စိုက်ပျိုးစီးပွားရေးဆိုင်ရာ စွန့်ဦးတီထွင်နိုင်တဲ့လူငယ်တွေ ထွက်ပေါ်လာဖို့အတွက် ASAP သင်တန်း ဖွင့်လှစ်ရခြင်းဖြစ်

အာရက္ခတိုင်းမ်စ် (၂၆ ဧပြီ ၂၀၂၆)

ရက္ခိုင်ပြည်က လွတ်မြောက်နယ်မြေတွင် ဒေသတွင်း စားနပ်ရိက္ခာဖူလုံရေးအတွက် Permaculture Institute Myanmar (PIM) က ရေရှည်တည်တံ့တဲ့ စိုက်ပျိုးရေးနဲ့ ပါမာကာချာ အဆင်မြင့်သင်တန်း (ASAP) ဖွင့်လှစ်သွားမယ်လို့ သိရပါတယ်။

ရေရှည်တည်တံ့တဲ့ စိုက်ပျိုးရေးနဲ့ ပါမာကာချာ အဆင်မြင့်သင်တန်း (ASAP) ဖွင့်လှစ်ရခြင်းဟာ စိုက်ပျိုးစီးပွားရေးဆိုင်ရာ စွန့်ဦးတီထွင်နိုင်တဲ့လူငယ်တွေ ထွက်ပေါ်လာဖို့အတွက် ရည်ရွယ်တာဖြစ်တယ်လို့ Permaculture Institute Myanmar (PIM) Program Director ဦးသန်းရွှေက အာရက္ခတိုင်းမ်စ်ကို ပြောပါတယ်။

“ ASAP program မျှော်မှန်းချက်က အဓိက ၃ ခု ရှိပါတယ်။ အဖွဲ့အစည်း၊ ပုဂ္ဂလိကကဏ္ဍနဲ့ ဌာနတွေမှာ ဝင်ရောက်လုပ်ကိုင်နိုင်ဖို့၊ ရေရှည်တည်တံ့တဲ့ စိုက်ပျိုးရေး အလေ့အကျင့်တွေကို လိုက်နာကျင့်သုံးပြီး ကိုယ်တိုင်နဲ့ မိမိသက်ဆိုင်ရာ ဒေသစိုက်ပျိုးရေး တိုးတက်မှုကို ဖော်ဆောင်နိုင်တဲ့ လူငယ်တွေ ဖြစ်လာဖို့၊ စိုက်ပျိုးစီးပွားရေးဆိုင်ရာ စွန့်ဦးတီထွင်နိုင်တဲ့ လူငယ်တွေ ဖြစ်လာကြဖို့ မျှော်မှန်းထားပါတယ်” လို့ ဦးသန်းရွှေက ဆိုပါတယ်။

ရေရှည်တည်တံ့တဲ့ စိုက်ပျိုးရေးနဲ့ ပါမာကာချာ အဆင်မြင့်သင်တန်း (ASAP) ကို ၂၀၂၆ ခုနှစ် ဇွန်လကနေ ၂၀၂၇ ခုနှစ် မတ်လ အထိ ၁၀ လတာ သင်းကြားပေးသွားမှာလည်း ဖြစ်ပါတယ်။

“ ASAP သင်တန်း ရဲ့ အဓိကရည်ရွယ်ချက်က အထက်တန်းပညာ ပြီးမြောက်သွားတဲ့ လူငယ်တွေ ပညာရေး အခွင့်အလမ်း ဆက်လက် ရရှိဖို့၊ လူငယ်တွေ အလုပ်အကိုင် အခွင့်အလမ်း ရရှိဖို့၊ ရက္ခိုင်ဒေသ စိုက်ပျိုးစီးပွားရေးနဲ့ အသက်မွေးဝမ်းကျောင်း ဖွံ့ဖြိုးတိုးတက်ရေေမှာ ဦးဆောင်ဦးရွက် ပြုနိုင်တဲ့ လူငယ်တွေ မွေးထုတ်ပေးနိုင်ဖို့ ဖြစ်ပါတယ်” လို့ Permaculture Institute Myanmar (PIM) Program Director ဦးသန်းရွှေက အာရက္ခတိုင်းမ်စ်ကို ပြောပါတယ်။

ရေရှည်တည်တံ့တဲ့ စိုက်ပျိုးရေးနဲ့ ပါမာကာချာ အဆင်မြင့်သင်တန်းကို လျောက်ထားလိုသူအနေနဲ့ အသက်အားဖြင့် ၁၈ နှစ်ကနေ ၂၅ နှစ်ကြား ဖြစ်ရပါမယ်။ စနစ်ဟောင်း ၁၀ တန်းအောင် (သို့) စနစ်သစ် ၁၂ တန်း အောင်မြင်ပြီးသူ ဖြစ်ရပါမယ်။ လူမှုရေးလုပ်ငန်းများတွင် ပါဝင်လုပ်ကိုင်ဖူးသူ ဖြစ်ရပါမယ်။ သင်တန်းပြီးဆုံးအောင် တတ်နိုင်သူဖြစ်ရပါမယ်။ ရေရှည်တည်တံ့တဲ့ စိုက်ပျိုးရေးကို စိတ်ပါဝင်စားပြီး တစိုက်မတ်မတ် လုပ်ကိုင်ဆောင်ရွက်လိုသူ နဲ့ သင်တန်းပြီးပါက မိမိဒေသတွင်း စားနပ်ရိက္ခာဖူလုံမှုနဲ့ ဖွံ့ဖြိုးရေးလုပ်ငန်းများတွင် တက်ကြွစွာ လုပ်ဆောင်ရန် စိတ်အားထက်သန်သူ ဖြစ်ရမယ်လို့ သိရပါတယ်။

သင်တန်းရွေးချယ်ခံရသူအနေနဲ့ သင်တန်းရေရှည်တည်တံ့ရေးနဲ့ အခြားအရေးပေါ် လိုအပ်တဲ့ အသုံးစာရိတ်တွေအတွက် ကျောင်းဝင်ကြေးအဖြစ် ကျောင်းသားတဦးလျင် ၃ သိန်း ကောက်ခံသွားမှာဖြစ်ပြီး ပေးသွင်းရန် ငွေကြေးအခက်အခဲရှိပါက ကျောင်းဝင်ကြေး ကင်းလွတ်ခွင့် လျောက်ထားနိုင်တယ်လို့လည်း သိရပါတယ်။

ရေရှည်တည်တံ့တဲ့ စိုက်ပျိုးရေးနဲ့ ပါမာကာချာ အဆင်မြင့်သင်တန်းကို လျောက်ထားလိုသူတွေအနေနဲ့ pim.contact26@gmail.com သို့မဟုတ် https://www.facebook.com/permainstitutemm/ မက်ဆန်ဂျာကနေ ဆက်သွယ်လျောက်ထားနိုင်တယ်လို့ သိရပါတယ်။