ဂွနဲ့ တောင်ကုတ်ပြီးရင် စစ်တွေကို ထိုးစစ်ဆင်လာနိုင်

၂၀၂၄ ခုနှစ်၊ ဒီဇင်ဘာ ၆

ရက္ခိုင်ပြည်မှာ စစ်ကောင်စီတပ် အလုံးစုံ ချုပ်ငြိမ်းရေးဆိုတဲ့ အာရက္ခတပ်တော်ရဲ့ ရည်မှန်းချက်ကြောင့် လက်ရှိ ​မြို့သိမ်းတိုက်ပွဲ လုပ်နေတဲ့ ဂွနဲ့ တောင်ကုတ်ပြီးရင် စစ်တွေကို အာရက္ခတပ်တော်က ထိုးစစ်ဆင်လာနိုင်တယ်လို့ စစ်ရေးနဲ့ နိုင်ငံရေး လေ့လာတဲ့သူတချို့က သုံးသပ်နေကြပါတယ်။

လက်ရှိမှာ အာရက္ခတပ်တော် အေအေက ရက္ခိုင်တပြည်လုံးမှာရှိတဲ့ မြို့နယ် ၁၇ မြို့မှာ ၁၁ မြို့ကို သိမ်းပိုက်ထားပြီးပြီဖြစ်သလို မောင်တော၊ အမ်း၊ တောင်ကုတ်နဲ့ ဂွမြို့တွေကိုလည်း သိမ်းပိုက်နိုင်ဖို့အတွက် ထိုးစစ်ဆင်နေပါတယ်။

ကျန်တဲ့ စစ်တွေ၊ ကျောက်ဖြူနဲ့ မာန်အောင်မြို့ ဒီမြို့ ၃ မြို့မှာဆိုရင် မာန်အောင်က သီးခြားကျွန်းတစ်ခုအနေနဲ့ ရှိနေတာကြောင့် မာန်အောင်ကို လွှတ်ထားနိုင်ပြီး ကျောက်ဖြူကလည်း တရုတ်ရဲ့ လုံခြုံရေးတပ်နဲ့ စစ်ကောင်စီတို့ ပူးပေါင်းပြီးတော့ ကာကွယ်နေတဲ့အတွက်ကြောင့် စစ်တွေကိုပဲ အရင်သိမ်းနိုင်မယ့် အခြေအနေ ရှိနေတယ်လို့ နိုင်ငံရေး လေ့လာသုံးသပ်သူ ဦးကြီးမြင့်က ပြောပါတယ်။

“ရက္ခိုင်တပ်မတော်ကတော့ ရက္ခိုင်တပြည်လုံးကို သိမ်းမယ်။ ဘယ်သူလာပြောပြော ဘာပဲဖြစ်ဖြစ် ရက္ခိုင်တပြည်လုံးကို သိမ်းပိုက်မယ်။ ရက္ခိုင်နယ်မြေမှာ ဘယ်စစ်တပ်မှ မရှိရဘူး။ သူတို့အုပ်ချုပ်မယ် အတိအလင်း ကြေညာပြီးသား။ ဒါ့ကြောင့်မို့လို့ အနှေးနဲအမြန်ပေါ့နော် တရုတ်ရဲ့ မအလကို မီးကုန်ယမ်းကုန် ကူညီမယ်ဆိုတဲ့ အနေအထားအရ ကျောက်ဖြူနဲ့ စစ်တွေကို တရုတ်ကပါ ဝင်ရောက်ပြီးတော့ ကူညီမယ့်သဘော ရှိတယ်။ ကျောက်ဖြူဆိုရင် တရုတ်လုံခြုံရေးအဖွဲ့တွေနဲ့ မအလနဲ့ ပေါင်းပြီးတော့ ကျောက်ဖြူကို ကာကွယ်တယ်။ စစ်တွေကိုတော့ တရုတ်လုံခြုံရေးတပ်တွေ လွှတ်မယ်ဆိုတာတော့ မသိသေးဘူး။ အဲဒါကြောင့်မို့လို့ အဲဒီနှစ်ခုကို ကြည့်ခြင်းအားဖြင့် စစ်တွေကိုတော့ အရင်သိမ်းလိမ့်မယ် ဘာဖြစ်လို့လဲဆိုတော့ တရုတ်လုံခြုံရေးတပ်တွေ မရှိသေးဘူး။ အဲဒီနှစ်ခုကို ကြည့်လိုက်ရင် ကျောက်ဖြူကိုတော့ ထားနေအုံးမယ်။ စစ်တွေကိုတော့ နောက်ဆုံးမှာ ဂွပြီးလို့ရှိရင်တော့ စစ်တွေကိုတော့ ရအောင် သိမ်းလိမ့်မယ်လို့ ဆရာကတော့ ယုံကြည်နေတယ်ပေါ့နော်” လို့ ပြောပါတယ်။

ကျောက်ဖြူကို မတိုက်သေးပေမယ့်လည်း လက်ရှိမှာတော့ အာရက္ခတပ်တော်ဟာ ကျောက်ဖြူမြို့ ပတ်ပတ်လည်က ကျေးရွာတွေ တော်တော်များများကို သိမ်းပိုက်ထားပြီးပြီလို့လည်း သိရပါတယ်။

ကျောက်ဖြူမှာ မြို့သိမ်းတိုက်ပွဲ မဖြစ်သေးပေမယ့်လည်း ရက္ခိုင်ပြည်မှာ စစ်ကောင်စီတပ် ချုပ်ငြိမ်းရေးအတွက် ဆုံးဖြတ်ထားပြီးသား ဖြစ်တာကြောင့် စစ်တွေမှာတော့ မြို့သိမ်းတိုက်ပွဲ ဖြစ်လိမ့်မယ်လို့ နိုင်ငံရေး လေ့လာသုံးသပ်သူ ဦးသန်းစိုးနိုင်က ပြောပါတယ်။

“စစ်တွေကတော့ တိုက်မှာပဲ။ ကျောက်ဖြူကတော့ တရုတ်စီးပွားရေး စီမံကိန်းတွေရှိတော့ ကျောက်ဖြူမှာ စစ်ပွဲ သိပ်အကြီးအကျယ် ဖြစ်မယ့်သဘောတော့ သိပ်မမြင်ဘူး။ ဒါပေမယ့် စစ်တွေမြို့သိမ်းတိုက်ပွဲတော့ ဖြစ်လိမ့်မယ်လို့ ထင်တယ်။ စစ်ကောင်စီ ကင်းရှင်းရေးအတွက် အဲဒီလုပ်ငန်းတာဝန်တွေ လုပ်ဖို့ ဆုံးဖြတ်ပြီးသား ဖြစ်တယ်။ အဲဒီတော့ စစ်တွေကို တိုက်ပါမယ်” လို့ ပြောပါတယ်။

ပြီးခဲ့တဲ့ ရက်မှာလည် စစ်တွေမြို့နယ်မှာရှိတဲ့ ရေချမ်းပြင်ကျေးရွာက ပြည်သူတွေကို ဒီဇင်ဘာ ၄ ရက်နေ့ နောက်ဆုံးထားပြီးတော့ ပြောင်းရွှေ့ကြဖို့အတွက် လုပ်နေပြီး ရေချမ်းပြင် ဒေသခံတွေက စစ်တွေမြို့ပေါ်က ဘုန်းကြီးကျောင်းတွေမှာ နေနေကြရတယ်လိုဘ သိရပါတယ်။

စစ်တွေဒေသခံတစ်ယောက်က “အခုကျန်တာက စစ်တွေရယ်၊ ကျောက်ဖြူရယ်၊ မာန်အောင်ပဲ ကျန်တော့တာ။ ဒါပေမယ့်လည်း တွေးကြည့်လိုက်လို့ရှိရင် အကုန်လုံးက စစ်ရှောင်နေရင်း ဒုက္ခရောက်နေကြတာ။ ကိုယ်လည်း ဒုက္ခမရောက်ဘူးတော့မဟုတ်ဘူး၊ ရောက်တယ်။ ဒါပေမယ့် အန်တီတို့ ဒုက္ခရောက်တာက စစ်ဘေးမရှောင်ရသေးဘူးပေါ့နော်။ အခုဆိုလည်း ရေချမ်းပြင်ဘက်က မနေ့ကနေပြီးတော့ ၃ ရက် အပြီးတိုင် နှင်ထားတယ်။ မြို့ထဲမှာ၊ ဘုန်းကြီးကျောင်းတွေမှာ တချို့တချို့တွေ ဝင်နေတယ်ဆိုပြီးတော့ ကြားတယ်ပေါ့နော်။ ဒါပေမယ့် အန်တီတော့ သွားမကြည့်တော့ သေချာတော့ အတိအကျ ပြောလို့မရသေးဘူး။ ဒါပေမယ့် တော်တော်များများက ရေချမ်းပြင်ကို နေထားတယ်။ အန်တီအမြင်က ဗိုလ်ချုပ်ပြောထားတဲ့စကား တစ်ခွန်းတည်းနဲ့တင်ပဲပေါ့နော် ဒီဟာကို သူ့စကားကို သူရုပ်သိမ်းမယ်လို့တော့ မထင်ဘူးပေါ့” လို့ ပြောပါတယ်။

ဒီဇင်ဘာလ ၂ ရက်နေ့ ကလည်း ရန်ကုန်ကနေ စစ်ကောင်စီ ရေတပ် ထောက်ပို့ရေယာဉ်က လက်နက်ခဲယမ်းအပါအဝင် စစ်မှုထမ်း တပ်သားသစ်တွေနဲ့ စားသောက်ကုန်တွေနဲ့ ကျောက်ဖြူ ဒါမှမဟုတ် စစ်တွေမြို့ကို ထွက်ခွာသွားတယ်လို့ ရက္ခိုင်သတင်းဌာနတချို့မှာ ဖော်ပြထားပါတယ်။

ဒီလိုမျိုး စစ်ကောင်စီက လုပ်ဆောင်တာဟာ စစ်တွေနဲ့ ကျောက်ဖြူကို လုံခြုံရေး တိုးမြှင့်ဖို့အတွက်နဲ့ မြို့သိမ်းတိုက်ပွဲတွေအတွက် ခုခံကာကွယ်ဖို့အတွက် ဖြစ်တယ်လို့ နိုင်ငံရေးသမားတွေက သုံးသပ်ထားပါတယ်။