ရက္ခိုင်ပြည် အပြီးသတ်လွတ်မြောက်ခါနီးပြီလို့ ဦးခိုင်သုခ ပြော

အာရက္ခတိုင်းမ်စ် (၁၁ ဩဂုတ် ၂၀၂၅)

ရက္ခိုင်ပြည်တခုလုံး စစ်အာဏာရှင် ထိန်းချုပ်မှုအောက်ကနေ အပြီးသတ် လွတ်မြောက်လုနီးပြီ ဖြစ်တယ်လို့ အာရက္ခတပ်တော် ပြောရေးဆိုခွင့်ရှိသူဦးခိုင်သုခက ပြောပါတယ်။

ရက္ခိုင်ပြည်က မြို့နယ် ၁၄ ခု နဲ့ ပလက်၀ကို သိမ်းပိုက်ထားတဲ့ AA ဟာ လက်ရှိတွင် ကျောက်ဖြူ နဲ့ စစ်တွေမြို့ တို့ကို သိမ်းပိုက်နိုင်ရန် လုပ်ဆောင်နေပါတယ်။

အာရက္ခ စစ်သည်တော်များရဲ့ စွမ်းဆောင်မှု၊ ပြည်သူများရဲ့ ခိုင်မာပြတ်သားတဲ့ ခံယူချက် ဇွဲ၊ လုံ့လ အပြည့်နဲ့ ကြံ့ကြံ့ခံ ရပ်တည်မှု၊ မဟာမိတ်တွေနဲံ ပူးပေါင်းဆောင်ရွက်မှုတွေကြောင့် စစ်အာဏာရှင် ထိန်းချုပ်မှုအောက်က အပြီးသတ် လွတ်မြောက်လု နီးပါးအနေအထားကို ရောက်ရှိနေပြီလို့ ဦးခိုင်သုခက ပြောပါတယ်။

အလားတူ “ဒီနေ့အချိန်ခါလည်း အာရက္ခပြည်ရဲ့ ၉၀ ရာခိုင်နှုန်းကျော်ကို သိမ်းပိုက်ထားပြီး ကျနော်တို့ ချမှတ်ထားတဲ့ ပန်းတိုင်ကို ကျနော်တို့ ချမှတ်ထားတဲ့ ရက္ခိတလမ်းစဉ်နဲ့ ကျနော်တို့ ဂိတ်ဆုံးရောက်အောင်အထိ ဆက်လက် ချီတက်သွားဖို့ ဖြစ်ပါတယ်”လို့လည်း သူက ဆိုပါတယ်။

AA အနေနဲ့ စတင်တည်ထောင်ချိန်ကတည်းကနေ ရည်မှန်းထားတဲ့အတိုင်း အာရက္ခပြည် တစ်ခုလုံးကို သိမ်းပိုက်ပြီး အာရက္ခပြည်သူလက်ထဲသို့ ပေးအပ်သွားမယ်လို့လည်း ဆိုပါတယ်။