သက်ငယ်မုဒိန်းမှုတွေကို ပြတ်ပြတ်သားသား အရေးယူပေးရန် ပြည်သူတွေတောင်းဆိုပြီးနောက် AA က သက်ငယ်မုဒိန်းကာကွယ်တားဆီးရေး ပညာပေးတွေလုပ်ဆောင်လာ

အာရက္ခတိုင်းမ်စ် (၂ မေ ၂၀၂၆)

ရက္ခိုင်ပြည် မောင်တော နဲ့ မြောက်ဦးတို့တွင် သက်ငယ်မုဒိန်းမှုနဲ့ ကလေးသူငယ်များကို မဖွယ်မရာ ပြုမူမှုများ ပေါ်ပေါက်လာပြီးနောက် တရားခံတွေကို ပြတ်ပြတ်သားသား အရေးယူပေးရန် ရက္ခိုင်ပြည်သူတွေက တောင်းဆိုလာပြီးနောက်မှာတော့ အာရက္ခပြည်သူ့တော်လှန်ရေးအစိုးရက သက်ငယ်မုဒိန်းမှု ကာကွယ်တားဆီးနိုင်ရေး ပညာပေးတွေ လုပ်ဆောင်လာနေတယ်လို့ သိရပါတယ်။

“ လက်ကမ်းစာစောင် ဝေတာတွေတော့ လုပ်ပေးနေတယ်၊ စာစောင်ထဲမှာ ကလေးတွေကို ဘယ်လို အသိပေးရမယ်။ ထိန်းကျောင်းရမယ်။ ကာကွယ်ရမယ်ပေါ့။ ဒါကတော့ မိဘတွေအတွက် ကောင်းတာပေါ့လေ။ ဒါပေမယ့် ကျမတို့ လိုချင်တာက ကျူးလွန်တဲ့အကောင်တွေကို ဘယ်လို အရေးယူမယ်။ ဘယ်လို ကိုင်တွယ်မယ်။ အဲဒါကိုလည်း ရှင်းရှင်းလင်းလင်း သိချင်ပါတယ်။ အခုက ကိုယ့်ကလေးကို မကျူးလွန်ခံရအောင် ကာကွယ်ဖို့ပဲ ပြောနေသလို ခံစားရတယ်” လို့ မြောက်ဦးမြို့နယ်က ကလေးမိခင် ၁ ဦးက ပြောပါတယ်။

အာရက္ခပြည်သူ့တော်လှန်ရေးအစိုးရက သက်ငယ်မုဒိန်းကာကွယ်ရန်အတွက် မိဘအုပ်ထိန်းသူတွေအနေနဲ့ ကလေးသူငယ်တွေကို မှာထားသင့်တဲ့ အချက် ၇ ချက်ကို လက်ကမ်းစာစောင်မှာ ဖော်ပြထားပါတယ်။

“ ပြည်သူတွေအသံကို နားထောင်ပြီးတော့ အခုလို လုပ်ဆောင်ပေးတာကိုတော့ ကျေနပ်တယ်။ ဒါပေမယ် ကျမတို့လိုချင်တာက ကျူးလွန်ခံရနိုင်သူကို ဆင်ခြင်ခိုင်းတာက တပိုင်းပေါ့လေ။ တကယ်လို့ ကျူးလွန်ခံလိုက်ရရင် ကျူးလွန်သူကို ဘယ်လို အပြစ်ပေးမလဲ။ အဲဒါကို ပိုသိချင်တယ်။ ကျူးလွန်ချင်တဲ့သူက ခြောင်းနေမှာပဲ။ သူတို့တွေ ကြောက်ရမယ့် လန့်ရမယ့် တရားစီရင်ရေးက ပိုလိုအပ်ပါတယ်” လို့ အဆိုပါ ကလေးမိခင်က အာရက္ခတိုင်းမ်စ်ကို ထပ်မံပြောပါတယ်။

ရက္ခိုင်ပြည်တွင် ၂၀၂၆ ခုနှစ် ဇန်နဝါရီလကနေ ဧပြီလအထိ သက်ငယ်မဒိန်းမှု ၃ မှုထက်မနည်း ရှိနေတယ်လို့ သိရပြီး သက်ငယ်မုဒိန်းမှုနဲ့ပတ်သက်ပြီး ပြတ်ပြတ်သားသား အမြန်ဆုံး ဆောင်ရွက်ပေးရန် ပြည်သူတွေက တောင်းဆိုနေကြတာလည်း ဖြစ်ပါတယ်။

အာရက္ခတပ်တော် စစ်ဦးစီးချုပ် ဗိုလ်ချုပ်ထွန်းမြတ်နိုင်ရဲ့ ဇနီးဖြစ်သူ ဒေါ်နှင်းဇာဖြူကလည်း သက်ငယ်မုဒိန်းအမှုတွေကို အမြန်ဆုံးတရားစီရင်ပေးရန် ၂၀၂၅ ခုနှစ် ဇူလိုင်လ ၃၁ ရက်တွင် သူမရဲ့ လူမှုကွန်ရက်စာမျက်နှာမှာ ရေးသားတောင်းဆိုဖူးပါတယ်။

အမျိုးသမီးအသိုင်းအဝိုင်းများအနေဖြင့်လည်း အဓမ္မပြုကျင့်ခံရမှုဖြစ်စဉ်များနဲ့ ပတ်သက်ပြီး တရားစီရင်ရေးကို အင်တိုက်အားတိုက် တွန်းအားပေးရန် လိုအပ်သလို လူမှုကွန်ရက်တွင်လည်း များများ မျှဝေပေးကြရန် ဒေါ်နှင်းဇာဖြူက တိုက်တွန်းထားပါတယ်။

အာရက္ခတပ်တော်ရဲ့ တရားဥပဒေစိုးမိုးရေးနဲ့ပြည်သူ့လုံခြုံရေးဌာန (DLEPS) က အဓမ္မပြုကျင့်မှု ကျူးလွန်သူများကို ထောင်ဒဏ်တသက် သို့မဟုတ် အနည်းဆုံး ထောင်ဒဏ် ၂၀ နှစ်အထိ ပြင်းထန်စွာ အရေးယူသွားမယ်လို့လည်း ထုတ်ပြန်ထားပါတယ်။