စစ်တွေလေကြောင်းလိုင်း ပြန်လည်ပြေးဆွဲ၊ လက်မှတ်တစောင် ၇ သိန်းခွဲဖြစ်

အာရက္ခတိုင်းမ်စ် (၃၀ မတ် ၂၀၂၆)

လေယာဉ်ဆီအခက်အခဲကြောင့် ပြည်တွင်းလေကြောင်းလိုင်း ပျံသန်းပြေးဆွဲမှုတွေကို ပြီးခဲ့တဲ့ ရက်သတ္တပတ်ကနေစပြီး ရပ်နားခဲ့ရာမှ လက်ရှိမှာ စစ်တွေအပါအဝင် မြို့တချို့ကို ပြန်လည် ပျံသန်းနေပြီ ဖြစ်တယ်လို့ သိရပါတယ်။

လေယာဉ်ပျံသန်းပြေးဆွဲမှု ယာယီမရပ်နားခင်အချိန်မှာ စစ်တွေရဲ့ လေယာဉ်လက်မှတ်ဈေးက ငွေကျပ် ၅ သိန်းကနေ ၆ သိန်းဝန်းကျင်သာ ရှိပေမယ့်လည်း လက်ရှိမှာတော့ ငွေကျပ် ၇ သိန်းခွဲ ဖြစ်တယ်လို့ စစ်တွေဒေသခံတယောက်က အာရက္ခတိုင်းမ်စ်ကို ​ပြောပါတယ်။

“ စစ်တွေကို ရောက်နေတဲ့ ALP ပါတီက ဒေါ်စောမြရာဇာလင်းတို့တောင် ပြန်သွားပြီ။ ၂၈ ရက်နေ့က ပြန်သွားတာ တွေ့တယ်။ ပြီးတော့ အခု လေယာဉ်လက်မှတ်ဈေးက ၇ သိန်းခွဲတဲ့။ အရင် လက်မှတ်ဝယ်ထားတဲ့သူတွေပေါ့ ပြီးတော့ တာဝန်ရှိတဲ့သူတွေကို ဦးစားပေးတယ်” လို့ ပြောပါတယ်။

စစ်တွေမြို့ဟာ အာရက္ခတပ်တော်နဲ့ စစ်ကော်မရှင်တပ်တို့ရဲ့ ပြီးခဲ့တဲ့ ၂၀၂၃ ခုနှစ် တကျော့ပြန် တိုက်ပွဲကာလကနေစပြီး လမ်းပန်းဆက်သွယ်ရေးအနေနဲ့ လေကြောင်းလိုင်းကိုပဲ အဓိက အသုံးပြုနေကြရတာ ဖြစ်ပါတယ်။

စစ်တွေမြို့အပြင် ရက္ခိုင်ပြည် မြို့တမြို့နဲ့တမြို့ သွားလာရေးကို စစ်ကော်မရှင်က ပိတ်ထားခဲ့တာဖြစ်ပြီး စစ်တွေဒေသခံတွေဟာ လေကြောင်းလိုင်းကနေတဆင့် ရန်ကုန်ကနေ ကျန်းမာရေးသုံး ဆေးဝါးနဲ့ အမဲသားလို အသားတွေကို သယ်ဆောင်ကြတာလို့ ဆိုပါတယ်။

စစ်ကော်မရှင်ရဲ့ ပို့ဆောင်ရေးနဲ့ ဆက်သွယ်ရေးဝန်ကြီးဌာနကတော့ ရက္ခိုင်ပြည်က စစ်တွေနဲ့ ကျောက်ဖြူ၊ ကချင်က ပူတာအိုနဲ့ မြစ်ကြီးနား၊ စစ်ကိုင်းက ခန္တီးနဲ့ ကလေးမြို့တွေက မဖြစ်မနေ ပျံသန်းပြေးဆွဲဖို့ လိုအပ်ပြီး ဦးစားပေး ပျံသန်းပြေးဆွဲသွားမယ်လို့ ထုတ်ပြန်ထားပါတယ်။

ပြည်တွင်းမှာ လေယာဉ်ဆီအခက်အခဲကြောင့် လေကြောင်းလိုင်း ​ပြေးဆွဲမှုတွေ ရပ်နားထားရပေမယ့် စစ်ကော်မရှင်ကတော့ နိုင်ငံတဝန်းက အပြစ်မဲ့ အရပ်သားပြည်သူတွေကို ပစ်မှတ်ထားပြီး နေ့စဉ်နဲ့အမျှ လေကြောင်းဗုံးကြဲမှုတွေ ပြုလုပ်လျက် ရှိနေတာ ဖြစ်ပါတယ်။