အာရက္ခတိုင်းမ်စ် (၁၂ မေ ၂၀၂၅)
နွားထိုးကြီး PDF အဖွဲ့က ဖမ်းဆီးထားတဲ့ ရန်ကုန်အဝေးသင်တက္ကသိုလ် ကထိက ဒေါ်ဝင်းဝင်းအောင်ကို အာရက္ခတပ်တော် AA နဲ့ ပူးပေါင်းခဲ့တယ်လို့ စစ်ကောင်စီရဲ့ ပညာရေးဝန်ကြီးဌာနက ထုတ်ပြန်ခဲ့ပါတယ်။
ကထိက ဒေါ်ဝင်းဝင်းအောင်က AA အဖွဲ့ နဲ့ ကြိုတင်ဆက်သွယ်မှုတွေ ပြုလုပ်ပြီး သွားရောက် ပူးပေါင်းခဲ့တာဖြစ်တယ်ဆိုပြီး မေလ ၁၁ ရက်နေ့မှာ ထုတ်ပြန်ခဲ့တာပါ။
မြင်းခြံခရိုင် အမှတ်(၄-၁၀) နွားထိုးကြီး PDF အဖွဲ့က မိတ္ထီလာမြို့နယ်မှာ ရန်ကုန်အဝေးသင်တက္ကသိုလ် သတ္တဗေဒဌာန ကထိက ဒေါ်၀င်း၀င်းအောင်ကို ဖမ်းဆီးထားပြီး လိုအပ်တဲ့ စုံစမ်းစစ်ဆေးမေးမြန်းတာတွေကို ဆက်လက်လုပ်ဆောင်မှာဖြစ်တယ်လို့ မေလ ၈ ရက်နေ့က ထုတ်ပြန်ခဲ့ပါတယ်။
စစ်ကောင်စီရဲ့ထုတ်ပြန်ချက်အရ ကထိကဒေါ်ဝင်းဝင်းအောင်ဟာ ရန်ကုန်အဝေးသင်တက္ကသိုလ်၊ သတ္တဗေဒဌာနမှာ တာဝန်ထမ်းဆောင်နေသူဖြစ်ပြီး မိတ္ထီလာတက္ကသိုလ်ကို တာဝန်ကျနေချိန်မှာ အကြောင်းမဲ့ ပျက်ကွက်ရာကနေ ပျောက်ဆုံးကြောင်း သိရှိခဲ့ရတာပါ။
ဒေါ်ဝင်းဝင်းအောင်ဟာ ဆားလင်းကြီး PDF အဖွဲ့က ဇေယျာမင်းဌေးရဲ့ ချိတ်ဆက် ကူညီမှုနဲ့ မိတ္ထိလာမြို့ကနေ ဆားလင်းကြီးမြို့နယ် ကျားတက်ကျေးရွာသို့ သွားရောက်ခဲ့ပြီး အဲဒီကတဆင့် အာရက္ခတပ်တော်ထံ ဝင်ရောက်သွားခဲ့တယ်လို့ ဆိုပါတယ်။
ကထိက ဒေါ်ဝင်းဝင်းအောင်ဟာ AA အဖွဲ့ ကိုဇော်အေးထွန်းနဲ့ အတူ AA အခြေပြုရာနယ်မြေတွေအတွင်း ပညာရေးဆိုင်ရာ လုပ်ငန်းတွေမှာ ပူးပေါင်းကူညီနိုင်ဖို့ ကြိုတင်ရည်ရွယ်ပြီး ထွက်ခွာသွားခဲ့တာဖြစ်တယ်လို့လည်း စစ်ကောင်စီရဲ့ ထုတ်ပြန်ချက်မှာ စွပ်စွဲထားပါတယ်။
ဒေါ်ဝင်းဝင်းအောင်က ရက္ခိုင်ပြည်၊ စစ်တွေမြို့မှာ မွေးဖွားခဲ့တဲ့ ရက္ခိုင်လူမျိုးတစ်ယောက်ဖြစ်ပြီး သူငယ်တန်းမှ ဘွဲ့ရတဲ့အထိ စစ်တွေမြို့မှာ ပညာသင်ကြားခဲ့သည်။
အဲဒါအပြင် တက္ကသိုလ်တွေမှာ နည်းပြဆရာမအဖြစ် တာဝန်မထမ်းဆောင်ခင်ကာလတွေမှာလည်း စစ်တွေမြို့က အခြေခံပညာအထက်တန်းကျောင်း၊ အခြေခံပညာမူလတန်းကျောင်းအချို့မှာ မူလတန်းပြ၊ အလယ်တန်းပြရာထူးတွေနဲ့ တာဝန်ထမ်းဆောင်ခဲ့ဖူးတာကို စိစစ်တွေ့ရှိိခဲ့ရတယ်လို့ စစ်ကောင်စီရဲ့ ပညာရေးဝန်ကြီးဌာနရဲ့ ထုတ်ပြန်ချက်မှာ ဖော်ပြထားတာကို တွေ့ရတယ်။