ကျောက်နီမော် ဗုံးကြဲခံရမှုကြောင့် သေဆုံးသူ ၂၆ ဦး၊ ဒဏ်ရာရရှိသူ ၂၇ ဦး နဲ့ နေအိမ် ၃၉၈ လုံး ပျက်စီး

အာရက္ခတိုင်းမ်စ် (၁၁ ဇန်နဝါရီ ၂၀၂၅)

ရက္ခိုင်ပြည် ရမ်းဗြဲမြို့နယ် ကျောက်နီမော်တိုက်နယ်ကျေးရွာကို စစ်ကောင်စီက လေကြောင်းဖြင့်ဗုံးကြဲတိုက်ခိုက်မှုကြောင့် အရပ်သား ၂၆ ဦး၊ ဒဏ်ရာရရှိသူ ၂၇ ဦး နဲ့ လူနေအိမ် ၃၉၈ လုံး မီးလောင်ကျွမ်း ပျက်စီးသွားတယ်လို့ အာရက္ခတပ်တော် က ဇန်နဝါရီလ ၁၀ ရက်တွင် ထုတ်ပြန်ခဲ့ပါတယ်။

စစ်ကောင်စီဟာ ဇန်နဝါရီလ ၈ ရက် နေ့လယ် ၁ နာရီခန့်က ရမ်းဗြဲမြို့နယ် ကျောက်နီမော်ဆိပ်ကမ်း နဲ့ ရွာထဲကို ဂျက်ဖိုက်တာဖြင့် လေကြောင်း ဗုံးကြဲတိုက်ခိုက်ခဲ့ပါတယ်။

အဆိုပါ တိုက်ခိုက်မှုကြောင့် ရွာတောင်ပိုင်း၊ အလယ်ပိုင်း နဲ့ မြောက်ပိုင်းရပ်ကွက်တို့ကို မီးအပြင်းအထန်လောင်ကျွမ်းခဲ့ပြီး သက်ကြီးရွယ်အိုများ နဲ့ ကလေးငယ်အများအပြား မီးထဲပါသွားခဲ့တယ်လို့ AA က ဆိုပါတယ်။

“ယခုအချိန်အထိ မိမိတို့ ပြုစုနေသောစာရင်းများအရ သေဆုံးသူ (၂၆) ဦး၊ အလတ်စား ပြင်းထန်ဒဏ်ရာရသူ (၁၂) ဦး နဲ့ အသေးစား (အပေါ့စား) ဒဏ်ရာရရှိသူ (၁၅) ဦးအထက်ရှိတယ်” လို့ AA က ဆိုပါတယ်။

အလောင်းရှာမတွေ့ဘဲ ပျောက်ဆုံးနေသော သူများရှိနေသေးပြီး သေဆုံး ဒဏ်ရာရသူများ အရေအတွက် ထပ်မံတိုးလာနိုင်ပြီး နောက်ထပ် သေဆုံး ဒဏ်ရာရသူများစာရင်း ရရှိပါက ထပ်မံဖော်ပြပေးသွားမယ်လို့ AA က ဆိုပါတယ်။

ရက္ခိုင်ပြည်အတွင်း စစ်ရှုံးနေသော စစ်ကောင်စီဟာ တိုက်ပွဲဖြစ်ပွားခြင်းမရှိတဲ့ နေရာများက ပြည်သူတွေကို ပစ်မှတ်ထားပြီး ဆေးရုံများ၊ ဆေးခန်းများ၊ စာသင်ကျောင်းများ၊ ဘာသာရေးအဆောက်အအုံများ၊ ဈေးများ၊ လမ်းတံတားများ နဲ့ လူနေရပ်ကွက်များကို လေယာဉ်ဖြင့် ဗုံးကြဲတိုက်ခိုက်ခြင်း၊ လက်နက်ကြီးများဖြင့် ပစ်ခတ်တိုက်ခိုက်မှုများကို နေစဉ်နဲ့အမျှ ပြုလုပ်လျက်ရှိပြီး စစ်ရာဇဝတ်မှုများကို ပြောင်ပြောင်တင်းတင်း ချိုးဖောက် ကျူးလွန်လျက်ရှိတယ်လို့ အာရက္ခတပ်တော်က ထုတ်ပြန်ခဲ့ပါတယ်။