အာဏာသိမ်းမှုကာလအတွင်း ရက္ခိုင်ကို အများဆုံး ဗုံးကြဲခဲ့

အာရက္ခတိုင်းမ်စ် (၁၀ အောက်တိုဘာ ၂၀၂၅)

၂၀၂၁ ခုနှစ် စစ်တပ်အာဏာသိမ်းမှု ကာလအတွင်း စစ်ကော်မရှင်က ရက္ခိုင်ပြည်ကို လေကြောင်းဗုံးကြဲတိုက်ခိုက်မှု အများဆုံး ပြုလုပ်ခဲ့တယ်လို့ BNI – Myanmar Peace Monitor ရဲ့ စာရင်းမှတ်တမ်းမှာ ဖော်ပြထားပါတယ်။

စစ်ကော်မရှင်ဟာ အာဏာသိမ်းတဲ့ ၄ နှစ်ကျော်ကာလအတွင်း တိုင်းနဲ့ ပြည်နယ်တွေကို လေကြောင်းဗုံးကြဲမှု ၂၅၈၃ ကြိမ် ပြုလုပ်ခဲ့ပြီး ရက္ခိုင်က ၄၃၅ ကြိမ်နဲ့ အများဆုံး ဖြစ်ပါတယ်။

စစ်ကိုင်းတိုင်းက ၄၃၁ ကြိမ်နဲ့ ဒုတိယအများဆုံး လေကြောင်းကနေ ဗုံးကြဲခံရပြီး အဲဒီနောက်မှာတော့ ရှမ်းမြောက်က ၂၇၅ ကြိမ်၊ ကရင်က ၂၄၁ ကြိမ်၊ မန္တလေးက ၂၃၅ ကြိမ်၊ ကချင်က ၂၂၂ ကြိိမ်၊ ချင်းက ၁၅၅ ကြိမ်၊ ကယား (ကရင်နီ)က ၁၄၅ ကြိမ်၊ မကွေးက ၁၂၄ ကြိမ်၊ ရှမ်းတောင်က ၈၆ ကြိမ်၊ ပဲခူးအရှေ့က ၈၀ ကြိမ်၊ တနင်္သာရီက ၇၅ ကြိမ်၊ မွန်က ၄၁ ကြိမ်၊ ဧရာဝတီက ၂၉ ကြိမ်၊ ပဲခူးအနောက်က ၈ ကြိမ်နဲ့ နေပြည်တော်က ၁ ကြိမ် စာရင်းမှာ တွေ့ရပါတယ်။

အဲဒါအပြင် ဖက်ဆစ်အကြမ်းဖက် စစ်ကော်မရှင်ရဲ့ အာရက္ခဒေသက ပြည်သူတွေအပေါ် ရည်ရွယ်ချက်ရှိရှိ လေကြောင်းကနေ ဗုံးကြဲတိုက်ခိုက်ခဲ့တဲ့အတွက် ၂၀၂၅ ခုနှစ် စက်တင်ဘာလ တစ်လတည်းမှာကိုပဲ အာရက္ခပြည်သူ ၂၃ ဦးသေဆုံးပြီး ၄၉ ဦး ဒဏ်ရာရရှိခဲ့တယ်လို့ အာရက္ခတပ်တော်က ထုတ်ပြန်ထားပါတယ်။

အာရက္ခတပ်တော်နဲ့ စစ်ကော်မရှင်တို့ရဲ့ တကျော့ပြန်တိုက်ပွဲ ပြန်ဖြစ်တဲ့ ၂၀၂၃ ခုနှစ် နိုဝင်ဘာလကနေ ၂၀၂၅ ခုနှစ် ဩဂုတ်လအထိ စစ်ကော်မရှင်ရဲ့ တိုက်ခိုက်မှုကြောင့် အသက် ၁၈ နှစ်အောက် ကလေးစုစုပေါင်း ၁၈၄ ယောက် သေဆုံးပြီး ၄၇၄ ယောက်လည်း ဒဏ်ရာရခဲ့ကြပါတယ်။