ငပလီမြို့ ဂျိတ္တောကို စကမ နေဗီကနေ လက်နက်ကြီးနဲ့ ၂ ကြိမ် ပစ်ခတ်

အာရက္ခတိုင်းမ်စ် (၁၇ မတ် ၂၀၂၆)

ရက္ခိုင်ပြည် သံတွဲခရိုင် ငပလီမြို့ ဂျိတ္တောရပ်ကွက်ကို စစ်ကော်မရှင်ရဲ့ နေဗီကနေ မတ်လ ၁၆ ရက်က ၂ ကြိမ်တိုင်တိုင် လက်နက်ကြီးနဲ့ ပစ်ခတ်ခဲ့တယ်လို့ သိရပါတယ်။

“ မနေ့က ၂ ကြိမ်တောင် ပစ်တယ်။ လူနေအိမ်တွေပေါ်မကျပဲ တောထဲကိုကျသွားလို့ တော်သေးတယ်။ သူတို့က (စကမ) တခါတလေ နှစ်ရက်ခြား တခါလောက်ပစ်တယ်။ မဟုတ်ရင်လည်း အနည်းဆုံး ၁ ပတ် ၁ ကြိမ်တော့ လှမ်းလှမ်းပစ်တယ်” လို့ ငပလီမြို့ဒေသခံတဦးက အာရက္ခတိုင်းမ်စ်ကို ပြောပါတယ်။

စစ်ရေးအရ ရှုံးနိမ့်နေတဲ့ စစ်ကော်မရှင်ဟာ ပင်လယ်ထဲက နေဗီကနေ ရက္ခိုင်ပြည် လွတ်မြောက်နယ်မြေနေရာတွေကို လက်နက်ကြီးနဲ့ ပစ်ခတ်တိုက်ခိုက်နေသလို ဒေသခံရေလုပ်သားတွေကို ဖမ်းဆီးတာတွေလည်း ဆက်တိုက်ပြုလုပ်နေတာလည်း ဖြစ်ပါတယ်။

ရက္ခိုင်ပြည် သံတွဲခရိုင် ငပလီမြို့ ဒေသခံ ငါးဖမ်းသမား ၅ ဦးကို စစ်ကော်မရှင်ရဲ့ နေဗီက မတ်လဆန်းက ဖမ်းဆီးသွားပြီး စက်လှေကို သိမ်းကာ ငါးဖမ်းသမား ၅ ဦးကိုတော့ နေဗီကနေ ပင်လယ်ထဲ ကန်ချခဲ့ပါတယ်။

စစ်ကော်မရှင်ရဲ့ လက်နက်ကြီးနဲ့ ပစ်ခတ်မှုတွေကြောင့် ငပလီက ရေလုပ်သားတွေဟာ ပင်လယ်ထဲ ငါးဖမ်းမထွက်ရဲကြပဲ ကမ်းနီးနဲ့ မြစ်ချောင်းတွေမှာသာ သွားရောက်ငါးဖမ်းကာ စားဝတ်နေရေး ဖြေရှင်းနေရတယ်လို့လည်း သိရပါတယ်။