အာရက္ခတိုင်းမ်စ် (၁၉ ဧပြီ ၂၀၂၆)
ရက္ခိုင်ပြည်နဲ့ နယ်မြေချင်းထိကပ်နေတဲ့ ဘင်္ဂလားဒေ့ရှ်နိုင်ငံတွင် ဝက်သက် (Measles) ရောဂါ ကူးစက်ပျံ့နှံ့နေတာ တပတ်ကျော်လာပြီ ဖြစ်ပြီး ရောဂါ ကူးစက်ခံရသူတွေထဲမှာလည်း သေဆုံးတဲ့ လူပါရှိလာနေလို့ အာရက္ခပြည်သူ့ကျန်းမာရေးဌာနပ အခုလို အသိပေးလာတာဖြစ်ပါတယ်။
“ နယ်စပ်ချင်း ထိစပ်နေတဲ့ အာရက္ခပြည်၊ အထူးသဖြင့် မောင်တော၊ ဘူးသီးတောင် အပါအဝင် ရသေ့တောင်၊ ပေါက်တောမြို့အတွင်းက ဒေသခံပြည်သူတွေ နဲ့ ပလက်ဝဒေသဖက်က ပြည်သူတို့အနေနဲ့ အထူးသတိပြု နေကြရပါမယ်” လို့ အာရက္ခပြည်သူ့ကျန်းမာရေးဌာနက ဆိုပါတယ်။
ဝက်သက်ရောဂါဟာ လေထဲကတဆင့် (ချောင်းဆိုး၊ နှာချေတာကတဆင့်) အလွန်တရာ ကူးစက်လွယ်တဲ့ ရောဂါတမျိုး ဖြစ်ပြီး အသက်အရွယ်မရွေး ကူးစက်နိုင်ပါတယ်။ အထူးသဖြင့် ကာကွယ်ဆေး မထိုးရသေးတဲ့ ကလေးသူငယ်တွေကို အသက်အန္တရာယ် ပေးနိုင်တဲ့အထိ ပြင်းထန်တတ်ပါတယ်။
အဖျားကြီးခြင်း၊ ချောင်းဆိုးခြင်း၊ နှာရည်ယိုခြင်း၊ မျက်စိနီခြင်း၊ မျက်ရည်ပူကျခြင်း၊ ဖျားနာပြီး ၃ ရက် ၄ ရက် အတွင်း ခန္ဓာကိုယ်အနှံ့အပြားတွင် အနီစက်၊ အနီကွက်၊ အဖုအပိန့် ထွက်လာခြင်း၊ ပါးစပ်အတွင်း အဖြူရောင် အစက်ကလေးများ ပေါ်ပေါက်လာပါက အထူးသတိထားရန် လိုအပ်တယ်လို့ အာရက္ခပြည်သူ့ကျန်းမာရေးဌာနက အသိပေးထားပါတယ်။
ဝက်သက်ရောဂါ ကြိုတင်ကာကွယ်ရန်အတွက် ကာကွယ်ဆေးထိုးနှံခြင်း၊ ဝက်သက်ရောဂါပိုးရှိသူ၊ ဝက်သက်ပေါက်နေသူ၊ ဝက်သက်ရောဂါ သံသယရှိသူ တို့နဲ့ ထိတွေ့ဆက်ဆံခြင်းကို ရှောင်ကြဉ်ပါ၊ လူစုလူဝေး၊ လူထူထပ်တဲ့ နေရာတွေကို သွားလာတာ ရှောင်ကြဉ်ပါ၊ အပြင်က ပြန်လာတိုင်း၊ အစာမစားခင်တိုင်းမှာလက်ကို ဆပ်ပြာနဲ့ စင်အောင် ဆေးပါ၊ နှာခေါင်းစည်း (Mask) တပ်ဆင်ပါရန်လည်း အာရက္ခပြည်သူ့ကျန်းမာရေးဌာနက တိုက်တွန်းထားပါတယ်။
ကလေးသူငယ်တွေ အဖျားကြီးပြီး ခန္ဓာတခုလုံး အနီစက်/အနီကွက်၊ အဖုအပိန့်တွေ ထွက်လာပြီး ဝက်သက် သံသယလက္ခဏာ တွေ့လာပါက အိမ်မှာ ကိုယ့်သဘောနဲ့ ဆေးမကုဘဲ အနီးစပ်ဆုံး ဆေးရုံ၊ ဆေးခန်း၊ ကျေးလက်ကျန်းမာရေးဌာနကို အရင်ဆုံး သွာရောက် ပြသရန်နဲ့ ရောဂါဖြစ်နေတဲ့ ကလေးသူငယ်တွေကို အခြေားကလေးတွေနဲ့ ဿွားကစားခြင်း၊ စာသင်ကျောင်းကို မလွှတ်ပဲ အိမ်မှာထားထားရန်လည်း အာရက္ခပြည်သူ့ကျန်းမာရေးဌာနက ဆိုပါတယ်။
ဝက်သက် သံသယလူနာကို တွေ့ရှိပါက သက်ဆိုင်ရာ နဲ့ နီးစပ်ရာ အာရက္ခပြည်သူ့ကျန်းမာရေးဌာနကို ချက်ချင်း သတင်းပို့ပေးကြဖို့ မိတ္တာရပ်ခံ တိုက်တွန်းထားပါတယ်။