စစ်တွေမှာ လက်နက်ကြီး အပိုင်းအစတွေ ၂ နေရာမှာ ထပ်တွေ့

အာရက္ခတိုင်းမ်စ် (၈ မတ် ၂၀၂၆)

ရက္ခိုင်ပြည်၊ စစ်တွေမြို့မှာ မတ်လ ၇ ရက်က စစ်တွေဆေးရုံကြီး သိုလှောင်ရုံမှာ လက်နက်ကြီးကျရောက်တာအပြင် စစ်တွေမြို့က တခြား နေရာ ၂ ခုမှာလည်း လက်နက်ကြီး အပိုင်းအစတွေ ကျရောက်သွားတာဖြစ်တယ်လို့ စစ်တွေ ဒေသခံတဦးက အာရက္ခတိုင်းမ်စ်ကို ပြောပါတယ်။

“စစ်တွေမှာက အခုက လူတွေက ပုံမှန်အတိုင်းပါပဲ။ မနက်ကတော့ ၄ နာရီခွဲ ၅ နာရီလောက်မှာ စစ်တွေ ဆေးရုံကြီးမှာ လက်နက်ကြီး ပြုတ်ကျတယ်ဆိုပြီး ကြားတယ်။ မီးသတ်ကားတွေ သွားတာလည်း ကြားတယ်။ ဆေးရုံကြီးမှာ ကျတယ်၊ ဂိုထောင်မှာ ကျတယ်လို့ ပြောကြတယ်။ နောက် နေ့ခင်းဘက် ၁၀ နာရီ ၁၁ နာရီမှာ ပြောသံကြားတာက အ.ထ.က (၄) ကျောင်းနားမှာ တလုံးကျပါတယ်တဲ့။ နောက်ပြီး အဓိဋ္ဌာန်ဆရာတော်ကြီး တည်ထားတဲ့ဘုရားနား၊ ကိုရီးယားဆိပ်ကမ်းနားမှာလည်း ကျခဲ့တာ အဲဒီနေရာမှာတော့ မြေအခေါင်းကြီး ဖြစ်သွားတယ်တဲ့။ စစ်တွေမြို့ထက်ကနေ ပစ်လိုက်တဲ့လက်နက်က လိုရင်းနေရာကိုမရောက်ဘဲနဲ့ စစ်တွေမြို့ထက်မှာ ဗုံးတွေ ခြူသွားလို့ ကျခဲ့တယ်ဆိုပြီး ပြောကြတယ်။ သူတို့မှာတော့ ဘယ်လိုပုံစံနဲ့ ပျက်လို့ ကျခဲ့လဲတော့မသိဘူး။ လူတွေ အသက်အန္တရာယ်တော့ တယောက်မှ မဖြစ်ခဲ့ဘူး။ သူတို့ကျတဲ့နေရာတွေက လူမရှိတဲ့ နေရာပိုင်းကျပါတယ်။ ဆေးရုံကတော့ ကံကောင်းတယ်ပြောရမယ်။ ဂိုထောင်မှာကျခဲ့လို့ ဂိုထောင်မှာသာ မကျခဲ့ဘူးဆိုရင် ဆေးရုံကလူတွေ ဒုက္ခရောက်ကြပါဖို့လေ” လို့ သူက ပြောပါတယ်။

မနက်အစောပိုင်းမှာ စစ်တွေဆေးရုံကြီးက သိုလှောင်ရုံကို ကျရောက်တဲ့ လက်နက်ကြီးရဲ့ ကိုယ်ထည် အပူရှိန်ကြောင့် မီးလောင်ကျွမ်းမှုဖြစ်ပွားခဲ့တာဖြစ်ပြီး လက်နက်ကြီးဟာ မပေါက်ကွဲသေးကြောင်းလည်း သိရပါတယ်။

ဒါကြောင့် အဲဒီလက်နက်ကြီးကို အမြန်ဖယ်ရှားဖို့အတွက် စစ်ကောင်စီတပ်တွေ လုပ်ဆောင်နေကြတယ်လို့လည်း သိရပါတယ်။

ဒါ့အပြင် လက်နက်ကြီးကျရာနေရာတွေကို လုံခြုံရေးတွေ တင်းကြပ်ထားကြောင်းလည်း သိရပါတယ်။

နိုင်ငံရေးနဲ့ စစ်ရေးလေ့လာသုံးသပ်သူတွေကတော့ အစိုးရသစ်မတက်လာခင် အချိန်အတွင်းမှာ အာရက္ခတပ်တော်အနေနဲ့ ကျန်တဲ့ နယ်မြေ ၃ ခုကို ရတဲ့နည်းနဲ့ တိုက်ခိုက်သိမ်းပိုက်သွားဖို့ရှိတယ်လို့ သုံးသပ်ထားကြပါတယ်။

အဲဒီလိုပဲ စစ်တွေမြို့အပြင်ဘက်မှာ စစ်ကောင်စီတပ်တွေနဲ့ အာရက္ခတပ်တော်တို့ တိုက်ပွဲပြင်းထန်နေကြကြောင်းလည်း သိရပါတယ်။