စစ်တွေကို ကုန်စည်မဝင်တာ ၁ လနီးပါးရှိနေ

အာရက္ခတိုင်းမ်စ် (၁၃ မေ ၂၀၂၅)

စစ်ကောင်စီ ထိန်းချုပ်ထားတဲ့ ရက္ခိုင်ပြည်၊ စစ်တွေမြို့မှာ ကုန်စည်တင်ဆောင်တဲ့ သင်္ဘောတွေ မရောက်တာ ၁ လနီးပါး ရှိနေပြီလို့ ဒေသခံတွေက ပြောပါတယ်။

သင်္ကြန်ကာလနောက်ပိုင်း သင်္ဘောတစ်စီး ရောက်လာပေမယ့် အစိုးရရဲ့ ဆန်တွေပဲ ပါတယ်လို့ သိရပါတယ်။

ရန်ကုန်မှာ စစ်တွေအတွက် သင်္ဘော ၆ စီးစာ ကုန်စည်တွေ တင်ဆောင်ထားတာရှိပေမယ့် အခုထိ ရောက်မလာသေးဘူးလို့ စစ်တွေဒေသခံတစ်ယောက်က အာရက္ခတိုင်းမ်စ်ကို ပြောပါတယ်။

“သင်္ဘောမရောက်တာ သင်္ကြန်မရောက်ခင်ကတည်းက မရောက်တာ။ အခု သင်္ဘောဝင်မယ်ဆိုပြီး ပစ္စည်းတင်ထားတာ ၆ စီးရှိတယ်။ ရက္ခိုင်ကို တစ်စီးမှကို မလာသေးတာ။ ပထမ သင်္ကြန်ပြီးတော့ ဝင်လာတာကလည်း အစိုးရဆန်တွေပဲ ပါတယ်” လို့ ပြောပါတယ်။

ကုန်စည်သင်္ဘောတွေ မဝင်ရောက်တာကြောင့် အခုဆိုရင် စစ်တွေမှာ ဆန်၊ စားသုံးဆီနဲ့ စက်သုံးဆီကလွဲပြီး တခြားအခြေခံစားသောက်ကုန်တွေ ဈေးတက်လာနေတယ်လို့ ဒေသခံတွေထံကနေ သိရပါတယ်။

အဓိကအားဖြင့် အရင်တုန်းက အပေါဆုံးဖြစ်တဲ့ ကော်ဖီမစ်တွေက ဈေးပိုတက်လာနေတာ ဖြစ်တယ်လို့ စစ်တွေဒေသခံတစ်ယောက်က အာရက္ခတိုင်းမ်စ်ကို ပြောပါတယ်။

“Sunday ကော်ဖီမှာ အဖြည်ကို အဝါက လက်ဖက်ရည်၊ အနီက ကော်ဖီ၊ အဝါက ဈေးကြီးတယ်။ အဲဒါကို မေးကြည့်တာ ၂၂၀၀၀၊ ၂၀၀၀၀ လားမသိဘူး။ ဈေးမြင့်တက်နေပြီ။ ဆန်က ဈေးမတက်ဘူး။ ဈေးမဆက်ဘူးသာပြောတယ် ဆန်အရှည်လို့ခေါ်မလား အများသုံး စားသုံးတဲ့ဆန် အဲဒါတောင်မှ ၁၂၅၀၀၀ တစ်အိတ်ကို။ ပေါ်ဆန်းမွှေးက ၂၆၀၀၀၀။ စားသုံးဆီနဲ့ စက်သုံးဆီကတော့ နည်းနည်း ဈေးကျပါတယ်။ ၉၂ ဆို အဲဒီဈေးကနေ မတက်ဘူး။ ကျလည်းမကျဘူး၊ တက်လည်းမတက်ဘူး” လို့ ပြောပါတယ်။

အာရက္ခတပ်တော်နဲ့ စစ်ကောင်စီတပ်တို့ တကျော့ပြန်တိုက်ပွဲ ပြန်ဖြစ်တဲ့ ၂၀၂၃ ခုနှစ် နိုဝင်ဘာ ၁၃ ရက်နေ့ကနေစပြီးတော့ စစ်ကောင်စီက ရက္ခိုင်ပြည်က မြို့နယ်တွေကိုသွားတဲ့ ကုန်စည်စီးဆင်းတဲ့လမ်းကြောင်းအားလုံးကိူ ဖြတ်တောက်ထားပြီး သယ်ဆောင်ခွင့် ပိတ်ထားတာပဲ ဖြစ်ပါတယ်။

စစ်တွေက ရန်ကုန်ကနေ ဝင်ရောက်တဲ့ ကုန်စည်သင်္ဘောကိုသာ အဓိက အားထားနေရပြီး စစ်ကောင်စီ ထိန်းချုပ်ထားတဲ့ မြို့နယ်တွေက ကုန်ဈေးနှုန်းတွေဟာဆိုရင် အာရက္ခတပ်တော် ထိန်းချုပ်ထားတဲ့ မြို့နယ်တွေထက် ဈေးနှုန်း ပိုကြီးနေတာကို တွေ့ရပါတယ်။