စကမက စက်သုံးဆီချွေတာရေး စုံနံပါတ်ပါတဲ့ကားတွေ စုံရက်မှာပဲ မောင်းနှင်ရမယ်လို့ဆို

အာရက္ခတိုင်းမ်စ် (၄ မတ် ၂၀၂၆)

စစ်ကော်မရှင်ရဲ့ အမျိုးသားကာကွယ်ရေးနှင့်လုံခြုံရေးကောင်စီ သတင်းထုတ်ပြန်ရေးအဖွဲ့ကတော့ စက်သုံးဆီ ခြိုးခြံချွေတာသုံးစွဲရေးအတွက် ပုဂ္ဂလိကပိုင်ယာဉ်တွေဟာ လစဥ် စုံရက်တွေမှာ စုံအက္ခရာနဲ့ မ ရက်တွေမှာ မ အက္ခရာ နံပါတ်ပါယာဉ်တွေ မောင်းနှင်အသုံးပြုကြဖို့ ထုတ်ပြန်လာပါတယ်။

အဲဒီအစီအစဉ်ကိုတော့ မတ်လ ၇ ရက်နေ့မှ စတင်ကြဖို့ ပြောထားပြီး လက်ရှိ ကမ္ဘာ့နိုင်ငံရေးအခြေအနေတွေအရ အရှေ့အလယ်ပိုင်းဒေသအတွင်းမှာ စစ်ရေး ပဋိပက္ခများကြောင့် လောင်စာဆီတင်သွင်းတဲ့ သင်္ဘောတွေ သယ်ယူပို့ဆောင်ရာ ရေလမ်းကြောင်းတလျှောက်မှာ အတားအဆီး၊ အဟန့်အတား ပိတ်ဆို့မှုများ ဖြစ်ပေါ်လျက်ရှိတာကြောင့်လို့ သိရပါတယ်။

အဲဒီအခြေအနေတွေကြောင့် စက်သုံးဆီခြိုးခြံချွေတာရေးနဲ့ ဖူလုံမှုရှိစေရေးအတွက် စည်းကမ်းသတ်မှတ်လိုက်တာဖြစ်ပြီး လစဉ် “ စုံ” ရက်တွေမှာ စုံနံပါတ် အက္ခရာပါယာဉ်တွေ (ဥပမာ- 2A/—- 4A/—စသဖြင့်)၊ မ ရက်တွေမှာ မ နံပါတ်အက္ခရာပါတဲ့ယာဉ်တွေ (ဥပမာ-1A/—-3A/—- စသဖြင့်) ပုဂ္ဂလိကပိုင်ယာဉ်တွေ မောင်းနှင် အသုံးပြုကြရမှာပါ။

အဓိပ္ပါယ်ကတော့ တရက်ခြားစီပဲ မိမိရဲ့ကားကို အသုံးပြုခွင့်ရမှာ ဖြစ်ပါတယ်။

ချွင်းချက်အနေနဲ့ကတော့ စစ်ကော်မရှင်ခေါင်းဆောင် အရမ်းထိုးဖောက်ချင်နေတဲ့ EV မော်တော်ယာဉ်/ EV မော်တော်ဆိုင်ကယ်များမပါဘဲ EV မော်တော်ယာဉ်/ EV မော်တော်ဆိုင်ကယ်တွေကတော့ နေ့စဉ် မောင်းနှင်နိုင် ကြောင်း သိရပါတယ်။

အများပြည်သူ သယ်ယူပို့ဆောင်ရေးမော်တော်ယာဉ်တွေ၊ အငှါးယာဉ်တွေ (Taxi)၊ စက်သုံးဆီ သယ်ယူပို့ဆောင်တဲ့ယာဉ်တွေ၊ ဆောက်လုပ်ရေးလုပ်ငန်းသုံးယာဉ်တွေ၊ ကုန်စည်ပို့ဆောင်ရေးယာဉ်တွေ၊ လူနာတင်ယာဉ်/ နိဗ္ဗာန်ယာဉ်တွေနဲ့ စည်ပင်အမှိုက်သိမ်းယာဉ်တွေကတော့ နေ့စဉ် အသုံးပြုနိုင်ပါတယ်။

စည်းကမ်းသတ်မှတ်ချက်တွေဟာ ထပ်မံပြီးတစုံတရာ ထုတ်ပြန်မှု မရှိတဲ့အချိန်အထိ အတည်ဖြစ်ကြောင်းနှင့် စည်းကမ်းသတ်မှတ်ချက်များအား ဖောက်ဖျက် ကျူးလွန်ပါက တည်ဆဲဥပဒေတွေနဲ့အညီ အရေးယူဆောင်ရွက်သွားမယ်လို့လည်း ဆိုပါတယ်။

စက်သုံးဆီလုပ်ငန်းရှင်တွေသာမက အများပြည်သူအနေနဲ့ စက်သုံးဆီတွေ ဝယ်ယူ စုဆောင်းတာနဲ့ ဈေးနှုန်းမြှင့်တင် ရောင်းချတာတွေ လုံးဝမပြုလုပ်ဖို့လည်း ထည့်သွင်း ထုတ်ပြန်ထားပါတယ်။