တောင်ကုတ်ကို စစ်ကောင်စီ ဗုံးကြဲ၊ စစ်ရှောင် ၂ ဦးသေ၊ ၂၀ ခန့် ဒဏ်ရာရ

တောင်ကုတ်ကို စစ်ကောင်စီ ဗုံးကြဲ၊ စစ်ရှောင် ၂ ဦးသေ၊ ၂၀ ခန့် ဒဏ်ရာရ

အာရက္ခတိုင်းမ်စ် ( ၂ ဒီဇင်ဘာ ၂၀၂၄)

ရက္ခိုင်ပြည် တောင်ကုတ်မြို့နယ် ခရိုင်ကျေးရွာအုပ်စုကို စစ်ကောင်စီက မနေ့က (၁ ဒီဇင်ဘာ) ညနေပိုင်းတွင် လေယာဥ◌်ဖြင့် ဗုံးလာရောက်ကြဲသဖြင့် စစ်ဘေးရှောင်ပြည်သူ ၂ ဦး နဲ့ ဒဏ်ရာရရှိခဲ့သူ ၂၀ ဦးထက်မနည်း ရှိခဲ့ကြောင်း သိရပါတယ်။

“ ပွဲချင်ပြီး သေသွားတာက တောင်ကုတ်မြို့ပေါ်က စစ်ရှောင်လာကြသူတွေ၊ ဒဏ်ရာရတာမှာတော့ ခရိုင်က ဒေသခံတွေလည်း ပါတယ်။ လူ ၂၀ တော့ အနည်းဆုံးပဲ။ ဒဏ်ရာရသွားတာကလေ အိမ်တွေဆိုလည်း ရစရာတောင်မရှိဘူး။ ပြာနီးပါးကို ဖြစ်သွားတာ” လို့ ဒေသခံတစ်ဦးက အာရက္ခတိုင်းမ်စ်ကို ပြောပါတယ်။

ရက္ခိုင်ပြည် တောင်ကုတ်မြို့ကို အာရက္ခတပ်တော်မှ နိုဝင်ဘာလ ၂၄ရက်က အလုံးစုံ သိမ်းပိုက်လိုက်ပြီး ကျန်ရှိနေသော စကခ (၅) ဌာနချုပ် နဲ့ စကခ (၅) လက်အောက်ခံ တပ်ရင်းဖြစ်တဲ့ ခမရ (၃၄၆) နဲ့ ခမရ (၅၄၄) တပ်ရင်းဌာနချုပ် စခန်းကို ဆက်လက် ထိုးစစ်ဆင်နေကြောင်း သိရပါတယ်။

“ မနေ့က (၁ ဒီဇင်ဘာ) ညနေ ၄ နာရီ မတီးခင်မှာ လာကြဲသွားတာ၊ ၄ လုံးလား ၅ လုံးလားကို နသိလိုက်ဘူး။ ဆက်တိုက်ကို ကြဲသွားတာ” သူက ထပ်မံ ဆိုပါတယ်။

စစ်ကောင်စီရဲ့ ဗုံးကြဲမှုကြောင့် သေဆုံးသွားသူများမှာ တောင်ကုတ်မြို့ပေါ်က စစ်ဘေးတိမ်းရှောင်လာသူ မောင်ကျော်သက်နိုင် (၁၇ နှစ်) နဲ့ ဒေါ်မသိန်း (၇၁ နှစ်) ဖြစ်ကြောင်း သိရပါတယ်။

တောင်ကုတ်မြို့အခြေစိုက် အဓိကစခန်းကြီးများဖြစ်ကြတဲ့ စကခ (၅) တပ်မဌာနချုပ် နှင့် စကခ (၅) လက်အောက်ခံတပ်ရင်းများဖြစ်ကြသော ခမရ (၃၄၆) နှင့် ခမရ (၅၄၄) တပ်ရင်းဌာနချုပ် စခန်းများကိုလည်း တစ်ပြိုင်နက်တည်း ထိုးစစ်ဆင် တိုက်ခိုက်နေပြီလို့ အာရက္ခတပ်တော်က ဆိုပါတယ်။

ပြီးခဲ့တဲ့ စက်တင်ဘာလထဲမှာတင် ရက္ခိုင်ပြည်မှာ စစ်ကောင်စီရဲ့ လေကြောင်းဗုံးကြဲမှုကြောင့် လူ ၉၃ ဦး သေဆုံးပြီး ၆၆ ဦး ဒဏ်ရာ ရခဲ့ပါတယ်။

ထို့အတူ အောက်တိုဘာလရဲ့ လေကြောင်းတိုက်ခိုက်တာတွေကို ကြည့်မယ်ဆိုရင်လည်း စစ်ကောင်စီဟာ တစ်နေ့ကို တစ်မြို့နယ်နှုန်းနဲ့ ဗုံးကြဲနေတာကို တွေ့ရပါတယ်။

အောက်တိုဘာ ၇ ရက်နေ့မှာ တောင်ကုတ်၊ ၈ ရက်နေ့မှာ ပေါက်တော၊ ၉ ရက်နေ့မှာ ဂွ၊ ၁၀ ရက်နေ့မှာ ကျောက်တော်၊ ၁၁ ရက်နေ့မှာ အမ်းမြို့နယ်တွေကို လေယာဉ်နဲ့ ဗုံးကြဲခဲ့တာပါ။

အောက်တိုဘာ ၇ ရက်နေ့ကနေ အောက်တိုဘာ ၁၃ ရက်နေ့အထိ စစ်ကောင်စီ လေကြောင်းဗုံးကြဲတိုက်ခိုက်ခဲ့လို့ အပြစ်မဲ့အရပ်သားပြည်သူ ၁၈ ဦး သေဆုံးပြီး ၃၂ ဦးအထိ ဒဏ်ရာ ရရှိခဲ့ပါတယ်။