ကျိန္တလီကို ဂျက်ဖိုက်တာနဲ့ လာပစ်၊ ၂ ဦး သေဆုံး
အာရက္ခတိုင်းမ်စ် (၁၃ ဖေဖော်ဝါရီ ၂၀၂၅)
ရက္ခိုင်ပြည် ကျိန္တလီမြို့ကို ဒီနေ့ နေ့လည် ၁၂ နာရီလောက် ဂျက်ဖိုက်တာနဲ့ လာရောက်ပစ်ခတ်လို့ ဒေသခံပြည်သူ ၂ ဦး သေဆုံးခဲ့တယ်လို့ ကနဦး သိရပါတယ်။
“မိန်းမတစ်ယောက် နဲ့ ကလေးတစ်ယောက် ဆုံးသွားတယ်။ အမှတ် (၃) သဖန်းကွင်း ကို လာရောက် ပစ်တာပါ” လို့ ဂွမြို့နယ်ဒေသခံတစ်ဦးက အာရက္ခတိုင်းမ်စ်ကို ပြောပါတယ်။
အလားတူ ပြည်ထောင်စုနေ့ဖြစ်တဲ့ မနေ့ကလည်း ကျိန္တလီမြို့ကို စစ်ကောင်စီက ဗုံးလာကြဲသဖြင့် တစ်ဦး ဒဏ်ရာရရှိခဲ့ပြီး နေအိမ် ၃ လုံးထက်မနည်း ပျက်စီးခဲ့ပါတယ်။
စစ်ကောင်စီဟာ ဂွမြို့နယ်အတွင်းရှိ ကံ့ကော်တောင်ကျေးရွာကို ၄ရက်နေ့က တစ်ကြိမ်၊ ကျိန္တလီမြို့ကို ၈ရက်နေ့က တစ်ကြိမ် နဲ့ ဘဝင်ကျေးရွာကို ၁၀ရက်နေ့က တစ်ကြိမ် ဗုံးကြဲခဲ့ပါတယ်။