အာရက္ခတိုင်းမ်စ် (၃ မတ် ၂၀၂၅)
ရက္ခိုင်ပြည် ဂွမြို့နယ်တွင် စစ်ကောင်စီကို ငွေပေးပြီး နည်းမျိုးစုံနဲ့ ခိုးခုတ်ထားတဲ့ သစ် မြောက်များစွာ တွေ့ရှိရခဲ့တယ်လို့ အာရက္ခတပ်တော်ရဲ့ ပြောရေးဆိုခွင့်ရှိသူ ဦးခိုင်သုခက ပြောပါတယ်။
“စစ်ကောင်စီနဲ့ပေါင်းပြီးတော့ ခိုးခုတ်ထားတဲ့ သစ်တွေထဲက တချို့ကိုတော့ အာရက္ခပြည်သူ့တော်လှန်ရေးအစိုးရက သိမ်းဆည်းထားမှာပါ။ နောင်တချိန်မှာ အာရက္ခဒေသ ပြန်လည်ထူထောင်ရေးမှာ အသုံးပြုသွားမှာပါ” လို့ ဦးခိုင်သုခက ဆိုပါတယ်။
စစ်ကောင်စီကို ငွေပေးကာ ဂွမြို့နယ် နဲ့ ဧရာဝတီတိုင်းကို ကားလမ်းဖောက်ကာ ဝင်လာပြီး သစ် မြောက်များစွာကို ခိုးခုတ်ထားတာဖြစ်တယ်လို့လည်း သိရပါတယ်။
အာရက္ခတပ်တော်အနေနဲ့ ပုဂ္ဂလိက တနိုင်တပိုင် လုပ်ကိုင်နေကြတဲ့ ပြည်သူတွေခုတ်ထားတဲ့ သစ်ကိုတော့ ရွှေ့ပြောင်းသယ်ယူခွင့်၊ လုပ်ငန်းလုပ်ကိုင်ခွင့်ကို ကန့်သတ်ထားခြင်း မရှိဘဲ သတ်မှတ်ထားတဲ့ အခွန်နှုန်းကို ပေးဆောင်စေပြီး ဆက်လက် လုပ်ကိုင်ခွင့်ပေးသွားမယ်လို့လည်း သိရပါတယ်။
“သစ်ကို သုံးနှစ်မထုတ်ရဆိုပြီးတော့ ထုတ်ပြန်ထားတာမျိုးတော့ ကျနော် မတွေ့ပါဘူး။ ဒါပေမယ့် သစ်ခိုးထုတ်နေတာကိုတော့ ထိန်းကျောင်း တားဆီးဖို့ လိုအပ်တာကြောင့် ဒေသန္တရအမိန့် ထုတ်ပြန်ပြီးတော့ လုပ်ဆောင်တာမျိုးတော့ ရှိပါတယ်” လို့ အာရက္ခတပ်တော်ရဲ့ ပြောရေးဆိုခွင့်ရှိသူ ဦးခိုင်သုခက ဆိုပါတယ်။
ရက္ခိုင်တွင် စစ်ကောင်စီနဲ့ပေါင်းကာ ခရိုနီတချို့ဟာ သစ်တော်ပြုန်းတီးအောင် ခိုးခုတ်ကာ ရောင်းစားသဖြင့် မိုးရာသီရောက်တိုင်း ရေကြီးရေလျံမှုနဲ့ မြေပြိုမှုတို့ကို နှစ်တိုင်း ပြည်သူတွေ ရင်ဆိုင်နေရပါတယ်။