စစ်တွေမှာ ကွမ်းတစ်ယာကို တထောင်၊ ငရုတ်သီး ၅ တောင့်ကို တထောင် ပေးနေရ

အာရက္ခတိုင်းမ်စ် (၅ စက်တင်ဘာ ၂၀၂၅)

ရက္ခိုင်ပြည် စစ်တွေမြို့နယ်ကို လေယာဉ်တွေ မဆင်းသက်တာ ရက်ပိုင်းရှိပြီ ဖြစ်တဲ့အတွက် ကွမ်းယာ တစ်ယာကို ငွေကျပ် တထောင်၊ ငရုတ်သီး ၅ တောင့်ကို ငွေကျပ် တထောင် ပေးနေရကြောင်း ဒေသခံတွေက အာရက္ခတိုင်းမ်စ်ကို ပြောပါတယ်။

စစ်တွေမြို့ကို လေယာဉ်မဆင်းတာဟာ ၄ ရက်ခန့်ရှိနေပြီဖြစ်ပြီး အရင်က ကွမ်းယာ တထောင်ဖိုးဆိုရင် ငါး ယာရတာ ဖြစ်ပေမယ့် ဒီနေ့မှာတော့ ကွမ်းယာ တယာကို တထောင်ကျပ်ဖြစ်နေကြောင်း၊ အချို့ဆိုင်တွေမှာတော့ ကွမ်းယာ နှစ်ယာကို တထောင်ကျပ်ရှိကြောင်း စစ်တွေဒေသခံတစ်ဦးက အာရက္ခတိုင်းမ်စ်ကို ပြောပါတယ်။

“ကွမ်းတယာကို တထောင်ဖြစ်သွားပြီ။ အဲဒါတောင် ရှာလို့မရဘူး။ ကွမ်းတစ်ခါ စားလေးတယာကို ကွမ်းတရွက် အဲဒါကို တထောင်၊ အဲဒါကို ရှာလို့ကို မရတာ။ ကွမ်းသီး တစိတ်နဲ့ ထုံးနဲ့ အဲဒါကို တထောင်။ အဲဒါတောင် ရှာလို့မရဘူး။ လေယာဉ်မဆင်းလို့။ အရင်တုန်းကကြတော့ တထောင်ဖိုးကို ငါးယာရတယ်။ လေးယာ ရတယ်။ မနေ့က သုံးယာ၊ ဒီနေ့ကွမ်းမရှိလို့ တထောင်တဲ့။ ဟုတ်တယ် လေယာဉ်နဲ့သယ်တာ။ သင်္ဘောနဲ့ သယ်လို့ရမလား။ သင်္ဘောနဲ့က ကွမ်းရွက်က တာရှည်မခံလေ” လို့ သူက ပြောပါတယ်။

လက်ရှိမှာ စစ်တွေမြို့ကို လေယာဉ်မရောက်လာတာနဲ့ပတ်သက်ပြီး ဒေသခံတွေကြားမှာတော့  ၄ ရက်ခန့် လေကြောင်းလိုင်းကို ပိတ်ထားတာကြောင့်လို့ ပြောဆိုမှုတွေရှိနေသလို တပတ်မှ ၃ ရက်သာ လေကြောင်းလိုင်း ပြေးဆွဲတော့မှာလို့လည်း ပြောဆိုမှုတွေ ရှိနေပါတယ်။

ခရီးသည်တွေ လာမယ်ဆိုပါက လာလို့ရပြီး ကုန်တွေ သယ်လာလို့ မရကြောင်းလည်း ဒေသခံတွေထံက သိရပါတယ်။

ကြာရှည်ထားမခံတဲ့ အသား၊ ဟင်းသီးဟင်းရွက်၊ အစိုပစ္စည်းတွေကို လေယာဉ်နဲ့ စစ်တွေမြို့ကို သယ်လာပြီး ရောင်းချပေးတာ ဖြစ်တာကြောင့် အခုလို လေယာဉ်မဆင်းတာ ရက်ပိုင်းရှိတဲ့အခါမှာ အကုန် ဒုက္ခတွေ့ကုန်ကြကြောင်းလည်း ဒေသခံတွေက ပြောပါတယ်။

ဆိုင်ကယ်နဲ့ စစ်တွေမြို့ကို ပတ်ပြီးရှာတာတောင် ရှာမရဖြစ်နေသလို ဈေးတွေအကုန် မြင့်တက်သွားတယ်လို့ စစ်တွေဒေသခံတစ်ဦးက အာရက္ခတိုင်းမ်စ်ကို ပြောပါတယ်။

“ဈေးတက်တယ်။ ကြက်သွန်နီတွေ တပိဿာကို နှစ်သောင်း၊ နှစ်သောင်းခွဲဖြစ်သွားပြီ။ လေယာဉ်နဲ့ကြတော့ အစိုပစ္စည်းတွေပေါ့။ ငရုတ်သီးစိမ်းတွေ၊ သံပုရာသီး၊ စားကုန်တွေလေ ဟင်းသီးဟင်းရွက်၊ ကြက်သား၊ အမဲသား၊ ဝက်သား အခုရောက်ပြီးတော့ အခုစားရတဲ့ ပစ္စည်းတွေလေ။ အခု ငရုတ်သီးစိမ်းတွေလည်း ၅ တောင့်ကိုလားမသိ တထောင် ပေးလိုက်ရတယ်တဲ့ မနက်က” လို့ သူက ပြောပါတယ်။

လက်ရှိမှာ လေကြောင်းလိုင်းတွေကို ပုံမှန်ပြန်လည် မပြေးဆွဲပါက စစ်တွေမှာ အခြေခံကုန်စည်တွေဟာ ပိုမိုဈေးတက်လာမယ်ကို ဒေသခံတွေဟာ စိုးရိမ်လျက်ရှိနေပြီး လေကြောင်းလိုင်းတွေ ပြန်လည်ပြေးဆွဲဖို့ကို မျှော်လင့်နေကြပါတယ်။