ငါးရှာထွက်တဲ့ ကျိန္တလီသား ၂ ဦး ရေနှစ်ပျောက်ဆုံး၊ ၆ ကြာ ထိ ရှာမတွေ့သေး

အာရက္ခိုင်းမ်စ် (၂၇ ဇူလိုင် ၂၀၂၅)

ရက္ခိုင်ပြည် ဂွမြို့နယ် ကျိန္တလီမြို့က ဒေသခံပြည်သူ ၂ ဦးဟာ ဇူလိုင်လ ၂၂ ရက် မနက်ပိုင်းက ငါးရှာထွက်ရာကနေ ရေနစ်မြုပ်ပျောက်ဆုံးနေပြီး ၆ ကြာတဲ့အထိ ရှာမတွေ့သေးဘူးလို့ ဒေသခံတွေက အာရက္ခတိုင်းမ်စ်ကို ပြောပါတယ်။

“သွားတာက ၃ ယောက် သွားတာ။ ကျိန္တလီကို ပြန်အဝင်မှာ လေပြင်းတိုက်လို့ ငါးဖမ်းလှေ မြုပ်သွားတယ်။ တယောက်ကတော့ ရေကူးကျွမ်းကျင်တော့ ကမ်းကို ကူးလာနိုင်တယ်။ နှစ်ယောက်က ပျောက်နေတယ်။ အခုထိကို ရှာလို့ မတွေ့သေးဘူး” လို့ ကျိန္တလီမြို့ ဒေသခံ တဦးက ပြောပါတယ်။

ရေနှစ်ပျောက်ဆုံးနေသူမှာ ကျိန္တလီမြို့ အမှတ် ၂ ရပ်ကွက်နေ ဦးဝင်းရွှေ နဲ့ အသေးလေးတို့ဖြစ်ပြီး ရေကူးလွတ်မြောက်လာသူမှာ ဦးသန်းလွင် ဖြစ်တယ်လို့လည်း သိရပါတယ်။

“မိုးကြီး၊ လေကြီးမယ်ဆိုတာတော့ သိရတယ်။ အုပ်ချုပ်ရေးပိုင်းကလည်း လိုက်လံ ပြောထားတာတွေရှိတယ်။ ဒါပေမယ့် စားဝတ်နေရေးအရ သွားရှာကြတာ။ အခုထိ ရွာကလူတွေ လိုက်ရှာနေကြတုန်းပဲ” လို့ ကျိန္တလီဒေသခံ တဦးက အာရက္ခတိုင်းမ်စ်ကို ပြောပါတယ်။

ရက္ခိုင်ပြည်တွင်  ဇူလိုင်လ ၂၂ ရက် ညနေ ၆ နာရီက စတင်ပြီး ဇူလိုင်လ ၂၈ ရက်အထိ နေရာစိပ်စိပ်ကနေ နေရာအနှံ့အပြား မိုးထစ်ချုန်းရွာပြီး နေရာကွက်ကြား မိုးကြီးနိုင်တယ်လို့ မိုးလေဝသဌာနက ထုတ်ပြန်ထားပါတယ်။

အလားတူ မိုးသက်လေပြင်းကျရောက်ပြီး လှိုင်းကြီးရာကနေ လှိုင်းအလွန်ကြီးနိုင်တယ်လို့လည်း သိရပါတယ်။

ပင်လယ်တွင်လည်း လေတိုက်နှုန်းမှာ တနာရီကို မိုင် ၄၀ ကနေ ၄၅ မိုင် အထိ တိုက်နိုင်ပြီး လှိုင်း အမြင့်မှာ ၁၀ ပေကနေ ၁၆ ပေ အထိ ရှိနိုင်တယ်လို့လည်း မိုးဇလက ထုတ်ပြန်ထားပါတယ်။