ရန်ကုန်တွင် ကိုဗစ် – ၁၉ လူနာအသစ် တွေ့

အာရက္ခတိုင်းမ်စ် (၂၁ မေ ၂၀၂၅)

ရန်ကုန်တိုင်းဒေသကြီး လှိုင်မြို့နယ်မှာ COVIT -19 ဓာတ်ခွဲအတည်ပြု လူနာသစ်တစ်ဦး တွေ့ရှိထားတယ်လို့ မေ ၂၀ ရက်နေ့က မြန်မာနိုင်ငံ ရောဂါကာကွယ်ထိန်းချုပ်ရေးဗဟိုဌာန ပြည်သူ့ကျန်းမာရေးဦးစီးဌာန ကျန်းမာရေးဝန်ကြီးဌာနက ထုတ်ပြန်ထားပါတယ်။

လက်ရှိမှာ ကိုဗစ် – ၁၉ လူနာသစ်တစ်ဦး တွေ့ရှိထားသော်လည်း သေဆုံးသူမရှိသေးတာကိုလည်း သိရပါတယ်။

အခုအချိန်မှာ ကိုဗစ်-၁၉ ရဲ့မျိုးကွဲများဖြစ်တဲ့ JN.1 အုပ်စု မှာ အလွန်လျှင်မြန်စွာ ကူးစက်တဲ့ အခြေအနေတစ်ခု ဖြစ်ပါတယ်။

ထိုင်း၊ စင်ကာပူ၊ တရုတ်၊ ဟောင်ကောင်တို့မှာ ကူးစက်မှု မြင့်တက်လာနေတယ်လို့ The Nation သတင်းဌာနက ဖော်ပြထားပါတယ်။

ထိုင်းနိုင်ငံမှာ COVID-19 ကူးစက်ခံရသူ စုစုပေါင်း ၇၁၀၆၇ ဦး ရှိနေပါတယ်။ ၂၀၂၅ ခုနှစ် ဇန်နဝါရီလ ၁ ရက် ကနေ မေလ ၁၄ ရက် အတွင်း သေဆုံးသူ ၁၉ ဦး ရှိတယ်လို့ ထိုင်းအစိုးရရဲ့ ကိုဗစ် -၁၉ အချက်အလက်စင်တာထံမှ သိရပါတယ်။ ထိုင်းမှာ ရောဂါဖြစ်ပွားမှု အရေအတွက် ဆက်လက်မြင့်တက်နေတယ်လို့လည်း သိရပါတယ်။

မြန်မာနိုင်ငံ ကျန်းမာရေးဝန်ကြီးဌာနာကလည်း အပြည်ပြည်ဆိုင်ရာလေဆိပ်၊ ဆိပ်ကမ်း နဲ့ နယ်စပ် ဝင်/ထွက်ပေါက်များတွင် အဖျားရောဂါလက္ခဏာ စောင့်ကြပ်ကြည့်ရှုတာတွေ၊ တိုင်းဒေသကြီး/ပြည်နယ်ပြည်သူ့ကျန်းမာရေးဦးစီးဌာနများ၊ ဆေးရုံများတွင် အဖျားရောဂါလက္ခဏာ စောင့်ကြပ် ကြည့်ရှုတာတွေ သံသယလူနာ တွေ့ရှိပါက ဆေးရုံများတွင် သံသယလူနာများ သီးခြားထားရှိ ကုသနိုင်ရန် ကြိုတင်ပြင်ဆင်ခြင်းတို့ကို ဆောင်ရွက်နေတယ်လို့လည်း သိရပါတယ်။

ထို့ကြောင့် မိဘပြည်သူများအနေနဲ့ စနစ်တစ်ကျ လက်ဆေးခြင်း၊ နာချေ ချောင်းဆိုးရာမှာ ပါးစပ်နဲ့ နှာခေါင်းကို လုံခြုံအောင် ဖုံးအုပ်ခြင်း၊ Mask စနစ်တကျ တပ်ဆင်ခြင်း၊ ကာကွယ်ဆေးစနစ်တကျ ထိုးခြင်း၊ တက်နိုင်သမျှ လူစုလူဝေး ရှောင်ခြင်းတို့ကို တက်နိုင်သလောက်ပြုလုပ်ပြီး ဖျားခြင်း၊ နှာစေးခြင်း၊ လည်ချောင်းနာခြင်း၊ ချောင်းဆိုးခြင်း၊ အသက်ရှုကြပ်ခြင်းတွေ ခံစားနေရပါက နီးစပ်ရာ ဆေးခန်း၊ ဆေးရုံများကို အမြန်ဆုံး သွားရောက်ဖို့ကိုလည်း ကျန်းမာရေးဝန်ကြီးဌာနက တိုက်တွန်းထားပါတယ်။