ကျောက်ထုနယ်မြေကို စကမက စစ်ကြောင်းနှစ်ကြောင်းနဲ့ စစ်ကြောင်းထိုးနိုင်

အာရက္ခတိုင်းမ်စ် (၉ မေ ၂၀၂၆)

ရက္ခိုင်ပြည်ရဲ့ ဝင်ပေါက် ထွက်ပေါက်တခုဖြစ်တဲ့ မကွေးတိုင်း ဂန့်ဂေါ်ခရိုင် ဆောမြို့နယ်က ကျောက်ထုနယ်မြေကို စစ်ကော်မရှင်က စစ်ကြောင်းနှစ်ကြောင်းနဲ့ ထိုးစစ်ဆင်နိုင်တယ်လို့ သိရပါတယ်။

“ မကွေးတိုင်း ဆိပ်ဖြူမြို့နယ် ရွှေပေါ်ကျွန်းအခြေစိုက် ကပစ ၂၂ (ကာကွယ်ရေးပစ္စည်းစက်ရုံ) ကနေ စတင်ထွက်ခွာလာခဲ့တဲ့ အင်အား ၅၀၀ ဝန်းကျင်ရှိ စစ်ကြောင်းဟာ ပုသိမ် မုံရွာလမ်းကြောင်းအတိုင်း မြောက်ဘက်ကို ဦးတည်ရွေ့လျားနေဆဲဖြစ်ပြီး ဒီးဒုတ်ကွင်းနဲ့ သစ်ညီနောင်လမ်းခွဲမှာ ဖြန့်ခွဲ ညအိပ် အခြေပြုနေခဲ့တာ ရှိပါတယ်။ အဲဒီစစ်ကြောင်းတွေဟာ ပေါက်မြို့နယ်ကတဆင့် ကျောက်ထုနယ်မြေကို ဆက်လက်ဝင်ရောက်နိုင်တယ်လို့ ခန့်မှန်းရပါတယ်” လို့ မြေပြင်စစ်ရေးသတင်းရင်းမြစ်တဦးက အာရက္ခတိုင်းမ်စ်ကို ပြောပါတယ်။

စစ်ကော်မရှင်ဟာ ဒုတိယအသုတ်အနေနဲ့ သင်တန်းဆင်း စစ်သား ၅၀၀ ခန့်ကို မန္တလေးတိုင်း မိတ္ထီလာအခြစိုက် တပ်မ ၉၉ ကနေ မေလ ၈ ရက်က ပို့ဆောင်ခဲ့တာလည်းဖြစ်ပါတယ်။

အလားတူ ပထမအသုတ်က ပို့ထားတဲ့ သင်တန်းဆင်း စစ်သား ၅၀၀ ခန့်ဟာလည်း မကွေးတိုင်း ပေါက်မြို့အခြေစိုက် ကပစ ၂၄ ကို ရောက်ရှိနေပြီလို့လည်း သိရပါတယ်။

“ ခန့်မှန်းအခြေအနေအရ ကျောက်ထုနဲ့ ယောဘက်ကို ပေါက် ကပစ ၂၄ က တကြောင်း၊ ဆိပ်ဖြူ ကပစ ၂၂ က တကြောင်း စစ်ကြောင်းထိုးနိုင်တယ်လို့ ယူဆရပါတယ်” လို့ နောက်ထပ် မြေပြင်စစ်ရေးသတင်းရင်းမြစ်တဦးက အာရက္ခတိုင်းမ်စ်ကို ပြောပါတယ်။

စစ်ကော်မရှင်ဟာ ရက္ခိုင်ပြည်ရဲ့ ဝင်ပေါက် ထွက်ပေါက်တခုဖြစ်တဲ့ ဆောမြို့နယ်က ကံကြီးကျေးရွာတွင် အထိုင်စခန်းဖွင့်ထားပြီး ကျောက်ထုအမြောက်တပ်ကို လက်နက်ခဲယမ်းတွေ အဆမတန် ဖြည့်တင်းနေတယ်လို့ သိရပါတယ်။

အလားတူ “ ပေါက်မြို့နယ် မြောက်ခြမ်းနဲ့ မြိုင် ဂန့်ဂေါ စတဲ့ မြို့ နယ်တွေမှာ တပ်မ ၉၉ ရဲ့ စစ်ကြောင်းတချို့ က တပ်ဖြန့် ရောက်ရှိထားပြီး ဖြစ်ပါတယ်။ အခု ပေါက်မြို့နယ် တောင်ပိုင်းကို ထပ်မံဝင်ရောက်လာတဲ့ စစ်ကြောင်းတွေဟာ တပ်မ ၁၀၁ ရဲ့ လက်အောက်ခံ စစ်ကြောင်းတွေလို့ ခန့်မှန်းရတယ်” လို့ သူက အာရက္ခတိုင်းမ်စ်ကို ဆက်ပြောပါတယ်။

လက်ရှိမှာ ကျောက်ထုအမြောက်တပ်ထဲကို လက်နက်ခဲယမ်းတွေ ထပ်မံရောက်ရှိနေတာကြောင့် အနီးနား ပတ်ဝန်းကျင်တွေကို လက်နက်ကြီးတွေနဲ့ ရမ်းသမ်းပစ်ခတ်လာနိုင်တဲ့အပြင်၊ လေကြောင်းတိုက်ခိုက်မှုတွေလည်း ဆက်ရှိနေနိုင်တာကြောင့် ယောနယ်နဲ့ ချင်းပြည်တောင်ပိုင်းက မိဘပြည်သူတွေအနေနဲ့ လေကြောင်းရန်ကို နေ့ရောညပါ အထူးသတိထားနေထိုင်ကြဖို့ ယောအလင်းတန်း က တိုက်တွန်း နှိုးဆော်ထားပါတယ်။