အာရက္ခတိုင်းမ်စ် (၄ မေ ၂၀၂၆)
ရက္ခိုင်ပြည် မာန်အောင်မြို့ကနေ ရန်ကုန်ကို လေယာဉ်လက်မှတ်ခ ငွေကျပ် ၁၅ သိန်းအထိ ပေါက်ဈေးဖြစ်နေတယ်လို့ သိရပါတယ်။
“ တရားဝင် သတ်မှတ်ထားတာက ၆ သိန်း ၃ သောင်းကျပ်ပါ။ ဒါပေမယ့် တကယ်ဝယ်တဲ့အခါ ရန်ကုန်ကနေ မာန်အောင်ကို ၈ သိန်း၊ မာန်အောင်ကနေ ရန်ကုန်ကို ၁၅ သိန်း ပေးနေရပါတယ်” လို့ မာန်အောင်မြို့ဒေသခံတဦးက အာရက္ခတိုင်းမ်စ်ကို ပြောပါတယ်။
၂၀၂၆ ခုနှစ် ဧပြီလ ၂၄ ရက်က စတင်ကာ ရန်ကုန်ကနေ မာန်အောင်နဲ့ ကျောက်ဖြူကို တပတ် ၃ ရက်နှုန်းနဲ့ လေယာဉ်ပြန်လည် ပြေးဆွဲပေးနေတာလည်း ဖြစ်ပါတယ်။
ပြေးဆွဲမယ့်နေ့နဲ့ ခရီးစဉ်တွေကတော့ တနင်္လာနေ့တွင် ရန်ကုန်-မာန်အောင်-ကျောက်ဖြူ-ရန်ကုန် ဖြစ်ပြီး ဗုဒ္ဓဟူးနေ့မှာတော့ ရန်ကုန်-ကျောက်ဖြူ-မာန်အောင်-ရန်ကုန်ဖြစ်ကာ သောကြာနေ့မှာတော့ ရန်ကုန်-မာန်အောင်-ကျောက်ဖြူ-ရန်ကုန် စသဖြင့် ဖြစ်တယ်လို့ သိရပါတယ်။
ယခုလို ပြေးဆွဲတာဟာ အာဏာသိမ်း စစ်ခေါင်းဆောင် သမ္မတ မင်းအောင်လှိုင်က အမိန့်ပေးလို့ ပြေးဆွဲရတာဖြစ်တယ်လို့ မြန်မာအမျိုးသားလေကြောင်းက ထုတ်ပြန်ပါတယ်။
မာန်အောင်မြို့ကို ၂၀၂၁ ခုနှစ် အာဏာမသိမ်းခင်က ရန်ကုန်- မာန်အောင်- စစ်တွေ-ကျောက်ဖြူ လေကြောင်းခရီးစဉ်များအား လေယာဉ်ငယ်များဖြင့် ပြေးဆွဲမှုရှိခဲ့သော်လည်း အာဏာသိမ်းပြီးနောက်ပိုင်းမှာ လေယာဉ်ပြေးဆွဲမှု ရပ်တန့်ခဲ့တာလည်း ဖြစ်ပါတယ်။
မတ်လ ၂၄ ရက်က နေပြည်တော်တွင် ပြုလုပ်တဲ့ အစည်းအဝေးတွင် အာဏာသိမ်း စစ်ခေါင်းဆောင် သမ္မတ မင်းအောင်လှိုင်က ရက္ခိုင်ပြည်အတွင်းရှိ စစ်တွေ၊ မာန်အောင်နဲ့ ကျောက်ဖြူမြို့တွေကို လေကြောင်းလိုင်းများ မဖြစ်မနေ ပြေးဆွဲရန် အမိန့်ပေးခဲ့တယ်လို့ သိရပါတယ်။