ကျောက်ဖြူနဲ့ စစ်တွေကို လေကြောင်းခရီးစဥ်တွေ လျှော့ချ

အာရက္ခတိုင်းမ်စ် (၈ စက်တင်ဘာ ၂၀၂၅)

စစ်ကော်မရှင်က ရက္ခိုင်ပြည် ကျောက်ဖြူနဲ့ စစ်တွေမြို့နယ်ကို ရန်ကုန်ကနေ ပျံသန်းပြေးဆွဲနေတဲ့ လေကြောင်းခရီးစဥ်တွေကို လျှော့ချလိုက်တယ်လို့ သိရပါတယ်။

အာရက္ခတပ်တော်နဲ့ နှစ်ဖက်တိုက်ပွဲ ပြင်းထန်နေတဲ့ ကျောက်ဖြူကို အရင်က နေ့စဥ် လေယာဥ်ပြေးဆွဲနေပေမယ့် စက်တင်ဘာလကစပြီး တပတ်ကို ၂ ကြိမ်သာ ပြေးဆွဲတော့မှာ ဖြစ်တယ်လို့ လေယာဥ်လက်မှတ် အရောင်းဌာနတွေဆီကနေ သိရပါတယ်။

အဲဒီလိုပဲ စစ်တွေမြို့ကိုလည်း လေကြောင်းခရီးစဥ်တွေကို လေကြောင်းလိုင်းတွေက အရင်က တရက်ကို ၂ စီးနဲ့ ၃စီး ပျံသန်းပြေးဆွဲပေမယ့် လက်ရှိမှာတော့ တပတ်ကို ၁ ရက် ၂ ရက်လောက်ပဲ ပြေးဆွဲတယ်လို့ လေယာဥ်လက်မှတ် ရောင်းချနေသူတစ်ယောက်က အာရက္ခတိုင်းမ်စ်ကို ပြောပါတယ်။

“လျှော့ချတာတော့ လျှော့ချတယ်။ တပတ်ကို ၂ ရက် အဲဒီလောက်ပဲ ရှိတယ်။ အရင်တုန်းကကျတော့ ၃ ကြောင်းကနေ MNA ရှိတယ်။ ပြီးလို့ရှိရင် MAI ရှိတယ်။ ၃ ကြောင်းရှိတယ်။ အခု ၃​ ကြောင်းလုံး ပေါင်းတော့မှ တပတ်ကို ၂ စီးလောက်ပဲ သွားဖြစ်တယ်။ အရင်တုန်းကတော့ ဒီထပ် ပိုစိပ်တာပေါ့ ခရီးစဥ်တွေက။ အခုက တပတ်ကို ၂ ကြိမ်လောက်ပဲ။ စစ်တွေလည်း ပါတယ်။ စစ်တွေကလည်း အရင်တုန်းကဆိုရင် airline တခုကနေ တနေ့ကို ပုံမှန် ၁ ကြောင်းမဟုတ်ရင် ၂ ကြောင်း ဆွဲတယ်။ ၃ ကြောင်းသွားတယ်ဆိုလို့ရှိရင် လေယာဥ်က တနေ့ကို ၂ စီး၊ ၃ စီးလောက် ကျမယ်။ အခုက airline တွေကလည်း ၁ ရက်ဆွဲတဲ့ airline တွေရှိတယ်။ ၂ ရက်ဆွဲတဲ့ airline တွေရှိတယ်” လို့ ပြောပါတယ်။

ရန်ကုန်-ကျောက်ဖြူခရီးစဉ်ကို Myanmar Airways မှ စက်တင်ဘာ ၈၊ ၁၅၊ ၂၂ နဲ့ ၂၉၊ Air Myanmar က စက်တင်ဘာ ၆၊ ၁၃၊ ၂၀ နဲ့ ၂၇ ရက်တွေမှာ ပြေးဆွဲတော့မှာဖြစ်ပြီး စက်တင်ဘာလအတွင်း ရှစ်ကြိမ်သာပြေးဆွဲတော့မှာ ဖြစ်တယ်လို့ သတင်းတွေအရ သိရပါတယ်။

လက်ရှိမှာ ရန်ကုန် – ကျောက်ဖြူ၊ ကျောက်ဖြူ – ရန်ကုန်၊ ရန်ကုန် – စစ်တွေ၊ စစ်တွေ – ရန်ကုန် လေယာဥ်လက်မှတ်တွေဟာ လက်ရှိမှာ စက်တင်ဘာလ တတိယအပတ်ထိ အပြည့်ဖြစ်နေတယ်လို့ သိရပါတယ်။

လေယာဥ်လက်မှတ် ရောင်းချသူတစ်ယောက်က “သွားမယ့်ခရီးသည်တွေကျတော့ မနက်ဖြန်ရမလား၊ တပတ်ခါရမလား အဲဒီလိုတွေရှိတယ်။ ဒါပေမယ့် ဒီနေ့ဆို ၆ ရက်ဆိုလို့ရှိရင် ၁၈၊ ၁၉ ရက်ဆို မရလောက်ဘူး။ အကုန်လုံးက အပြည့် ခရီးသည်တွေက။ လေယာဥ်က နည်းတဲ့အခါကျတော့ ခရီးသည်တွေက မရနိုင်ဘူး။ တချို့ဆိုရင် ၁ ပတ်၊ ၂ ပတ်၊ ၃ ပတ်လောက်အထိ ကြိုပြီးတော့ ဝယ်ထားတာမျိုး ရှိတယ်။ ဈေးနှုန်းတွေကကျတော့ ၆ သိန်းဝန်းကျင်မှာရှိတယ် ပုံမှန်ဈေးပါပဲ။ တချို့တွေက လက်မှတ်ဝယ်ပြီးတော့မှ အကြောင်းအမျိုးမျိုးကြောင့် မသွားဖြစ်ဘူး။ ဒါပေမယ့် အဲဒါကို သွားမထုတ်ဘဲနဲ့ ခရီးသည်ရှိနေပြီးသား ဒါပေမယ့် ပိုင်ရှင်က မသွားတော့ဘူး။ အဲဒီနေရာကို ၆ သိန်းဆို ၇ သိန်း၊ ၈ သိန်း၊ ၉ သိန်း အရေးပေါ်သွားမယ့်သူကတော့ သွားမှာပဲလေ အဲဒီလိုမျိုးတွေတော့ ရှိတယ်” လို့ ပြောပါတယ်။

လေကြောင်းလိုင်းကို အဓိကအားထားနေရတဲ့ ကျောက်ဖြူနဲ့ စစ်တွေအတွက် အခုလို လေယာဥ်ခရီးစဥ်တွေ လျှော့ချလိုက်တာဟာ ကုန်ဈေးနှုန်းကို အဆမတန် ကြီးသွားစေနိုင်သလို တစ်ဖက်မှာလည်း တိုက်ပွဲ ပြင်းထန်လာမှာကို ဒေသခံတွေက စိုးရိမ်နေကြပါတယ်။