ပဒါန်းက စစ်ကူလာတဲ့ စစ်ကူ ကား ၂ စီး AA စောင့်ကြိုတိုက်ခိုက်၊ လက်နက်နဲ့ အလောင်းအချို့ ရရှိ

အာရက္ခတိုင်းမ်စ် (၂၉ မေ ၂၀၂၆)

မကွေးတိုင်း ငဖဲမြို့နယ်ရှိ နတ်ရေကန်ဗျူဟာကုန်းကို ပဒါန်းမြို့နယ်မှာရှိတဲ့ အမှတ် ၉၀၅ အမြောက်စခန်းကွပ်ကဲမှုဌာနချုပ် (အမတ) ကနေ စစ်ကူ စစ်ကား ၂ စီး ပို့ဆောင်တာကို အာရက္ခတပ်တော်နဲ့ ပူးပေါင်းမဟာမိတ်တပ်တို့ စောင့်ကြိုတိုက်ခိုက်ခဲ့လို့ လက်နက်ခဲယမ်းနဲ့ အလောင်းအချို့ ရရှိခဲ့တယ်လို့ သိရပါတယ်။

“ပဒါန်းတပ်ကနေ စစ်ကူ ယာဉ်တန်း ၂ စီးလာတာကို မိုင်တိုင်အမှတ် ၁၅ နဲ့ ၁၆ ကြားမှာ AA နဲ့အဖွဲ့က စောင့်ပြီးတိုက်တာ။ လက်နက်ကြီး၊ လက်နက်ငယ်တွေရော အလောင်းတချို့ကော ရခဲ့တယ်” လို့ မြေပြင်စစ်ရေးသတင်းရင်းမြစ်တဦးက အာရက္ခတိုင်းမ်စ်ကိုပြောပါတယ်။

ရွေးတုအစိုးရက ရက္ခိုင်ပြည်ရဲ့ ဝင်ပေါက် ထွက်ပေါက်တွေကို ပြန်လည်ထိန်းချုပ်နိုင်ရန် မကွေးတိုင်းက ငဖဲနဲ့ မင်းတုန်းမြို့နယ်ကို နယ်မြေပိတ်ဆို့ရေးအတွက် အားစိုက်ပြုလုပ်လာနေတယ်လို့ သိရပါတယ်။

“အခုပဲ ရွှေစက်တော်လမ်းလေ၊ မင်းဘူးနဲ့ ပဒါန်းလမ်းက ဇီးအိုင်နဲ့ လေးပင်အကြားက ကျွန်းဖျားရွာ တဝိုက်မှာ တိုက်ပွဲတွေ ဖြစ်နေတယ်” လို့ သူက အာရက္ခတိုင်းမ်စ်ကို ဆက်ပြောပါတယ်။

နတ်ရေကန် ဗျူဟာကုန်းကို စစ်ကော်မရှင်တပ်က ပဒါန်းတပ်နယ်ရှိ အမှတ် ၉၀၅ အမြောက်စစ်ဆင်ရေးကွပ်ကဲမှုဌာနချုပ်၊ အမှတ် ၃၇၅ အမြောက်တပ်ရင်းနဲ့ အမှတ် ၄၀၉ အမြောက်တပ်ရင်းတွေကနေ စစ်အင်အားတွေ အဆက်မပြတ် ပို့ဆောင်နေတယ်လို့လည်း သိရပါတယ်။

အဆိုပါ ဗျူဟာကုန်းအနီးက ကာကင်းစခန်းတွေဖြစ်တဲ့ အမ်း – ပဒါန်းလမ်းပိုင်းက မထုံး၊ လင်းတဲ၊ စွန်တက်၊ ဂုတ်စည်း၊ ကံမြင့်ကန်၊ ဂုတ်ကြီး၊ ကြက်ရေစမ်း၊ ပိန်ရေစမ်းနဲ့ ပဇီကျေးရွာတွေကို အာရက္ခတပ်တော် နဲ့ ပူးပေါင်းမဟာမိတ်တပ်တွေက သိမ်းပိုက်ထိန်းချုပ်ထားတာလည်း ဖြစ်ပါတယ်။

မကွေးတိုင်းအစပ် နတ်ရေကန်ဗျူဟာကုန်းကို အာရက္ခတပ်တော်နဲ့ ပူးပေါင်းမဟာမိတ်တပ်တွေဖြစ်တဲ့ ချင်းကာကွယ်ရေးတပ်၊ အရှိုချင်းကာကွယ်ရေးတပ်၊ မကွေးတိုင်းအခြေစိုက် PDF တပ်ရင်း၊ ကျောင်းသားလက်ရုံးတပ်တော် (SAF)၊ ပြည်သူ့လွတ်လပ်ရေးတပ်တော် (PIA)၊ လူထုတော်လှန်ရေးမဟာမိတ်အင်အားစု PRA (မကွေး) တပ်တွေက ပူးပေါင်းကာ ထိုးစစ်ဆင် တိုက်ခိုက်နေတာလည်း ဖြစ်ပါတယ်။