ပုဏ္ဏားကျွန်းမှာ လေပြင်းတိုက်ခတ်မှုကြောင့် စစ်ရှောင်စခန်းများ ပျက်စီးပြီး အစားအစာနဲ့ အမိုးအကာတွေ လိုအပ်

အာရက္ခတိုင်းမ်စ်(၃၀ ဧပြီ ၂၀၂၆)

ရက္ခိုင်ပြည် ပုဏ္ဏားကျွန်းမြို့နယ်မှာ လေပြင်းတိုက်ခတ်ခဲ့တာကြောင့် စစ်ရှောင်စခန်းများ ပျက်စီးပြီး အစားအစာနဲ့ အမိုးအကာတွေ လိုအပ်နေတယ်လို့
ရခိုင်မျိုးချစ်လူငယ်ဖောင်ဒေးရှင်းက ဆိုပါတယ်။

ဧပြီလ ၂၉ ရက် ညနေ ၄နာရီ ၃၀ မိနစ် ဝန်းကျင်မှာ လေပြင်းတိုက်ခတ်ခဲ့တာဖြစ်ပြီး အခုလို လေပြင်းတိုက်ခတ်မှု ပြင်းထန်တာမျိုးကို အရင်က မကြုံတွေ့ဖူးကြောင်း အဆိုပါ ဖောင်ဒေးရှင်းရဲ့ ဥက္ကဌဖြစ်သူ ကိုမျိုးချစ်က‌ ပြောပါတယ်။

“ အပျက်အစီးက များတယ်ဗျ။ ဘာဖြစ်လို့လဲဆို ဒီ camp တွေက ဆောက်ထားတဲ့ဟာတွေကလည်း ကြာပြီ။ စတည်းက ခိုင်ခိုင်မာမာ ဆောက်ထားတာ မဟုတ်ဘူးဆိုတော့ အခုချိန်မှာတော့ မိုးနဲ့လေနဲ့ ပြင်းပြင်းထန်ထန် လေပြင်းတိုက်တဲ့အခါကျတော့ တွေ့ရတဲ့အတိုင်းပဲ တလျှောက်လုံး အိမ်တွေ ပျက်ကုန်တယ်ဗျ။ ဒီ camp မှာတော့ အိမ်ခြေရာနဲ့ချီပြီး ရှိတယ်။ ခု မြင်တွေ့နေရတဲ့ camp တွေမှာတော့ အိမ်ခြေက အားလုံးနီးပါး ပျက်စီသွားတာ ရှိတယ်ဗျ။ လတ်တလော သူတို့က စားဝတ်‌နေရေးနဲ့ အမိုးအကာအောက် ရောက်ရှိရေးပေါ့။ ဒီဟာ ခက်ခဲနေတယ်” လို့ ကိုမျိုးချစ်က အာရက္ခတိုင်းမ်စ်ကို ပြောပါတယ်။

လက်ရှိအချိန်အထိ မိုးဆက်လက် ရွာသွန်းနေဆဲဖြစ်သလို နေထိုင်ရေးအတွက် ပိုမိုခက်ခဲနေပြီး အကူအညီများ အရေးပေါ် လိုအပ်နေတယ်လို့ စစ်ဘေးရှောင်များက ဆိုပါတယ်။

နေအိမ် ထိခိုက်ပျက်စီးခဲ့တဲ့ စစ်ဘေးရှောင်ပြည်သူတွေအတွက် နေအိမ် ပြန်လည်တည်ဆောက်ဖို့ အလှူရှင်များ လိုအပ်နေပြီး ပြည်တွင်းပြည်ပ အလှူရှင်တွေ၊ အဖွဲ့အစည်းများအနေနဲ့ ကူညီဝန်းရံပေးကြဖို့လည်း ရခိုင်မျိုးချစ်လူငယ်ဖောင်ဒေးရှင်းက မေတ္တာရပ်ခံထားပါတယ်။