အာရက္ခတိုင်းမ်စ် (၁၂ နိုဝင်ဘာ ၂၀၂၆)
မလေးရှားနိုင်ငံရောက် အိမ်ကြီးရက္ခိုင်မျိုးဆက်သစ်လူငယ်ပရဟိတအသင်းနဲ့ SUNWAY-FC ဘောလုံးအသင်းတို့ ပူးပေါင်းဦးဆောင်တဲ့ ရန်ပုံငွေရှာဖွေရေး ဘောလုံးပြိုင်ပွဲကို နိုဝင်ဘာလ ၁၀ ရက်မှာ မလေးရှားနိုင်ငံ၊ ဂျိုဟိုးမြို့မှာ ကျင်းပခဲ့ပြီး မြန်မာငွေကျပ် ၁၇၅ သိန်း ရရှိခဲ့ကြောင်း သိရပါတယ်။
ရရှိခဲ့တဲ့ငွေကို ရက္ခိုင်ပြည်က စားဝတ်နေရေး အခက်အခဲ ကြုံနေရတဲ့ စစ်ဘေးရှောင်တွေကို အိမ်ကြီးရက္ခိုင်မျိုးဆက်သစ်လူငယ်ပရဟိတအသင်းက ဦးဆောင်ပြီး တိုက်ရိုက်လှူဒါန်းသွားမယ်လို့ သိရပါတယ်။
ဒီပြိုင်ပွဲက အဲဒီအသင်းနှစ်သင်း တည်ထောင်တာ တစ်နှစ်ပြည့် အထိမ်းအမှတ်အဖြစ် ကျင်းပတာဖြစ်ပြီး ရက္ခိုင်လူငယ် အမျိုးသားဘောလုံးအသင်း ၂၈ သင်းနဲ့ အမျိုးသမီးအသင်း ၃ သင်း ပါဝင်ယှဉ်ပြိုင်ခဲ့ကြတယ်လို့ SUNWAY-FC ဘောလုံးအသင်းထံက သိရပါတယ်။
ပြိုင်ပွဲမှာ အမျိုးသားအသင်းတွေထဲက ပထမဆု မလေးရှားငွေ ၇,၀၀၀ ရင်းဂစ်ကို 528 Brother-FC အသင်း၊ ဒုတိယဆု ၅,၀၀၀ ရင်းဂစ်ကို RAKHA BYALA-FC အသင်းနဲ့ တတိယဆု ၃,၀၀၀ ရင်းဂစ်ကို လခြင်းမြေ-FC အသင်းတို့ ရရှိခဲ့ကြပြီး အမျိုးသမီးအသင်း ပထမဆု ၁,၀၀၀ ရင်းဂစ်ကို ဝံလက်ငှက်ချေအသင်းက ရရှိခဲ့ပါတယ်။
UNHCR ရဲ့ အောက်တိုဘာလ ၂၀၂၆ စာရင်းအရ ရက္ခိုင်ပြည်မှာ စစ်ဘေးရှောင် ၅၀၇,၈၀၀ ဦး ရှိပါတယ်။