အာရက္ခတိုင်းမ်စ် (၂၂ စက်တင်ဘာ ၂၀၂၆)
ရက္ခိုင်ပြည်၊ ပုဏ္ဏားကျွန်းမြို့နယ်၊ ကုလားချောင်းကျေးရွာကို စက်တင်ဘာလ ၂၀ ရက် ညနေပိုင်းမှာ စစ်ကောင်စီက ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် အရပ်သားပြည်သူတစ်ဦး သေဆုံးသွားခဲ့ပါတယ်။
သေဆုံးသွားသူကတော့ ကုလားချောင်းရွာမှာ နေထိုင်တဲ့ အသက် ၅၅ နှစ်အရွယ် ဦးစောသိန်း ဖြစ်ပါတယ်။
စက်တင်ဘာလ ၂၀ ရက် ညနေ ၃ နာရီခွဲလောက်မှာ စစ်ကောင်စီက ဂျက်ဖိုက်တာနဲ့ ကုလားချောင်းရွာထဲကို ပေါင် ၅၀၀ ဗုံးသီး ၂ လုံး ကြဲချခဲ့တာဖြစ်ကြောင်း ဒေသခံတစ်ဦးက ပြောပါတယ်။
အဲဒီဗုံး ၂ လုံးအနက် ၁ လုံးဟာ ဦးစောသိန်းရဲ့ နေအိမ်တည့်တည့်ကို ကျရောက် ပေါက်ကွဲခဲ့လို့ ဗုံးစထိမှန်ပြီး အခင်းဖြစ်တဲ့နေရာမှာပဲ သေဆုံးခဲ့ရတာ ဖြစ်သလို ကျန် ဗုံး ၁ လုံးကြောင့်လည်း အနီးအနားက နေအိမ် အများအပြား ပြိုကျ ပျက်စီးခဲ့ရပါတယ်။
ဒါ့အပြင် အဲဒီနေ့ နံနက် ၁၀ နာရီကျော်ကလည်း ရသေ့တောင်မြို့နယ်၊ မိုးစဲကမ်းဘက်ကို စစ်တွေအခြေစိုက် စစ်ကောင်စီတပ်က လက်နက်ကြီးတွေနဲ့ ပစ်ခတ်ခဲ့တာကြောင့် ဇီးကိုင်းရွာက သားအမိ ၂ ဦး သေဆုံးခဲ့ရပါသေးတယ်။
စစ်ကောင်စီတပ်ဟာ ပုဏ္ဏားကျွန်းနဲ့ စစ်တွေ တိုက်ပွဲတွေမှာ အထိနာနေတာကြောင့် ပုဏ္ဏားကျွန်း၊ ရသေ့တောင်နဲ့ ဝီရဌာနီ မြို့နယ်တွေက အရပ်သားပြည်သူတွေ နေထိုင်ရာ ကျေးရွာတွေကို လေကြောင်း၊ လက်နက်ကြီးနဲ့ ဒရုန်းတွေ အသုံးပြုပြီး ဆက်တိုက် တိုက်ခိုက်နေတာ ဖြစ်ပါတယ်။