စောမဲကျီဖောင်ဒေးရှင်းမှ အာရက္ခပြည်သူ့ကျန်းမာရေးဌာနကို သိန်း ၁၀၀၀ လှူဒါန်း

အာရက္ခတိုင်းမ်စ် (၈ ဇန်နဝါရီ ၂၀၂၆)

လူမှုကူညီရေးဖောင်ဒေးရှင်းဖြစ်တဲ့ စောမဲကျီဖောင်ဒေးရှင်းက အာရက္ခပြည်သူ့ကျန်းမာရေးဌာနကို ငွေကျပ် သိန်း ၁၀၀၀ လှူဒါန်းလိုက်တယ်လို့ သိရပါတယ်။

“အာရက္ခပြည်သူ့ကျန်းမာရေးဌာနရှိ ကျန်းမာရေးဝန်ထမ်းများရဲ့ သာရေး၊ နာရေးကိစ္စရပ်များတွင် အသုံးပြုနိုင်ရန် ငွေးကြေးမတတ်နိုင်၊ ဆင်းရဲနွမ်းပါးတဲ့ အာရက္ခပြည်သူလူထုများ ဆေးကုသစာရိတ်ကို ထောက်ပံ့ကူညီနိုင်ရန် ပြည်သူ့ကျန်းမာရေးဝန်ဆောင်မှုကို အားသွန်ခွန်စိုက် ဆက်လက်သယ်ပိုးဆောင်ရွက်နိုင်ရန်နဲ့ အာရက္ခပြည်သူ့ကျန်းမာရေးဌာနရဲ့ ပဒေသာပင်တွင် ပဒေသာငွေ စိုက်ထူနိုင်ရန်အတွက် “စောမဲကျီဖောင်ဒေးရှင်း” မှ ပံ့ပိုးကူညီတဲ့ မြန်မာငွေကျပ် သိန်း ၁၀၀၀ တိတိကို ကောင်းမွန်စွာ လက်ခံရရှိပါတယ်” လို့ အာရက္ခပြည်သူ့ကျန်းမာရေးဌာနက ဇန်နဝါရီလ ၇ ရက်မှာ ထုတ်ပြန်ခဲ့ပါတယ်။

စောမဲကျီဖောင်ဒေးရှင်းအနေနဲ့ “ရက္ခိုင်ပြည်တွင်း ဆင်းရဲနွမ်းပါး ၊ ဆေးကုသရန် အခက်အခဲရှိနေတဲ့ မိသားစုများနဲ့ အာရက္ခပြည်သူ့ကျန်းမာရေးးဌာနမှ ပြည်သူ့ကျန်းမာရေးဝန်ဆောင်မှုလုပ်ငန်းများကို အားသွန်ခွန်စိုက် ဆောင်ရွက်နိုင်ရန်အတွက် အာရက္ခပြည်သူ့ကျန်းမာရေးဌာနသို့ အလှူငွေကျပ် သိန်း ၁၀၀၀ ကို စောမဲကျီဖောင်းဒေးရှင်းမှ လှူဒါန်းလိုက်ပါတယ်” လို့ ဆိုပါတယ်။

စောမဲကျီဖောင်ဒေးရှင်းဟာ ပြည်တွင်း၊ ပြည်ပအလှူရှင်တို့ရဲ့ အလှူငွေများနဲ့ ရက္ခိုင်ပြည်တွင်း စစ်‌ရှောင်ပြည်သူများ လိုအပ်နေတဲ့ နေရာများတွင် ကူညီ၊ ထောက်ပံ့၊ လှူဒါန်းပေးနေတဲ့ ဖောင်ဒေးရှင်းတခုလည်း ဖြစ်ပါတယ်။