AA ချိပ်ပိတ်ထားတဲ့ အိမ်အချို့ကို ပြန်လည်ပေးအပ်

အာရက္ခတိုင်းမ်စ် (၂၉ မတ် ၂၀၂၆)

ရက္ခိုင်ပြည်က ချိပ်ပိတ်ခံထားရတဲ့ အိမ်တွေထဲက အိမ်အချို့ကို အာရက္ခပြည်သူ့တော်လှန်ရေးအစိုးရမှ ပြန်လည်ပေးအပ်ခဲ့တယ်လို့ သိရပါတယ်။

“ရက္ခိုပြည်အတွင်း အာရက္ခပြည်သူ့တော်လှန်ရေးအစိုးရကို ဆန့်ကျင်တဲ့ အဖွဲ့အစည်း၊ လူပုဂ္ဂိုလ်များနဲ့ ပတ်သက် ဆက်စပ်သူများ (သို့မဟုတ်) အကြမ်းဖက်အဖွဲ့အစည်း၊ အကြမ်းဖက်သမားများနဲ့ ပတ်သက်ဆက်စပ်သူများ ပိုင်ဆိုင်တဲ့ နေအိမ်၊ အဆောက်အအုံတချို့ကို မြိုသိမ်းတိုက်ပွဲအပြီး  နောက်ပိုင်းကာလများတွင် လုပ်ထုံးလုပ်နည်းများနဲ့အညီ ချိပ်ပိတ်ခြင်းများ ပြုလုပ်ထားခဲ့ရာ အိမ်ပိုင်ရှင်တချို့မှ ချိပ်ပိတ်ထားတဲ့ သူတို့ရဲ့ အိမ်များ ပြန်ရရီးအတွက် အာရက္ခပြည်သူ့တော်လှန်ရေးအစိုးရထံ သနားခံစာတင်လာသဖြင့် စနစ်တကျ စိစစ်ပြီးနောက် တချို့အိမ်များကို မူလအိမ်ပိုင်ရှင်များလက်သို့ ပြန်လည်လွှဲပြောင်း အပ်နှံပေးခဲ့တယ်” လို့ အာရက္ခမှုခင်းနဲ့ဆက်စပ်သတင်းများထုတ်ပြန်ရေး(DLEPS) က မတ်လ ၂၈ ရက်မှာ ထုတ်ပြန်ခဲ့ပါတယ်။

အဆိုပါ သနားခံစာ တင်ပြလာသူများအထဲတွင် ရက္ခိုင်ပြည် နေအိမ်ချိပ်ပိတ်ခံခဲ့ရတဲ့ ဦးလှသိန်း (အမည်လွှဲ) က “အာရက္ခပြည်သူ့အစိုးရ ချိပ်ပိတ်ထားတဲ့ အိမ်တွင် မိသားစုနဲ့အတူ ရိုးသားစွာ လုပ်ကိုင် စားသောက် နေထိုင်ခဲ့ပါတယ်၊ စစ်ကော်မရှင်အပါအဝင် ဆန့်ကျင်ဖက် အဖွဲ့အစည်းများနဲ့ လုံးဝ ဆက်စပ် ပတ်သက်မှုမရှိခဲ့ပါ၊ ဒါကြောင့် နေအိမ်တွင် ပြန်လည် နေထိုင်ခွင့်ပြုပါရန်” လျှောက်ထားရာ အာရက္ခပြည်သူ့တော်လှန်ရေးအစိုးရအနေနဲ့ လိုအပ်တဲ့ စိစစ်မှုများ ပြုလုပ်ကာ ချိပ်ပိတ်ထားတဲ့ ဦးလှသိန်းရဲ့ နေအိမ်ကို ချိပ်ပြန်ဖွင့်ပေးခဲ့ပြီး အိမ်ပိုင်ရှင်ထံ ပြန်လည်လွှဲပြောင်း ပေးအပ်ခဲ့တယ်လို့လည်း ဖော်ပြထားပါတယ်။

အဆိုပါ ကိစ္စနဲ့ပတ်သက်ပြီး အာရက္ခပြည်သူ့တော်လှန်ရေးအစိုးရ ပြောရေးဆိုခွင့်ရှိသူ ဦးခိုင်သုခက “မြို့သိမ်းတိုက်ပွဲတွေပြီးတဲ့ နောက်ပိုင်းမှာ ကျနော်တို့ တော်လှန်ရေးအစိုးရကို ဆန့်ကျင်တိုက်ခိုက်နေတဲ့ အဖွဲ့အစည်း၊ လူပုဂ္ဂိုလ်တွေနဲ့ ပတ်သက်ဆက်စပ်နေတဲ့လူတွေ၊ အကြမ်းဖက်အဖွဲ့အစည်း၊ အကြမ်းဖက်သမားနဲ့ ပတ်သက် ဆက်စပ်နေတဲ့လူတွေ ပိုင်ဆိုင်ထားတဲ့အိမ်၊ အဆောက်အအုံတွေကို အခြေအနေ လိုအပ်ချက်အရ ချိပ်ပိတ်ခဲ့ပါတယ်။ ဒီအပေါ်မှာ အိမ်ပိုင်ရှင်တွေဖက်က သူတို့အနေနဲ့ အပြစ်ကင်းကြောင်း အချက်အလက် အပြည့်အစုံနဲ့ အသနားခံစာ တင်ပြလာတဲ့အတွက် ကျနော်တို့ဖက်က ပြန်စိစစ်ပြီးတော့ အပြစ်ကင်းတယ်ဆိုရင် ချိပ်ပိတ်ထားတာကို ပြန်ဖွင့်ပြီ မူလပိုင်ရှင်လက်ကို လွှဲပြောင်းပေးလိုက်တာတွေ ရှိပါတယ်” လို့ ဆိုပါတယ်။

ဒါကြောင့် ချိပ်ပိတ်ခံထားရတဲ့ အိမ်များရဲ့ပိုင်ရှင်များအနေနဲ့ သူတို့ အမှန်အကန် အပြစ်ကင်းတယ်ဆိုပါက အပြစ်ကင်းကြောင်းကို အထောက်အထား၊ အချက်အလက် အပြည့်အစုံနဲ့ အာရက္ခပြည်သူ့တော်လှန်ရေးအစိုးရထံ အသနားခံစာ တင်ပြလျှောက်ထားနိုင်ပါတယ်လို့လည်း ဦးခိုင်သုခက ဆိုပါတယ်။

လက်ရှိတွင် နေအိမ်ချိပ်ပိတ်ခံထားရသူများအနက်မှ တချို့ဟာ စစ်ဘေးရှောင်ဘဝနဲ့ဖြစ်စေ၊ ကျန်းမာရေးအရ ဆေးကုသမှု ခံယူရန်ဖြစ်စေ၊ အခြားသော အကြောင်းကိစ္စ တခုခုကြောင့်ဖြစ်စေ နေရပ်စွန့်ခွာပြီး တခြားနေရာ ဒေသများကို ရောက်ရှိနေလို့ ချိပ်ပိတ်ခံထားရတဲ့ အိမ်များ ပြန်ရရေး လျှောက်ထားမှု မပြုနိုင်တဲ့ သူများလည်း ရှိနေတယ်လို့ သိရပါတယ်။