အာရက္ခတိုင်းမ်စ်(၁၆ ဒီဇင်ဘာ ၂၀၂၅)
ရက္ခိုင်ပြည်၊ ကျောက်ဖြူမြို့နယ်၊ ငလုံးစု အထက်ရွာနဲ့ အောက်ရွာ ဗုံးကြဲမှု ဖြစ်စဉ်အတွင်း ဒဏ်ရာရသူတွေအနက် တဦး ထပ်မံ သေဆုံးခဲ့တယ်လို့ ဒေသခံတွေက ဆိုပါတယ်။
အဆိုပါရွာကို ပြီးခဲ့တဲ့ ဒီဇင်ဘာ ၁၁ ရက်၊ ညပိုင်းမှာ စစ်ကော်မရှင်က ဗုံးကြဲခဲ့တာဖြစ်ပြီး ဒဏ်ရာရသူ ၁၆ ဦး အနက် တဦး ထပ်မံ သေဆုံးခဲ့တာ ဖြစ်ပါတယ်။
သေဆုံးသူဟာ ကျောက်ဖြူမြို့၊ ငလုံးစု အောက်ရွာ နေထိုင်သူ အသက် ၄၀ အရွယ်ရှိ ဦးမောင်သန်းကြည် ဖြစ်ပြီး ယမန်နေ့ ဒီဇင်ဘာ ၁၅ ရက်၊ နေ့လည် ၁ နာရီခန့်မှာ သေဆုံးသွားတယ်လို့ သိရပါတယ်။
“ ဒဏ်ရာရသူတွေထဲ အမျိုးသားတဦး ထပ် ဆုံးသွားတာပါ။ ကျန်တဲ့ ဒဏ်ရာရသူတွေလည်း စောင့်ကြည့်ဆဲ အခြေနေပါ” လို့ ဒေသခံတဦးက အာရက္ခတိုင်းမ်စ်ကို ပြောပါတယ်။
ဒီဖြစ်စဉ်မှာ အမျိုးသား ခြောက်ဦး နဲ့ အမျိုးသမီး သုံးဦး စုစုပေါင်း သေဆုံးသူ ကိုးဦးရှိပြီဖြစ်ပြီး အသက် ၁၇ နှစ် ကနေ အသက် ၈၇ အရွယ်ထိ ပါဝင်ပါတယ်။