ရွေးကောက်ပွဲအတွက် ကြိုတင်မဲကို ပြည်ပရောက်မြန်မာတွေ စိတ်ဝင်စားမှုမရှိ

အာရက္ခတိုင်းမ်စ် (၂၉ ဩဂုတ် ၂၀၂၅)

ရွေးကောက်ပွဲအတွက် ကြိုတင်မဲကို ပြည်ပရောက်မြန်မာတွေ စိတ်ဝင်စားမှုမရှိဘူးလို့ ထိုင်းမှာ ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူ ဦးအောင်ကျော်က အာရက္ခတိုင်းမ်စ်ကို ပြောပါတယ်။

ပြည်ပနိုင်ငံတွေကို ရောက်ရှိနေတဲ့ မြန်မာနိုင်ငံသားတွေအနေနဲ့ ကြိုတင်မဲပေးနိုင်ဖို့အတွက် ကိုယ်ရေးအချက် အလက်တွေကို ဖော်ပြပြီး သက်ဆိုင်ရာသံရုံးတွေကို ပေးပို့တောင်းဆိုရမယ်လို့ အကြမ်းဖက်စစ်တပ်က ဖွဲ့စည်းထားတဲ့ ပြည်ထောင်စု ရွေးကောက်ပွဲ ကော်မရှင်က သြဂုတ် ၂၁ ရက်မှာ ထုတ်ပြန်ပါတယ်။

ဦးအောင်ကျော်က “အလုပ်သမားတွေရဲ့ ကိုယ်ရေးရာဇဝင်အကုန်လုံးကို ရယူမယ်ဆိုတာက ၂၀၂၀ မှာတုန်းကလည်း ကျနော်တို့ အဲဒီလောက်ကြီး ပေးစရာမလိုဘူး။ အမည်နာမည်၊ အဖအမည်၊ နေရပ်လိပ်စာနဲ့ လက်ရှိ ပိုင်ဆိုင်ထားတဲ့ အမျိုးသားမှတ်ပုံတင် ဒါလေးနဲ့ပဲ သွားတာပါ။ အခု ဒီတစ်ခေါက်လုပ်မယ့်ဟာကတော့ ဒီထက်ပိုမိုပြီးမှ ပြည့်စုံတဲ့အချက်အလက်တွေကို ကောက်ယူမယ်ဆိုရင် သဘာဝမကျဘူးလို့ ယူဆတယ်။ နောက်ပြီး ကျနော့်အမြင်ကို ပြောချင်တာက ပုံစံ (၁၅)ကို အမြန်ဆုံးသွားယူပြီးမှ ကြိုတင်မဲတွေပေးကြပါ ဆိုတာကလည်း လက်တွေ့မကျတဲ့အရာပါ။ တစ်တိုင်းပြည်လုံးမှာ ဖြစ်ပျက်သမျှအရာတွေကို နိုင်ငံတကာမှာရောက်နေတဲ့ မြန်မာနိုင်ငံသားအားလုံးက သိထားပြီးအတွက်ကြောင့် မဲပေးဖို့ဆန္ဒဆိုတာ ၂၀၂၀ တုန်းက ဒီလိုအချိန်မျိုးဆိုလူတွေက ကြိတ်ကြိတ်တိုး အလုအယက်ကို အုံကြွနေကြပြီ။ အခုအချိန်မှာ မည်သူ တစ်ဦးတစ်ယောက်မှ စိတ်ဝင်စားမှုမရှိတဲ့အတွက်ကြောင့် ဖြစ်မြောက်နိုင်စရာ မရှိဘူးလို့ပဲ ပြောချင်ပါတယ်” လို့ သူက ပြောပါတယ်။

ကြိုတင်မဲပေးဖို့ တောင်းဆိုသူရဲ့ ပြည်တွင်းနေရပ်လိပ်စာ အပြည့်အစုံအပါအဝင် လက်ရှိရောက်နေတဲ့ နိုင်ငံမှာ နေထိုင်တဲ့ လိပ်စာတွေကိုပါ ဖြည့်စွက်ရမယ့် ပုံစံ (၁၅) မှာ အချက်အလက်ဖြည့်ပြီး သြဂုတ်လ ၂၂ ရက်ကနေ စက်တင်ဘာလ ၈ ရက်အထိ သံရုံးတွေကို ပေးပို့ရမှာပါ။

မြန်မာနိုင်ငံသား သန်းနဲ့ချီရှိတဲ့ ထိုင်းနိုင်ငံရဲ့ ဘန်ကောက်မြို့အခြေစိုက် စစ်ကော်မရှင်သံရုံးကလည်း ပုံစံ ၁၅ ဖြည့်ပြီး ပေးပို့နိုင်ကြောင်း ထုတ်ပြန်ထားပါတယ်။

အကြမ်းဖက်စစ်တပ်ဟာ လာမယ့် ဒီဇင်ဘာ ၂၈ ရက်နေ့မှာ ရွေးကောက်ပွဲကို အပိုင်း (၁) အနေနဲ့ ကျင်းပသွားမှာဖြစ်တယ်လို့ ထုတ်ပြန်ထားပါတယ်။

ပြည်ပရောက် မြန်မာနိုင်ငံသားရွှေ့ပြောင်းလုပ်သားတွေဟာ တော်လှန်ရေးအောင်မြင်ဖို့ ချွေးနည်းစာတွေနဲ့ အစွမ်းကုန်ကြိုးစားနေကြတဲ့အတွက် ကိုယ့်ရဲ့ ရန်သူကို ဘယ်သူမှ မဲပေးမှာမဟုတ်ကြောင်း ထိုင်းမှာ ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူ ဦးအောင်ကျော်က အာရက္ခတိုင်းမ်စ်ကို ပြောပါတယ်။

“လက်ရှိ ပကတိအခြေအနေကို ရှင်းရှင်းလင်းလင်း မြင်တွေ့ထားပြီးပြီ။ တိုင်းပြည်ကို စနစ်တကျနဲ့ ဖွံ့ဖြိုးတိုးတက်အောင် အုပ်ချုပ်နိုင်တဲ့အစိုးရ မဟုတ်ဘူးဆိုတာ သူတို့ သိတယ်။ နောက် ပြည်သူလူထုလေးစားတဲ့၊ ပြည်သူတင်မြှောက်တဲ့ အစိုးရကို အတင်းအဓမ္မသိမ်းထားတာ ဖြစ်တဲ့အတွက်ကြောင့် သူတို့အနေနဲ့ လုံးဝကို ကန့်ကွက်မိတယ်။ ဒီမှာရှိတဲ့ လုပ်သားတွေက မိမိတို့ ချွေးနည်းစာလေးတွေနဲ့ တော်လှန်ရေးအောင်ဖို့အတွက်ကို အစွမ်းကုန် လုံးပမ်းနေတဲ့အခါမှာ ကိုယ့်ရဲ့ရန်သူကို ဘယ်သူမှ မဲပေးမှာ မဟုတ်ဘူး။ အဲဒီတော့ ရွေးကောက်ပွဲဆိုတာကို ဘယ်သူမှလည်း အသိအမှတ်မပြုဘူး။ စိတ်လည်းဝင်စားမှု မရှိပါဘူး”လို့ သူက ပြောပါတယ်။

အာဏာသိမ်း စစ်တပ်က ပြုလုပ်မယ့် ရွေးကောက်ပွဲဟာ “စစ်တပ်အတွက် အကျိုးရှိမည့် လူနှင့် ပါတီရွေးချယ်ပွဲ” ဖြစ်တဲ့အတွက် ကရင်လက်နက်ကိုင်အဖွဲ့များ၊ ကရင်နိုင်ငံရေးအင်အားစုများ၊ ကရင်ပါတီများနဲ့ ပြည်သူလူထု တစ်ရပ်လုံး အကြမ်းမဖက်သော နည်းလမ်းများဖြင့် ဆန့်ကျင်ကြဖို့ KNU က ဩဂုတ် ၂၆ ရက်နေ့တွင် သဘောထား ထုတ်ပြန်ကာ တိုက်တွန်းထားပါတယ်။

KNU သဘောထားထုတ်ပြန်ချက်မှာ အချက် ၇ ချက် ပါရှိပြီး စစ်အုပ်စုက ပြုလုပ်မည့် ရွေးကောက်ပွဲဟာ ဥပဒေရေးရာအရ တရားမဝင်ခြင်း၊ ပြည်သူများအားလုံး လုံးဝပါဝင်နိုင်မှု မရှိခြင်းတို့ကို ထောက်ပြထားတဲ့အပြင် “လိုသလိုအဖြေ ထုတ်နိုင်သည့် ရွေးကောက်ပွဲလုပ်ငန်းစဉ်” ဖြစ်တဲ့အတွက် လုံးဝလက်မခံကြောင်း ဖော်ပြထားပါတယ်။

အဲဒီ ရွေးကောက်ပွဲဟာ စစ်အာဏာရှင်စနစ်ကို သက်ဆိုးရှည်စေရေးအတွက်သာဖြစ်ပြီး လက်ရှိနိုင်ငံရေး အကြပ်အတည်းအတွက် ဖြေရှင်းချက်တစ်ခုမျှ မဖြစ်နိုင်ကြောင်း၊ ဒါကြောင့် နိုင်ငံအတွင်း ပဋိပက္ခများ ပြင်းထန်လာနိုင်ကြောင်း KNU က သတိပေးထားပါတယ်။