ရက္ခိုင်အမျိုးသမီး ၁ ဦးအား လိင်ပိုင်းဆိုင်ရာ အကြမ်းဖက် ခြိမ်းခြောက်သူကို အရေးယူပေးရန် AA ထံတောင်းဆို

Rakhita TimesMay 4, 2026မေ 4, 202622

အာရက္ခတိုင်းမ်စ် (၄ မေ ၂၀၂၆)

ရက္ခိုင်အမျိုးသမီး ၁ ဦး ဖြစ်သူ မခင်သရဖီဦးကို “ Twan Lynn Thein” အမည်ရ Facebook အကောင့်ပိုင်ရှင်က အွန်လိုင်းကတစ်ဆင့် လိင်ပိုင်းဆိုင်ရာ အကြမ်းဖက်ရန်နဲ့ ရုပ်ပိုင်းဆိုင်ရာ အန္တရာယ်ပြုရန် ခြိမ်းခြောက်ခဲ့ခြင်းအပေါ် ခြိမ်းခြောက်သူကို ဥပဒေနဲ့အညီ ဆောင်ရွက်ပေးရန် ရက္ခိုင့်အမျိုးသားအဖွဲ့ချုပ် (ULA/AA) ကို မေတ္တာရပ်ခံ တောင်းဆိုထားတယ်လို့ သိရပါတယ်။

“ ညီမ အနေနဲ့ကတော့ အမျိုးသမီး သတင်းထောက် ဆိုတာထက် အခုလို အမျိုးသမီးတွေကို Online ဖလက်ဖောင်းသုံးပြီး မိုက်မိုက်ရိုင်းရိုင်း ဆဲဆိုတာမျိုးတွေ ပ ပျောက်စေချင်ပါတယ်။ နောက်ပီး သူတို့က သူတို့နဲ့ အမြင်မတူရင် တိုက်ခိုက်တာမျိုးတွေ ပိုလုပ်လာတာ တွေ့ရပါတယ်။ ဒါက လိင်ပိုင်ဆိုင်ရာ စော်ကားတာအပြင် လူ့ဂုဏ်သိက္ခာကို ထိခိုက်စေတယ်လို့ မြင်ပါတယ်။ နောက်ပီး လွတ်လပ်စွာ သတင်းရယူပိုင်ခွင့်ကိုလည်း ခြိမ်းခြောက်တာပါ။ အခုလို လုပ်ရပ်တွေကို သတင်းဌာနတွေအနေနဲ့ရော အမျိုးသမီးအဖွဲ့တွေကပါ အပြည့်အဝ ကာကွယ်ပေးမူတွေ လုပ်သင့်ပါတယ်။ နောက်ပြီး ထိရောက်တဲ့ အရေးယူမူတွေ လုပ်သင့်ပါတယ်။ သူက တပ်ကို အသုံးချပြီး ခြိမ်းခြောက်မှုတွေက အဆိုးဆုံးပါ။ ဒါကို တာဝန်ရှိတဲ့လူတွေအနေနဲ့ တာဝန်ယူပြီ ဆောင်ရွက်သင့်ပါတယ်” လို့ အကျူးလွန်ခံရသူ မခင်သရဖီဦးက အာရက္ခတိုင်းမ်စ်ကို ပြောပါတယ်။

အကျူးလွန်ခံရသူ မခင်သရဖီဦးဟာ သံလွင်ခက်သတင်းဌာနရဲ့ မြေပြင်သတင်းထောက်တဦးလည်း ဖြစ်ပါတယ်။

“ ခြိမ်းခြောက်တဲ့ “ Twan Lynn Thein” အမည်ရ Facebook အကောင့်ပိုင်ရှင်က မလေးရှားမှာလို့ သိရတယ်။ ဒီကျူးလွန်မှုအတွက် ဥပဒေအရ အရေးမယူနိုင်ခဲ့ရင်တောင် မလေးရောက် ရက္ခိုင်လူမျိုးတွေအတွေနဲ့ ဒီလို ရိုင်းစိုင်းတဲ့သူကို လူမှုရေးပြစ်ဒဏ်တွေ ပေးလို့ရတယ်။ ငါးခုံးမတကောင်ကြောင့် တလှေလုံး ပုတ်တယ်။ သူ့လို ရက္ခိုင်လူမျိုးကြောင့် ရက္ခိုင်တမျိုးသားလုံးကို ဒီလိုလားလို့ ထင်သွားနိုင်တယ်။ အဲသူကို ဖယ်ကျဉ်ထားပါ၊ လူရာမသွင်းပါနဲ့။ ဒါဟာလည်း လူမှုရေး ပြစ်ဒဏ်ပေးတာပါပဲ” လို့ ကျောက်တော်မြို့နယ် ဒေသခံ အမျိုးသားတဦးက အာရက္ခတိုင်းမ်စ်ကို ပြောပါတယ်။

အဆိုပါကဲ့သို့ အမျိုးသမီးတဦးအပေါ် လိင်ပိုင်းဆိုင်ရာ အကြမ်းဖက် ခြိမ်းခြောက်မှုအပေါ် သံလွင်ခက်သတင်းဌာနကလည်း မိမိတို့ရဲ့ သတင်းထောက်များ အထူးသဖြင့် အမျိုးသမီးဝန်ထမ်းများအပေါ် အခုလို လိင်ပိုင်းဆိုင်ရာ အကြမ်းဖက်ရန် ခြိမ်းခြောက်မှုမျိုးကို လုံးဝ (လုံးဝ) သည်းခံခွင့်လွှတ်မှာ မဟုတ်ပါ။

အဆိုပါ ခြိမ်းခြောက်သူကို ဒစ်ဂျစ်တယ်ပလက်ဖောင်းများကနေ အရေးယူနိုင်ရန်နဲ့ ဥပဒေကြောင်းအရ လိုအပ်သလို ဆက်လက်အရေးယူနိုင်ရန် သက်သေအထောက်အထားများ အားလုံးကို စုဆောင်းကာ သက်ဆိုင်ရာ နိုင်ငံတကာနဲ့ မြန်မာသတင်းမီဒီယာ ကာကွယ်ရေးအဖွဲ့အစည်းများထံ ပေးပို့တိုင်ကြား သွားမယ်လို့ ဆိုပါတယ်။

အလားတူ အာရက္ခပြည်ရှိ ဒေသခံလူထုရဲ့ နေ့စဉ်ကြုံတွေ့နေရတဲ့ အခြေအနေတွေကို အခက်အခဲများကြားက သတင်းကျင့်ဝတ်နဲ့အညီ တင်ဆက်ပေးနေတဲ့ သတင်းထောက်များရဲ့ လုံခြုံရေးနဲ့ သက်ရောက်နိုင်မှု အခြေအနေများကို ထည့်သွင်းစဉ်းစား ဆောင်ရွက်ရန်နဲ့ “ Twan Lynn Thein” Facebook Account ပိုင်ရှင်ကို ဥပဒေနဲ့အညီ ဆောင်ရွက်ပေးရန် ရက္ခိုင့်အမျိုးသားအဖွဲ့ချုပ် (ULA/AA) လည်း သံလွင်ခက်သတင်းဌာနက မေတ္တာရပ်ခံပါတယ်။

ပြည်သူလူထုထံ သတင်းမှန်များ ရောက်ရှိရေးအတွက် အသက်အန္တရာယ်ကြားကနေ ကြိုးပမ်းနေကြတဲ့ သတင်းသမားများ၊ အထူးသဖြင့် အမျိုးသမီးသတင်းထောက်များအပေါ် အခုလို အကြမ်းဖက် ခြိမ်းခြောက်မှုများကို အများပြည်သူအနေနဲ့လည်း ဝိုင်းဝန်းဆန့်ကျင် ရှုတ်ချပေးကြပါရန် သံလွင်ခက်သတင်းဌာနက တိုက်တွန်းထားပါတယ်။