မာန်အောင်လေဆိပ်ကို ATR 72-600 လေယာဉ် ဆင်းနိုင်အောင် လုပ်မယ်လို့ ရွေးတုအစိုးရ ပြော

အာရက္ခတိုင်းမ်စ် (၆ ဇွန် ၂၀၂၆)

ရက္ခိုင်ပြည် မာန်အောင်မြို့နယ်က စမုံတဲလေယာဉ်ကွင်းကို ATR 72-600 လေယာဉ် ဆင်းသက်နိုင်အောင် ပြုလုပ်မယ်လို့ ရွေးတုအစိုးရ ပို့ဆောင်ရေးဝန်ကြီးဌာန ဒုတိယဝန်ကြီး ဦးထွန်းလှက ဆိုပါတယ်။

အဆိုပါ စကားကို တတိယအကြိမ် ပြည်သူ့လွှတ်တော် ဒုတိယ ပုံမှန်အစည်းအဝေး တတိယနေ့မှာ မန်အောင်မြို့နယ် ပြည်သူ့လွှတ်တော်ကိုယ်စားလှယ် ဦးကျော်သန်းက မာန်အောင်မြို့နယ်၊ စမုံတဲ လေယာဉ်ကွင်းကို တိုးချဲ့ဆောက် ပေးရန် အစီအစစဉ် ရှိ/မရှိနဲ့ တိုးချဲ့ဆောက်လုပ်ပေးမယ်ဆိုရင် မည်သည့် ဘဏ္ဍာနှစ်မှာ တည်ဆောက်ပေးမည်ကို သိရှိလိုတယ်လို့ မေးတဲ့အပေါ် ဖြေဆိုခဲ့တာလည်း ဖြစ်ပါတယ်။

“စမုံတဲ လေယဥ်ကွင်း တိုးချဲ့ဆောင်ရွက်ဖို့ လက်ရှိ လေယာဉ်ပြေးလမ်းကို ၄၅၀၀ x ၁၀၀ ပေကနေ ပြေးလမ်းတောင်ဘက်ကို ၁၅၀၀x၁၀၀ ပေ တိုးချဲ့နိုင်ဖို့လိုအပ်တဲ့ မြေဧရိယာ ၃၃.၅၆ ဧကကို သိမ်းဆည်းပြီး ၂၀၁၅-၂၀၁၆ ဘဏ္ဍာရေးနှစ်မှာ မြေယာသီးနှံလျော်ကြေး ပေးချေ ဆောင်ရွက်ထားတယ်” လို့ ရွေးတုအစိုးရ ပို့ဆောင်ရေးဝန်ကြီးဌာန ဒုတိယဝန်ကြီး ဦးထွန်းလှက ဆိုပါတယ်။

မာန်အောင်မြို့ စမုံတဲလေယာဉ်ကွင်း ပြေးလမ်းတိုးချဲ့ခြင်းနဲ့ ထပ်ပိုးလွှာ တင်ခြင်းလုပ်ငန်းတွေကို ဆောင်ရွက်နိုင်ဖို့ ၂၀၂၇-၂၀၂၈ ဘဏ္ဍာနှစ်တွင် ရန်ပုံငွေ တင်ပြတောင်းခံပြီး ရန်ပုံငွေ ရရှိမှုအပေါ် မူတည်ပြီး ဆောင်ရွက်သွားမယ်လို့လည်း သိရပါတယ်။

လက်ရှိမှာတော့ ရွေးတုအစိုးရ သမ္မတ မင်းအောင်လှိုင်အမိန့်နဲ့ ပို့ဆောင်ရေးဝန်ကြီးဌာနက ဧပြီလ ၂၄ ရက်ကစပြီး L 410 လေယာဉ်အမျိုးအစားကိုအသုံးပြုကာ ရန်ကုန် – မာန်အောင် – ကျောက်ဖြူ – ရန်ကုန် စတဲ့ ခရီးစဉ်တွေကို ၁ ပါတ် ၃ ရက် ပျံသန်း ပြေးဆွဲပေးနေတာလည်း ဖြစ်ပါတယ်။