မောင်တောမှာ မြေမြှုပ်မိုင်း နင်းမိလို့ လူငယ်တဦး ခြေတဖက်ပြတ်

အာရက္ခတိုင်းမ်စ် (၂၅ စက်တင်ဘာ ၂၀၂၅)

ရက္ခိုင်ပြည် မောင်တောမြို့နယ် ဂြစ်ချောင်းရွာက လူငယ်တဦး စက်တင်ဘာလ ၂၄ ရက် မနက်ပိုင်းက စစ်ကော်မရှင် မြှုပ်နှံခဲ့တဲ့ မြေမြှုပ်မိုင်းနင်းမိလို့ ခြေတဖက် ပြတ်သွားတယ်လို့ သိရပါတယ်။

“သူငယ်ချင်း ၃ ယောက် တောထဲမှာ ကိုင်းထောင် (တောကောင်ဖမ်း) ထားတာကို သွားကြည့်တာမှာ တယောက်က မိုင်းနင်းမိလို့ ညာဖက် ခြေမျက်စိအထက်ကနေ ပြတ်သွားတာ” လို့ မောင်တောမြို့ဒေသခံတဦးက အာရက္ခတိုင်းမ်စ်ကို ပြောပါတယ်။

စစ်ကော်မရှင် မြှုပ်နှံခဲ့တဲ့ မြေမြှုပ်မိုင်း နင်းမိသူကတော့ မောင်တောမြို့နယ် ဂြစ်ချောင်းရွာက အသက် ၁၉ နှစ်အရွယ် မောင်ရွှေဘ ဖြစ်ပြီးတော့ သူနဲ့အတူ မောင်ကန်ပြည့်နဲ့ မောင်အောင်နိုင်တို့လည်း သွားခဲ့တာပဲ ဖြစ်ပါတယ်။

“သူတို့ သွားတာက ပဲရွန်းတောင်ပေါ်ကိုလေ၊ အဲနေရာက အရင်က ခမရ ၅၃၂ တပ်စွဲခဲ့ဖူးတဲ့ နေရာလည်း ဖြစ်တယ်။ နောက်ထပ် မြှုပ်နှံထားတဲ့ မြေမြှုပ်မိုင်းတွေလည်း ရှိနိုင်သေးလို့ သတိထားသွားလာဖို့လိုတယ်” လို့ သူက ထပ်မံပြောပါတယ်။

အဆိုပါ မောင်တောနယ်စပ်ဒေသတွင် ARSA ၊ RSO စစ်သွေးကြွ လက်နက်ကိုင် တပ်ဖွဲ့ဝင်တွေဟာ ခိုးဝင်သွားလာနေတာကြောင့် မြေမြှုပ်မိုင်း အန္တရာယ်တွင် မဟုတ်ဘဲ သူတို့ကိုလည်း သတိထား သွားလာဖို့လိုတယ်လို့လည်း ဒေသခံတွေက ဆိုပါတယ်။

ရက္ခိုင် – ဘင်္ဂလားဒေ့ရှ် နယ်စပ်တလျှောက်နဲ့ မောင်တောခရိုင်ရဲ့ တချို့နေရာတွေမှာ ARSA ၊ RSO စစ်သွေးကြွ လက်နက်ကိုင် တပ်ဖွဲ့ဝင်တွေဟာ မူဆလင်မဟုတ်တဲ့ အရပ်သားပြည်သူတွေကို သတ်ဖြတ်လျက် ရှိနေတာကြောင့် နယ်စပ်နေ ပြည်သူတွေအနေနဲ့ အထူးသတိထား သွားလာနေထိုင်ကြဖို့ လုံခြုံရေး သတိပေးချက်တစ်ရပ်ကို အာရက္ခတပ်တော်က စက်တင်ဘာ ၁၉ ရက်မှာ ထုတ်ပြန်ပါတယ်။

ဘင်္ဂလားဒေ့ရှ်နိုင်ငံအတွင်းမှာ ခြေကုပ်ရယူထားပြီး နတ်မြစ်နဲ့ မယူတောင် လမ်းကြောင်းတွေကနေတစ်ဆင့် အာရက္ခဒေသရဲ့ မောင်တောခရိုင်အတွင်းကို စိမ့်ဝင်ရောက်လျက်ရှိနေတဲ့ အကြမ်းဖက်တွေကို ကာကွယ်တိုက်ဖျက်ဖို့ အာရက္ခတပ်တော်က နယ်စပ်မှာ လုံခြုံရေးကို အထူးတိုးမြှင့် လုပ်ဆောင်သွားမယ်လို့ ​ပြောထားပါတယ်။