အာရက္ခတိုင်းမ်စ် (၁၆ ဩဂုတ် ၂၀၂၅)
စစ်ကော်မရှင်ရဲ့ နေဗီကနေ သြဂုတ်လ ၁၄ ရက် ညနေပိုင်းက ပစ်ခတ်လိုက်တဲ့ လက်နက်ကြီးကြောင့် ကျောက်ဖြူမြို့နယ် လိပ်ခမော်ရွာဟောင်းက ဒေသခံပြည်သူတဦး သေဆုံးခဲ့တယ်လို့ သိရပါတယ်။
“လိပ်ခမော်ရွာသစ်နဲ့ ဂေါ်တူရွာကြးမှာ ရပ်ထားတဲ့ နေဗီကနေ လိပ်ခမော်ရွာဟောင်းကို လက်နက်ကြီးနဲ့ ၅ လုံး ပစ်ခတ်တာ” လို့ ကျောက်ဖြူမြို့နယ်ဒေသခံတဦးက အာရက္ခတိုင်းမ်စ်ကို ပြောပါတယ်။
အဆိုပါ စစ်ကော်မရှင်ရဲ့ နေဗီကနေ ပစ်ခတ်မှုကြောင့် ကျောက်ဖြူမြို့နယ် လိပ်ခမော်ရွာဟောင်းက အသက် ၄၀ အရွယ် ဦးခင်မောင်ချစ်ဟာ လက်နက်ကြီးထိမှန်လို့ သေဆုံးခဲ့ပါတယ်။
“သူတို့ (စစ်ကော်မရှင်) ပစ်လိုက်တဲ့ လက်နက်ကြီးတွေကြောင့် နွားအကောင်ရေ ၁၄ ကောင်လောက် သေဆုံးသွားတယ်” လို့ သူက အာရက္ခတိုင်းမ်စ်ကို ထပ်မံပြောပါတယ်။
စစ်ကော်မရှင်အနေနဲ့ ကျောက်ဖြူမြို့နယ်က ကျေးရွာ ၁၀ ရွာ ထပ်မနည်းကို မီးရှို့ဖျက်စီးခဲ့ပြီး လေကြောင်းကလည်း ဗုံးကြဲချခြင်း၊ ဒရုန်းများနဲ့ လာရောက်ဗုံးကြဲခြင်းများ ဆက်တိုက်ပြုလုပ်နေပြီး စစ်ကော်မရှင်ရဲ့ တယ်လီဂရမ်ကနေ အောင်ပွဲရ ပြန်သိမ်းနိုင်နေပြီဖြစ်ကြောင်း ဝါဒဖြန့်တာတွေ ဆက်တိုက် လုပ်ဆောင်နေကြောင်း သိရပါတယ်။
ဓာတ်ပုံ – စစ်ကော်မရှင် ဝါဒဖြန်နေပုံ