စစ်ကော်မရှင်ကြောင့် သာသနာရေးဆောင်ရွက်ရန် ပြင်းထန်စွာထိခိုက်ကြောင်း အာရက္ခပြည်သံဃာ့အကျိုးဆောင်အဖွဲ့ ဆို

အာရက္ခတိုင်းမ်စ် (၂၄ ဧပြီ ၂၀၂၆)

စစ်ကော်မရှင်ဟာ အကြမ်းဖက်မှုတွေ ကျူးလွန်နေတာကြောင့် သားသနာရေးဆောင်ရွက်ချက်များကို ပြင်းထန်စွာ ထိခိုက်စေတယ်လို့ အာရက္ခပြည်သံဃာ့အကျိုးဆောင်အဖွဲ့က ဧပြီလ ၂၄ ရက်မှာ ထုတ်ပြန်ခဲ့ပါတယ်။

“ သာသနာရေး၊ ဘာသာရေး အထွဍ်အထိပ် နေရာဖြစ်တဲ့ ဘုန်းတော်ကြီးကျောင်းကို ရည်ရွယ်ချက်ရှိရှိ ဗုံးကြဲတိုက်ခိုက်ခြင်းဟာ လူသားချင်းစာနာထောက်ထားမှူ၊ ဘာသာရေးလွတ်လပ်ခွင့်နဲ့ အပြည်ပြည်ဆိုင်ရာ လူ့အခွင့်အရေး အခြေခံမူများကို ဂရုမစိုက်ဘဲ ချိုးဖောက်တဲ့အပြင် သာသနာတော်အပေါ် တိုက်ရိုက် အကြမ်းဖက် ကျူးလွန်တာကြောင့် သံဃာတော်များရဲ့ ဘဝလုံခြုံရေးနဲ့ သာသနာရေး ဆောင်ရွက်ချက်များကို ပြင်းထန်စွာ ထိခိုက်စေပါတယ်” လို့ အာရက္ခပြည်သံဃာ့အကျိုးဆောင်အဖွဲ့ က ဆိုပါတယ်။

ရက္ခိုပြည် မြောက်ဦးမြို့နယ် ကျောက်ဆည်ပြင်ရွာကို စစ်ကော်မရှင်မှ ၂၀၂၆ ခုနှစ် ဧပြီလ ၁၉ရက် မနက် ၁ဝ နာရီတွင် ဂျက်ဖိုက်တာ ၁ စီးနဲ့ ပထမအကြိမ် ပေါင် ၅၀၀ ဗုံး ၂ လုံး ကြဲချတိုက်ခိုက်ပြီး နေ့လည် ၁၂ နာရီတွင် နောက်ထပ် ဂျက်ဖိုက်တာ ၁ စီးနဲ့ ဒုတိယအကြိမ် ပေါင် ၅၀၀ ဗုံး ၂ လုံးနဲ့ ကြဲချ တိုက်ခိုက်ခဲ့ပါတယ်။

အဆိုပါ ဗုံးကြဲတိုက်ခိုက်မှုကြောင့် ကျောက်ဆည်ပြင်ရွာရှိ ဘုန်းတော်ကြီးကျောင်းနဲ့ သိမ်ကျောင်းဆောင် မီးလောင်ပျက်စီးသွားပြီး သာမဏေ (၃) ပါးအပါအဝင် အပြစ်မဲ့အရပ်သားပြည်သူ ၁၃ ဦး ထိခိုက်ဒဏ်ရာရရှိကာ သာမဏေ ၃ ပါးအနက် တပါးမှာ ဆေးကုသခံယူရင်း ဘဝနတ်ထံ ပျံလွန်တော်မူခဲ့တယ်လို့ သိရပါတယ်။

အထက်ပါကဲ့သို့ သာသနာတော်အပေါ် အကြမ်းဖက်တိုက်ခိုက်မှု ဖြစ်စေတဲ့ အဆိုပါလုပ်ရပ်ကို အာရက္ခပြည်သံဃာထုတရပ်လုံးက အပြင်းအထန် ကန့်ကွက်ရှုံ့ချပြီး သာသနိက အဆောက်အအုံများနဲ့ သံဃာတော်များရဲ့ လုံခြုံရေးကို အပြည့်အဝ ကာကွယ်ပေးရန်၊ အကြမ်းဖက် တိုက်ခိုက်မှုများကို ချက်ချင်း ရပ်တန့်နိုင်ရန်နဲ့ စစ်ကော်မရှင်မှ အခုလို အစုလိုက်၊ အပြုံလိုက် သေဆုံး၊ ဒဏ်ရာရစေရန် တမင်တကာ ရည်ရွယ်ချက်ရှိရှိ ဗုံးကြဲတိုက်ခိုက်ခြင်း၊ အပြစ်မဲ့အရပ်သား ပြည်သူလူထုကို အဓိက ပစ်မှတ်ထားကာ စစ်ရာဇဝတ်မှု ကျူးလွန်နေခြင်းများကို နိုင်ငံတကာ အသိုင်းအဝိုင်းများနဲ့ အိမ်နီးချင်း နိုင်ငံများအနေနဲ့ နိုင်ငံတကာ တရားဥပဒေများနဲ့အညီ ထိခိုက်နစ်နာမှုများအတွက် တရားမျှတမှု ရရှိစေရန် ဆောင်ရွက်ပေးဖို့ တောင်းဆိုပါတယ်လို့လည်း အာရက္ခပြည်သံဃာ့အကျိုးဆောင်အဖွဲ့ က ဆိုပါတယ်။