“သူပုန်ဖြူအဖွဲ့”မှ ကဗျာစာအုပ်နဲ့‌‌ ငွေသားများ ထပ်မံပေးပို့

အာရက္ခတိုင်းမ်စ် (၈ ဒီဇင်ဘာ ၂၀၂၅)

“သူပုန်ဖြူအဖွဲ့”မှ သူပုန်ဖြူကဗျာစာအုပ် နဲ့‌‌ ငွေသားတွေကို ‌ဒေသကာကွယ်ရေးအဖွဲ့တွေဆီ ထပ်မံ ပေးပိုခဲ့တယ်လို့ သိရပါတယ်။

အာရက္ခတပ်တော် – AA ရဲ့ ဒု-စစ်ဦးစီးချုပ် ဒေါက်တာညိုထွန်းအောင် ရေးသားထား‌တဲ့ သူပုန်ဖြူ ကဗျာစာအုပ် (၂၅) အုပ်ကို ယောကာကွယ်ရေးတပ် – YDF မှ ကိုယ်လက်အင်္ဂါ စွန့်လွှတ်ခဲ့ရသော ရဲဘော်များအတွက် ဒီကနေ့ (ဒီဇင်ဘာ ၈ ရက်) မှာ ပေးအပ်ခဲ့တာ ဖြစ်ပါတယ်။

“အာရက္ခတပ်တော် – AA၊ သူပုန်ဖြူအဖွဲ့က ပေးအပ်ခဲ့တဲ့အတွက် ဒဏ်ရာရရဲဘော်များမှာ ဝမ်းမြောက်‌ဂုဏ်ယူဖွယ်ရာ စိတ်ခွန်အားတရပ် ရရှိခဲ့ပြီး မွန်မြတ်တဲ့ ကောင်းကျိုးအတွက် ကျွန်ုပ်တို့ ယောကာကွယ်ရေးတပ် – YDF ကလည်း အတိုင်းအထက်အလွန် ဝမ်းသာပီတိ ဖြစ်ရပြီး ဒီနေရာကနေ ကျေးဇူးတင်ရှိ‌ကြောင်း ဂုဏ်ပြု မှတ်တမ်းတင်အပ်ပါတယ်” လို့ ယောကာကွယ်ရေးတပ် – YDF က ဆိုထားပါတယ်။

ဒါ့အပြင် (ဒီဇင်ဘာ ၆ ရက်) မှာလည်း ဗမာ့အမျိုးသားတော်လှန်ရေးတပ်မတော် (BNRA) တွင် တာဝန်ထမ်းဆောင်ရင်း ကိုယ်လက်အင်္ဂါ စွန့်လွှတ်ခဲ့ရတဲ့ ရဲဘော်တွေအတွက် သူပုန်ဖြူကဗျာစာအုပ်အပါအဝင် တဦးချင်းစီအတွက် ‌‌‌ငွေကျပ် တသိန်းလည်း ပေးအပ်ခဲ့ပါတယ်။

“အာရက္ခတပ်တော် ULA/AA ရဲ့ သူပုန်ဖြူ Team က ကျွန်တော်တို့ BNRA တွင် တာဝန်ထမ်းဆောင်ရင်း ကိုယ်လက်အင်္ဂါ စွန့်လွှတ်ရသူများ တဦးချင်းစီအတွက် ပေးပို့တဲ့ သူပုန်ဖြူကဗျာစာအုပ်နဲ့ ငွေကျပ် တသိန်းပါ လွယ်အိပ်များကို ကောင်းမွန်စွာ လက်ခံရရှိပါတယ်ခင်ဗျ။ ပေးပို့တဲ့ လက်ဆောင်များအတွက် BNRA က ကျေးဇူးအထူးတင်ရှိပါတယ်ခင်ဗျ” လို့ BNRA က ထုတ်ပြန်ထားပါတယ်။

ပြီးခဲ့တဲ့ (နိုဝင်ဘာ ၁၅ ရက်) မှာလည်း ချင်းအမျိုးသားအဖွဲ့ချုပ်/ချင်းအမျိုးသားကာကွယ်ရေးတပ်ဖွဲ့ (CNO/CNDF) က တိုက်ပွဲအတွင်း ဒဏ်ရာရ ရဲဘော်များအတွက် သူပုန်ဖြူကဗျာစာအုပ် ၄၂ အုပ်၊ လွယ်အိတ် ၄၂ လုံး နဲ့ ငွေသား ၄၂ သိန်းပါ စာအိတ် ၄၂ အိတ် ကို ပေးအပ်ခဲ့တယ်လို့ ထုတ်ပြန်ချက်အရ သိရပါတယ်။

အာရက္ခတပ်တော် – AA ရဲ့ ဒု-စစ်ဦးစီးချုပ် ဒေါက်တာညိုထွန်းအောင် ရေးသားထားတဲ့ သူပုန်ဖြူကဗျာစာအုပ်ကို ဘာသာစကား ဗမာ၊ ရက္ခိုင်၊ အင်္ဂလိပ် နဲ့ တရုတ် ၄ ဘာသာ နဲ့ ထုတ်ဝေဖြန့်ချီနေပြီး ကဗျာစာအုပ်မှာ ကဗျာအပုဒ်ရေ ၃၀ ကျော် ပါဝင်တယ်လို့ သိရပါတယ်။ ကဗျာစာအုပ် ရောင်းရငွေရဲ့ အမြတ် ၃၅ ရာခိုင်နှုန်းကိုလည်း ကိုယ်လက်အင်္ဂါ ပေးဆပ်စွန့်လွှတ်ခဲ့ရတဲ့ တော်လှန်ရေး ရဲဘော်များအတွက် အသုံးပြုမှာ ဖြစ်တယ်လို့ သူပုန်ဖြူအဖွဲ့က ထုတ်ပြန်ထားပါတယ်။