ့ အောက်တိုဘာလ ၄ ရက်၊ မနက်အစောပိုင်း ၁၂ နာရီ၊ ၄၂ မိနစ်နဲ့ ၄၇ စက္ကန့်မှာ လှုပ်ခတ်ခဲ့တာ ဖြစ်ပါတယ်။
“လှုပ်တယ်။ ၁၂ နာရီလောက်မှာ၊ ဘာမှတော့ အထိအခိုက် အပျက်အစီး မရှိပါဘူး” လို့ မြောက်ဦးမြို့နယ်ဒေသခံတစ်ဦးက အာရက္ခတိုင်းမ်စ်ကို ပြောပါတယ်။
စစ်တွေမြို့ မြေငလျင်စခန်း အရှေ့မြောက်ဘက် ၅၆ မိုင်ခန့် ကွာဝေးတဲ့ ရက္ခိုင်ပြည်၊ မြောက်ဦးမြို့ရဲ့ အရှေ့-အရှေ့မြောက်ဘက် (၂၃ မိုင်ခန့်အကွာ)၊ မြောက် လတ္တီတွဒ် (၂၀ ဒသမ ၆၇) ဒီဂရီ၊ အရှေ့လောင်ဂျီတွဒ် (၉၃ ဒသမ ၅၃) ဒီဂရီ၊ အနက် (၁၀) ကီလိုမီတာကို ဗဟိုပြုပြီး လှုပ်ခတ်ခဲ့တာ ဖြစ်တယ်လို့လည်း ထုတ်ပြန်ချက်အရ သိရပါတယ်။