စကမ ဖမ်းဆီးထားတဲ့ ရက္ခိုင်လူငယ်တွေကို AA နဲ့ တိုက်ခိုက်ရန် ရှေ့တန်းပို့ဆောင်နေ

အာရက္ခတိုင်းမ်စ် (၂၉ ဇန်နဝါရီ ၂၀၂၆)

စစ်ကော်မရှင်ရဲ့ ဖမ်းဆီးခြင်းခံထားရတဲ့ ရက္ခိုင်လူငယ်တွေကို အာရက္ခတပ်တော်နဲ့ တိုက်ခိုက်ရန်အတွက် ရှေ့တန်းကို ဆက်တိုက် ပို့ဆောင်နေတယ်လို့ သိရပါတယ်။

စစ်ကော်မရှင်က ရန်ကုန်၊ ဧရာဝတီ၊ ပဲခူး နဲ့ မန္တလေးတွင် ဖမ်းဆီးထားတဲ့ ရက္ခိုင်လူငယ်တွေကို စစ်သင်တန်းပေးကာ ယခုအခါ ရှေ့တန်းကို ပို့ဆောင်နေတာလည်း ဖြစ်ပါတယ်။

“စစ်တပ်က ရက္ခိုင်တွေကို ဆည်ဝက ဗျိုင်းစောင့်သလို ဖမ်းနေတာ။ ရက္ခိုင်ကို ပြန်တဲ့ လူငယ်တွေ၊ ရက္ခိုင်က ထွက်လာတဲ့ လူငယ်တွေကို စောင့်ဖမ်းတယ်။ ပြီးတော့ ရန်ကုန်၊ မန္တလေးမှာ အလုပ်လာလုပ်တဲ့ ကလေးတွေဖမ်းပြီး မှော်ဘီဖက်မှာ စစ်သင်တန်းပေးတယ်။ အခု သူတို့တွေကို AA နဲ့တိုက်ဖို့ ရှေ့တန်းကို ပို့နေတယ်” လို့ သတင်းရင်းမြစ်တဦးက အာရက္ခတိုင်းမ်စ်ကို ပြောပါတယ်။

ရှေ့တန်းပို့ခံထားရတဲ့ ရက္ခိုင်လူငယ်တချို့ တိုက်ပွဲတွင် သေဆုံးတာတွေလည်းရှိသလို အာရက္ခတပ်တော်ထံ အလင်းဝင်ရောက်တာတွေလည်း ရှိနေတယ်လို့ သိရပြီး တချို့လည်း ထွက်ပြေးလွတ်မြောက်သွားသူတွေလည်း ရှိတယ်လို့ သိရပါတယ်။

“ဂွဖက်ကတယောက်နဲ့ ကုလားပြင်ကတယောက်တော့ ထွက်ပြေးလို့ လွတ်လာတယ်။ အခုတော့ ရက္ခိုင်ထဲကို ရောက်သွားပြီ။ ကျနော်တို့တွေ ပိုက်ဆံစုဆောင်းပြီးတော့ ကူညီပေးလိုက်တာ၊ ထွက်ပြေးလာတဲ့ ကလေးတွေ ပြောပုံအရဆိုရင် ရှေ့တန်းကို တခါပို့ရင် အယောက် ၅၀ ကျော်တယ်ပြောခဲ့တယ်။ ကျနော်တို့လည်း ဒီမှာမထားရဲလို့ ချက်ခြင်းစီစဉ်ကူညီပြီး ရက္ခိုင်ဖက်ကို ပို့လိုက်တယ်” လို့ ဧရာဝတီတိုင်းရောက် ရက္ခိုင်စစ်ဘေးရှောင်တဦးက အာရက္ခတိုင်းမ်စ်ကို ပြောပါတယ်။

စစ်ကော်မရှင်အနေနဲ့ ဖမ်းဆီးခံထားရတဲ့ ရက္ခိုင်လူငယ်တွေကို မကွေးတိုင်းနယ်စပ်ဖြစ်တဲ့ အမ်း-ပဒါန်းလမ်းပိုင်းအနီးက နတ်ရေကန်ဗျူဟာကုန်းနဲ့ ဧရာဝတီတိုင်းနယ်စပ်ဖြစ်တဲ့ လေးမျက်နှာမြို့နယ်အတွင်းရှိ တိုက်ပွဲဖြစ်ပွားရာနေရာတွေကို ပို့ဆောင်နေတာလို့လည်း သိရပါတယ်။