စစ်တွေမှာ စက်သုံးဆီ တလီတာကို သုံးသောင်းကျော်အထိ ဈေးမြင့်တက်လာ

အာရက္ခတိုင်းမ်စ် (၆ မတ် ၂၀၂၆)

လမ်းပန်းဆက်သွယ်ရေးတွေ ပိတ်ဆို့ထားတဲ့ ရက္ခိုင်ပြည်၊ စစ်တွေမြို့မှာ အရှေ့အလယ်ပိုင်းဒေသရဲ့ စစ်ရေးပဋိပက္ခ သတင်းလှုပ်ခတ်မှုတွေကြောင့် မတ်လ ၄ ရက်မှာ စက်သုံးဆီ တလီတာကို သုံးသောင်းကျော်အထိ ဈေးမြင့်တက်လာခဲ့တယ်လို့ စစ်တွေဒေသခံတဦးက အာရက္ခတိုင်းမ်စ်ကို ပြောပါတယ်။

အဲဒီလို ဈေးမြင့်တက်လာတဲ့အပြင် ဝယ်ယူလို့မရဘဲ ရှားပါးလျက် ရှိနေကြောင်းလည်း သူက ပြောပါတယ်။

“ဒီမှာက ဒီမနက်က ဆီတလီတာကို ၁၈၀၀၀၊ နေ့ခင်းဘက် ၁ နာရီ ၂ နာရီလောက်မှာ ၂ သောင်းခွဲ အခုဆိုရင် သုံးသောင်းကျော်၊ သုံးသောင်းနဲ့ လေး၊ ငါး၊ ခြောက်ထောင် ပေးလို့တောင် ဝယ်လို့ မရတော့ဘူး။ အားလုံး ကုန်သည်တွေလို့ ပြောရမှာပေါ့ ဆီကုန်သည်တွေ အဲဒီလူတွေက ဆီတွေကို သိမ်းထားလိုက်ကြပါပြီ မလားယေ။ ဈေးတက်လာဖို့ ဆိုတာကို မြင်လို့။ နိုင်ငံခြားမှာ သတင်းတွေမှာ ပါတယ်တဲ့ အီရန်နဲ့ တိုက်ပွဲဖြစ်နေတယ် ဆိုလား။ ကိုယ်တွေကတော့ လိုင်းမရလို့ မသိဘူး။ အဲဒီမှာ ဆီတွေ၊ လောင်စာဆီတွေ၊ စက်ရုံတွေ ပိတ်လိုက်ပြီဆိုပြီး နိုင်ငံခြားသတင်းတွေမှာ ပါတယ်တဲ့။ အဲဒါကြောင့် လေယာဉ်ဆီတွေလည်း သိမ်းထားတဲ့ပုံစံမျိုးနဲ့ ဒီမှာ။ ဈေးအများကြီးနဲ့ ဈေးတင်ဖို့ရောင်းဖို့အတွက် အကုန် ဖွက်ပစ်လိုက်ကြတာ။ အခု သုံးသောင်းနဲ့ လေး၊ ငါး၊ ခြောက်ထောင် ပေးတာတောင် ဆီဝယ်လို့မရပါ” လို့ သူက ပြောပါတယ်။

အခုညဘက် ထပ်မံသိရှိရတဲ့ အချက်အလက်တွေအရ ဆီတလီတာကို လေးသောင်းကျော် ပေါက်ဈေး ဖြစ်နေပြီလို့ သိရပါတယ်။

စစ်ကော်မရှင်ရဲ့ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းကတော့ မြန်မာနိုင်ငံအတွင်းမှာ အရန်ဆီအနေနဲ့ နောက်ထပ် ရက် ၄၀ စာ ရှိတယ်လို့ မတ်လ ၄ ရက်မှာ ထုတ်ဖော် ပြောကြားလာပါတယ်။

မြန်မာနိုင်ငံရဲ့ စက်သုံးဆီ သုံးစွဲမှုဟာ တရက်ကို ဓာတ်ဆီ ၁ ဒသမ ၅ သန်းဂါလံ၊ ဒီဇယ်ဆီ ၁ ဒသမ ၇ သန်း ဂါလံခန့် စုစုပေါင်းတရက်ကို ဆီဂါလံ ၃ ဒသမ ၂ သန်းခန့် ဖြစ်ပြီး လက်ရှိ မြန်မာနိုင်ငံတွင် ဓာတ်ဆီဂါလံသန်း ၆၀၊ ဒီဇယ်ဆီဂါလံသန်း ၇၀ နီးပါး စုပုံထားပြီးဖြစ်တယ်လို့ သူက ပြောပါတယ်။

ဒါ့အပြင် ဆိပ်ကမ်းမှာ အခုလက်ရှိ ဆီမချရသေးဘဲ ကပ်ထားတဲ့ သင်္ဘောနှစ်စီး ရောက်ရှိနေကြောင်း၊ ဝယ်ယူထားပြီး လမ်းမှာရှိနေတဲ့ စက်သုံးဆီ သင်္ဘော ၁၄ စင်း ရှိကာ အဲဒီသင်္ဘော ၁၄ စင်းဟာလည်း ရက်ပိုင်းအတွင်း အခက်အခဲမရှိ ဆိုက်ကပ်လာမှာ ဖြစ်တယ်လို့ ဗိုလ်ချုပ်ဇော်မင်းထွန်းက ပြောပါတယ်။

ကမ္ဘာမှာ ဖြစ်ပေါ်နေတဲ့ အခြေအနေအရ ကမ္ဘာဈေးနှုန်းနဲ့အညီတော့ စက်သုံးဆီများက ဈေးနှုန်းများ ဖြစ်လာနိုင်စရာ အကြောင်းရှိတယ်လို့ ပြောဆိုသွားတဲ့အတွက် စက်သုံးဆီနှုန်းထားတွေဟာ တိုးမြင့်သွားနိုင်တဲ့ အနေအထားပါ။

လက်ရှိမှာတော့ မတ်လ ၇ ရက်ကနေစပြီး စက်သုံးဆီ ခြိုးခြံချွေတာရေးနဲ့ ဖူလုံမှု ရှိစေရေးအတွက်လို့ ဆိုကာ လစဉ် “စုံ” ရက်တွေမှာ စုံနံပါတ်အက္ခရာပါယာဉ်တွေ (ဥပမာ- 2A/—- 4A/—စသဖြင့်)၊ မ ရက်တွေမှာ မနံပါတ်အက္ခရာပါတဲ့ယာဉ်တွေ (ဥပမာ-1A/—-3A/—- စသဖြင့်) ပုဂ္ဂလိကပိုင်ယာဉ်တွေ မောင်းနှင် အသုံးပြုကြဖို့ စည်းကမ်းသတ်မှတ်ချက် ထုတ်ပြန်ထားပါတယ်။