မြောက်ဦးတွင် ရှေးဟောင်း ရွှေထည်ရတနာများနဲ့ ရက္ခိုင်ဘုရင် လက်ထက် ငွေဒင်္ဂါး ၁၅၀ ခန့် တွေ့ရှိ

အာရက္ခတိုင်းမ်စ် (၂၆ ဇန်နဝါရီ ၂၀၂၆)
‎
ရက္ခိုင်ပြည်ရဲ့ ရှေးဟောင်းမြို့တော်ဖြစ်တဲ့ မြောက်ဦးမြို့မှာ ရှေးဟောင်း ရွှေထည်ရတနာပစ္စည်းအချို့နဲ့ ရက္ခိုင်ဘုရင်လက်ထက်က သုံးစွဲခဲ့တဲ့ ငွေဒင်္ဂါး ၁၅၀ ခန့်ကို တွေ့ရှိခဲ့တယ်လို့ ဒေသခံတွေက ဆိုပါတယ်။

“ ကလေးတွေက ကစားနေတာကနေ အရှည် ၁ လက်မခန့်ရှိတဲ့ ကျောက်စိမ်း ၁ တုံး၊ ရွှေပုရပိုက် ၁ ခု၊ ရွှေလက်စွပ် ၃ ကွင်း၊ ရွှေအပိုင်းအစငယ်တွေနဲ့ ရက္ခိုင်ဘုရင် စန္ဒသုဓမ္မရာဇာနဲ့ နရပတိကြီး အမည်ပါတဲ့ ငွေဒင်္ဂါး ၁၅၀ ကျော်ကို တွေ့တာ” လို့ မြောက်ဦးဒေသခံတဦးက အာရက္ခတိုင်းမ်စ်ကို ပြောပါတယ်။

အဆိုပါ ရှေးဟောင်း ရွှေထည်ရတနာများနဲ့ ရက္ခိုင်ဘုရင်လက်ထက် ငွေဒဂင်္ါး ၁၅၀ ခန့်ကို တွေ့ရှိခဲ့သူမှာ မောင်စိုးအောင်မင်းနဲ့ မောင်ဖြိုးမြတ်ဦးတို့ ဖြစ်တယ်လို့ သိရပါတယ်။ ‎

အဆိုပါ တွေ့ရှိရတဲ့ ဒင်္ဂါးပြားများမှာ ငွေသားအစစ်ဖြစ်ပြီး တတိယ မြောက်ဦးခေတ် ရက္ခိုင်သက္ကရာဇ် (၁၀၃၄) ရွှေနန်းသခင် စန္ဒသုဓမ္မရာဇာ လက်ထက်က သုံးစွဲခဲ့တဲ့ ဒင်္ဂါးများနဲ့ သက္ကရာဇ် (၁၀၀၀) ဆင်ဖြူသခင်၊ ဆင်နီသခင် နရပတိကြီး လက်ထက် သုံးစွဲခဲ့တဲ့ ငွေဒင်္ဂါးများ ဖြစ်တယ်လို့လည်း သိရပါတယ်။

စန္ဒသုဓမ္မရာဇာဟာ ရက္ခိုင်မင်းဆက်(မြောက်ဦးခေတ်) မှာ အထင်ရှားဆုံးနဲ့ တန်ခိုးအာဏာ အကြီးမားဆုံး မင်းတပါး ဖြစ်ပြီး သူ့လက်ထက်မှာ ရက္ခိုင်ရေတပ်ဟာ အလွန်အင်အားကြီးမားခဲ့တယ်လို့ ရက္ခိုင်ရာဇဝင်ကျမ်းတွေမှာ ဖော်ပြထားပါတယ်။

စန္ဒသုဓမ္မရာဇာဟာ ဘာသာရေး အလွန်ရိုသေကိုင်းရှိုင်းသူဖြစ်ပြီး စေတီပုထိုးအများအပြား တည်ထားကိုးကွယ်ခဲ့သလို မြောက်ဦးမှာရှိတဲ့ ရှစ်သောင်းဘုရားကို ပြုပြင်မွမ်းမံတာတွေလုပ်ခဲ့သူလို့ သမိုင်းမှတ်တမ်းတွေက ဖော်ပြထားပါတယ်။

ရှေးဟောင်းရတနာများ တွေ့ရှိခဲ့သည့်နေရာကို အာရက္ခပြည်သူ့တော်လှန်ရေးအစိုးရ (ULA/AA) ရဲ့ တရားဥပဒေ စိုးမိုးရေးနဲ့ ပြည်သူ့ဝန်ဆောင်မှုလုပ်ငန်းအဖွဲ့ (DLEPS) က စနစ်တကျ စောင့်ကြပ်ထိန်းသိမ်းထားတယ်လို့လည်း သိရပါတယ်။